އައްޑޫ ހަންކެޑެ ބްރިޖުގައި އެކްސިޑެންޓެއްގައި ހިނގައި މީހަކު މަރުވެއްޖެ އެވެ.

ފުލުހުން ބުނި ގޮތުގައި މި އެކްސިޑެންޓް ހިނގީ އައްޑޫ ބްރިޖުގައި ބާރު ސްޕީޑުގައި ދުއްވި ސައިކަލެއް ކޮންޓްރޯލް ނުވެގެންނެވެ.

އެ ގޮތުން މިހާތަނަށް ބެލިބެލުމުން މި އެކްސިޑެންޓް ހިނގާފައިވަނީ ސައިކަލު ބާރު ސްޕީޑުގައި މަރަދޫ އިން ހިތަދޫއަށް ދުއްވާފައި ގޮސް ބްރިޖު ބެންޑް ހިސާބުން ސައިކަލު ކޮންޓްރޯލް ނުވެ ގޮސް ބްރިޖުގެ ފެންސުގައި ޖެހިގެން ކަމަށް ފުލުހުން ވަނީ ބުނެފަ އެވެ.

އެނގިފައިވާ ގޮތުން މި އެކްސިޑެންޓްގައި މަރުވީ އުމުރުން 24 އަހަރުގެ ފިރިހެނެކެވެ.

އައްޑޫ ލިންކް ރޯޑާ ގުޅިފައި އޮންނަ ހަންކެޑެ އާ ބްރިޖަކީ މި މަހުގެ 1 ގައި ހުޅުވި ބްރިޖެކެވެ. މިއީ ބްރިޖް ހުޅުވި ފަހުން ހިނގި އެކްސިޑެންޓެއްގައި މީހަކު މަރުވި ފުރަތަމަ ފަހަރެވެ.

މި ހާދިސާ ފުލުހުން މިހާރު އަންނަނީ އިތުރަށް ތަހުގީގު ކުރަމުންނެވެ.