Are You All Happy , Dhen Othee Riyasee Dhauru Dhanmaalun...!

ޑރ. މުއިއްޒުގެ ވެރިކަން ސަޅި ހެއްޔެވެ.؟ ޑރ. މުއިއްޒުގެ ވެރިކަމުގައި ވަމުންދާ ގޮތާއި މެދު ހެޕީ ހެއްޔެވެ.؟ ޑރ. މުއިއްޒު ވެރިކަމުގައި އިތުރަށް ބަހައްޓަން ބޭނުން ހެއްޔެވެ.؟

މި ހުރީ ހުސް ސުވާލެވެ. މުއިއްޒުގެ މުސާރަ ވެރިންގެ ގޮތުގައި ތިއްބެވި 3000 މީހުންނަށް ޖަވާބު ވަރަށް ކުރުވެފައި ސާދާ އެވެ. އެވެރިންގެ ޖަވާބަކީ މުއިއްޒުގެ ވެރިކަން ސަޅި އެވެ. ހެޕީ އެވެ. ނުބާލައި ވެރިކަމުގައި މުއިއްޒު ބަހައްޓަން ވެސް ބޭނުމެވެ. އެންމެ ސަބަބެކެވެ. އެމީހުންގެ އަންބޮޑިއަށް ލިބޭ ބައިވަރުގެ ސަބަބުން ނެވެ.

ދެން ތިއްބެވި ރައްޔިތުންނަށް ފެންނަނީ މުޅިން އެހެން މަންޒަރެކެވެ. އެއީ ޑރ. މުއިއްޒުގެ ހުދުމުހުތާރުކަމާއި ހެޓިލަރު ސިފަ އެވެ. އެގޮތުން ޑރ. މުއިއްޒުގެ ކިބައިން މިހާރު ފެންނަމުން މިދަނީ މި ގައުމު ވަރަށް ނުބައި ދިމާލަކަށް ގެންދާތަނެވެ. އެގޮތުން ފުރަތަމަ ޑރ. މުއިއްޒު ފެށި މަސައްކަތުން ތިން ބާރު ވަކިވެފައިވާ ދިމިގްރާތީ ދައުލަތެއްގެ ސިފަ ގެއްލުވާލާ ރައްޔިތުންގެ މަޖިލިސް ޑރ. މުއިއްޒުގެ ބާރުގެ ދަށަށް ގެން ގޮސް ސަރުކާރު ޖަވާބުދާރީ ވުމާއި ސަރުކާރަށް ފާރަވެރިވުން ހުއްޓުވި އެވެ.

މި ހީލަތްތެރި ރޭވުމަށްފަހު ދެން ޑރ. މުއިއްޒުގެ ނިންމެވުމަކަށްވީ މިނިވަން މުއައްސަސާތަކަށް އަތް ބޭނުމެވެ. އެގޮތުން އިލެކްޝަން ކޮމިޝަނާއި އާއި އެންޓި ކޮރަޕްޝަން ކޮމިޝަނުގެ ވެރިން ސީދާ މުއިއްޒު އެދިލައްވާ މީހަކު ބެހެއްޓުމަށް ގާނޫނަށް އިސްލާހު ގެންނެވި އެވެ.

އެއަށްފަހު ސަރުކާރުން ވެރިކަމަށް އައުމުގެ ކުރިން ދެއްކި މެނިފެސްޓޯއާ ތަފާތު މެނިފެސްޓޯއެއްގެ ވާހަކަ ދައްކަމުން ޖޭއެސްސީގެ ތެރެއަށް އަތް ބާނަން ފެއްޓެވި އެވެ. ނަތީޖާ އަކީ ޑރ. މުއިއްޒު ދިވެހި ޒައާމަތާ ހަވާލުވެވަޑައިގެން، ގައުމާ މުހާތަބު ކުރައްވައި ދެއްވި ފުރަތަމަ ތަގުރީރުގައި އެމަނިކުފާނު ވިދާޅުވި ގޮތާއި ހިލާފަށް އަދުލު އިންސާފުގެ ނިޒާމުގެ ތެރެއަށް، ސަރުކާރުގެ ނުފޫޒު ފޯރުވާން ފެއްޓެވުމެވެ. ސަރުކާރުގެ ކުރިމަގު ބަނަކަމާއި އަނިޔާވެރި، ހުދުމުހުތާރު ވެރިކަމެއްގެ ކޮޅުމަތި ފެންނަންފެށުމެވެ.

މީގެއިތުރަށް، އަޅުގަނޑުމެން ކަށަވަރުކުރަން ބޭނުންވަނީ، ރާއްޖޭގެ ބާރުތަކުގެ މިނިވަންކަން. ވަކިން ހާއްސަކޮށް، އަދުލު އިންސާފުގެ ނިޒާމުގެ ތެރެއަށް، ސަރުކާރުގެ ކުޑަވެސް ނުފޫޒެއް ވަންނާނެ ޖާގަ ނުދިނުން. މީގެ މާނައަކީ، ފަހަރެއްގައިވެސް ދިވެހިރައްޔިތުންނާއި ދިވެހި ދައުލަތަށް ހިޔާނާތްތެރިވުމުން، އެފަދަ ކުށްތައް ކުރާ ފަރާތްތަކާ މެދުގައި ސަރުކާރުން ލޯ މަރާލުމެއް ނޫން. އެއާ ހިލާފަށް، މީގެ މާނައަކީ ސަރުކާރުން، ޝަރުއީ ދާއިރާއަށް ނުފޫޒު ފޯރުވުން މި ހިނދުން މި ހިނދަށް ނިމުން. އެކަން މި ނިންމީ.

- ޑރ. މުއިއްޒު ދިވެހި ޒައާމަތާ ހަވާލުވެވަޑައިގެން، ގައުމާ މުހާތަބު ކުރެއްވި ފުރަތަމަ ދުވަހު ވިދާޅުވި އެވެ.

ދިވެހި ދައުލަތް ބެހިގެން ވަނީ، މިނިވަން ކަންމަތީ ހިނގަހިނގާ އޮންނަންޖެހޭ ތިން ބާރެއްގެ މައްޗަށެވެ. ވެރިކަން ހިންގުމުގެ ބާރު ސަރުކާރަށް, ގާނޫނު ހެދުމުގެ ބާރު ރައްޔިތުންގެ މަޖިލީހަށް އަދި އަދުލު އިންސާފު ގާއިމުކުރުމުގެ ބާރު ކޯޓުތަކަށެވެ. ގާނޫނުއަސާސީގައި ތަރުތީބުވެގެން އަންނަ ތިން މާއްދާއަކުން ބާރު ލިބި، މިނިވަން ވެފައިވާ މި ތިން ބާރު އެއްވުމަކީ ގާނޫނުއަސާސީގެ ބާރު ކެނޑުމެވެ. ވެރިކަމުގެ ސިފަ ގެއްލުމެވެ.

ވެރިކަމަށް 15 މަސް ވާންދާއިރު ޑރ. މުއިއްޒުގެ ކިބައިން މިއަދު ފެންނަނީ ދައުލަތުގެ ހުރިހާ ބާރުތައް މުށުތެރެއަށް ޖަމާކުރައްވައި ގާނޫނުތައް މުގުރައި ހުދުމުހުތާރުވެރިކަމެއް ކުރެއްވުމަށް ފެންބޮވައިގެންފާ ހުންނެވިތަނެވެ. ސުޕްރީމް ކޯޓަށް ނުފޫޒު ފޯރުވާ ހިތުހުރި ގޮތަކަށް ގާނޫނުތައް މާނަ ކޮށް އަވަސްއަރުވާލައިގެން ގާނޫނޫތައް ފާސްކޮށް، ގާނޫނުގެ ވެރިކަމާއި ފެއަށް ޖެހިވަޑައިގެންނެވި ތަނެވެ. އެގޮތުން އެންމެ މަތީ ކޯޓުގައި ދުސްތޫރީ މައްސަލައެއް ކުރިއަށް ދަނިކޮށް އެކަމަށް ސިޔާސީ ނުފޫޒު ފޯރުވައި، ހުރިހާ މުއައްސަސާތަކެއްގެ މުސްތަގިއްލުކަން ނަގާލައި، ފަނޑިޔާރުންނަށް ބިރު ދެއްކުމުގެ ވަރަށް ހުތުރު އަމަލުތަކެއް ހިންގަމުންދާ މަންޒަރެވެ.

މިއަދު ރައީސް މުއިއްޒަަށް އިންސާފަކީ އެ މަނިކުފާނު ބޭނުންވާ ގޮތަކަށް ގާނޫނު ބަދަލުކޮށް، އެގޮތަށް ކަންކަން ކުރުން ކަމަށް ގަބޫލު ކުރައްވާނަމަ، ދައުލަތުގެ އެންމެ މަތީ ވެރިޔާގެ ހައިސިއްޔަތުން އަދުލުވެރިކަމާއި ބޭއިންސާފެއް ނުވުމަށް ވީ ވައުދު އެ ވަނީ ހަނދާން ނައްތާލައްވާފަ އެވެ. ހީލަތްތެރިއެއް ނުވާނެ ކަމަށް ވައުދުވެވަޑައިގެންނެވި ނަމަވެސް، ފަނޑިޔާރުން ބަދަލުކުރުން މި ގެންދަވަނީ ހީލަތްތެރި ގޮތަކަށެވެ.

ރައްޔިތުންގެ ތާއީދު ގެއްލި ޑރ. މުއިއްޒުގެ ސަރުކާރުން މިހާރު ގަބޫލުކުރަނީ ސަރުކާރު ބަލިވެއްޖެ ކަމަށެވެ. މިހާލަތުގައި ދެން ފެންނާނީ ހުދުމުހުތާރުކަމުގެ އިތުރު އަމަލުތަކެވެ. އާ ޔޫ އޯލް ހެޕީ، ތޯ އައްސަވާ ރިޔާސީ ދައުރު ދަންމާލާނެ ތަނެވެ.

ބުނަމުން ދާނީ އެއީ ގާނޫނުގައި އޮތް ގޮތް ކަމާއި، އިންސާފު ކަމަށެވެ. ހީލަތްތެރިވެރިންގެ ހަގީގީ ސިފައަކީ އެއީ އެވެ. ޖަރުމަނުގައި ވެރިކަންކުރި އެޑޮލްފް ހިޓްލަރު ފަދައިން ނެވެ. ހިޓްލަރު ބޭނުން ކޮންމެ ކަމެއް ކުރީ ގާނޫނު ހަދައިގެންނެވެ. މުއިއްޒުގެ ވެރިކަން ވެސް މިއަދު ހަމަ އެފަދަ އެވެ. ހިޓްލަރު ބާރު ހޯދީ މެންބަރުންނަށް ފައިސާ ބަހައިގެންނެވެ. ރިޝްވަތު ދީގެންނެވެ. މުއިއްޒުގެ ވެރިކަން ވެސް މިއަދު ހަމަ އެފަދައެވެ.

ރައްޔިތުންގެ ވޯޓަކުން އިތުރު ދައުރެއް ނުލިބޭނެކަން ޑރ. މުއިއްޒު އަށް ވެސް މިއަދު ކަށަވަރާއި ގާތަށް ޔަގީނެވެ. ހަދާނާއި ތާރީހުގެ ތެރެއިން އަޅުގަނޑުގެ އިލްތިމާސް އަކީ މިއީ އެވެ. ރައީސް ޑރ. މުހައްމަދު މުއިއްޒު އެވެ.

ކިބުރުވެރިކަމާއި ބޮޑާކަން ހިތަށް ވެރިވެ، އިންސާނާގެ ހައިސިއްޔަތާއި މަގާމާއި ދަރަޖަ ހަނދާން ނެތި ދިޔަ ނުދޭށެވެ. ވެރިކަމުގެ އާރާއި ބާރަކީ ވަގުތީ ކަންކަމެވެ. މަގާމެއް ލިބުމަކީ ބޮޑާވެ ކިބުރުވެރިވާންވީ ސަބަބެއް ނޫނެވެ. އިސްލާހު ވާށެވެ. ކުރިއަށް އޮތީ ބަރަކާތްތެރި ރަމަޟާން މަހެވެ. އިސްލާހަށް އެދި ދަންނަވާށެވެ.