އެންޓި ކޮރަޕްޝަން ކޮމިޝަން (އޭސީސީ) ހުރި ރައީސް މުހައްމަދު މުއިއްޒުގެ މައްސަލަތައް ފައިލު ނުކުރި ނަމަވެސް އެ މައްސަލަތައް ހުޅުވާ ތަހުގީގުކުރަން އެކޮމިޝަނަށް ނުކެރޭތީ ރައީސް އަބްދުﷲ ޔާމީން ފާޑުވިދާޅުވެ ކަންބޮޑުވުން ފާޅުކުރައްވައިފިއެވެ.

އާދިއްތަ ދުވަހުގެރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވަނީ އެމްއޭސީއެލްއިން ހިންގަމުން ގެންދާ ބޮޑެތި ކޮރަޕްޝަންގެ އަމަލުތަކާ މެދު ވާހަކަފުޅު ދައްކަވާފައެވެ.

އެގޮތުން ރައީސް ޔާމީން ވިދާޅުވި މުޅި ދައުލަތް ކޮރަޕްޝަންގެ މޫތައް ފެތުރި ކޮރަޕްޝަންގެ ވަކިތަކުން ވެރިން މިންޖުނުވެ ތިބިއިރު އެހުރިހާ ވައްކަމާ ކޮރަޕްޝަންގެ ފަހަތުގައި ރައީސް މުއިއްޒަށް އެޅޭ ބައިވެސް އޮންނަ ކަމަށާ އެހެންކަމުން މި ސަރުކާރުގައި ކޮރަޕްޝަންގެ މައްސަލަތައް ބަލާ ފިޔަޅު ނޭޅޭނެ ކަމަށެވެ.

ރައީސް ޔާމީން ވިދާޅުވީ، ރައީސް މުއިއްޒުގެ ކޮރަޕްޓު މިންވަރު އޭސީސީގައި އެމަނިކުފާނުގެ މައްޗަށް ހުށަހަޅާފައި ހުރި މައްސަލަތަކުގެ އަދަދުން ވެސް ހާމަވާއިރު އެއިން މައްސަލައެއް ބަލަން އޭސީސީއަށް ނުކެރޭނެ ކަމަށްވެސް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، ސަރުކާރު ކޮރަޕްޝަނާ ދެކޮޅުކަމަށް ބުނެ ބަޔަކު ވަޒީފާތަކުން ވަކިކުރަމުން ދަނީ ރައީސް މުއިއްޒަށް ބައި އަޅަން ދެކޮޅު ހަދާތީ ކަމަށެވެ. އެގޮތުން މަޖިލިސް ރައީސް އަބދުއްރަހީމާ ރައީސް މުއިއްޒާ ދެމެދު ވެސް ޖެހިގެން އުޅެނީ އެފަދަ ކަމެއްގެ ލައްގަޑެއް ކަމަށް ރައީސް ޔާމީން ވިދާޅުވިއެވެ.