Majilis Memberun Thiby Nagoo Fithifa: Raees Yameen

ރައްޔިތުންގެ މަޖިލީހުގެ މެމްބަރުން މިހާރު ތިބީ ނަގޫ ފިތިފައި ކަމަށާ އަމިއްލަ ބާރު އޭގެ ތެރޭގައި ތިބި ޕީއެންސީގެ މަޖިލިސް މެމްބަރުންނަށް ގެއްލިފައިވާ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ބުރާސްފަތި ދުވަހުގެރޭ ޕީއެންއެފުން ބޭއްވި ޖަލްސާގައި، އަދުގެ ސަރުކާރުން ޖުޑިޝަރީއަށް މަޖިލިސް މެދުވެރިކޮށް ވެރިކަން ހިންގުމުގެ ބާރު ނުފޫޒުފޯރުވުމަށް މަގު ކަށަމުން ގެންދާއިރު މަޖިލިސް މެމްބަރުން ކުރި ހުވައާ ޚިލާފުވަމުން ގެންދާތީ ރައީސް ޔާމީން ވަނީ ނުރުހުން ފާޅުކުރައްވާފައެވެ.

އެމަނިކުފާނު ވިދާޅުވީ މަޖިލިސް މެމްބަރުން ކުރި ހުވައާ އެއްގޮަތަށް އަމަލުތައް ބަހައްޓަން ޖެހޭނެ ކަމަށާ އެގޮތުން އިންތިހާބުވެވަޑައިގެން ތިއްބެވި ދާއިރާތަކުގެ މަސްލަހަތަށްވުރެވެސް މުޅި ރައްޔިތުންގެ މަސްލަހަތު އިސްކުރަން ޖެހޭނެ ކަމަށް ރައީސް ޔާމީން ފާހަގަކުރެއްވިއެވެ.

ނަމަވެސް ފެންނަމުން ދަނީ މަޖިލިސް މެމްބަރުން ރައީސް މުހައްމަދު މުއިއްޒުގެ މުށު ތެރޭގައި ފިތިފައިވާ ކަން ކަމަށް ވެސް ރައީސް ޔާމީން ވިދާޅުވެފައިވެއެވެ.

އެއީ ޑިމޮކްރެސީއާ ދުރަށް އެދެވެނީ. އެހެންކަމަށް ވަންޏާ ގާނޫނުތަކެއް އޮންނާނެ ކަމެއް ނެތް. އައިބީ ބުނާހެން އަތަށް އޮޅާލާފައި ހުރިހާ ބާރެއް މުއިއްޒަށް ދީފައި ބުނޭ. ގާނޫނަށް ބަލާނެ ކަމެއް ނެތޭ ހިންގަން ބޭނުން ގޮތަކަށް ހިންގާށޭ. އެހެން ނުވާން ވެގެން ތަހުޒީބީ މުޖުތަމައަކަށް ދިވެހިރާއްޖެ ކުރި 18 އަހަރުގެ ދިގު ދަތުރުގައި ބުރަށް މަސައްކަތަށް ފަހު ގެނައި ގާނޫނު އަސާސީއެއް މިއީ. އެހެރީ އޮން ޕޭޕަރ ތިއޮރޮޓިކަލީ ހަމަ ގައިމުވެސް އަދި ފުރިހަމަ ކުރަން ޖެހޭ ކަންތައްތަކެއް ފުރިހަމަ ކުރަން ޖެހުނު ނަމަވެސް މީގަ ކުރީގަ ދުވަހަކުވެސް އަޅުގަޑުމެންނަށް ލިބިގެން ނުދާ ހައްގުތަކެއް ކަށަވަރުކޮށްދީފައި އެހެރީ. މިހާރު އެބަ ހުރި ރައްޔިތުންގެ އަސާސީ ހައްގުތަކެއް. މިހާރު ގައުމުގައި ސިފަތަކެއް އެބަހުރި. އަދި މިހާރު އެބައޮތް ކެބިނެޓެއް އެބައޮތް، ރައީސުލްޖުމްހޫރިއްޔާ އެގްޒެކެޓިވް ބާރު ފެށޭ ހިސާބު ނިމޭ ހިސާބު . މިނިވަން މުއައްސަސާތަކެއް އުފައްދާފައި އެބަހުރި. އެކަމު މީގަ ޖެހިގެން އުޅޭ މައްސަލައަކީ މިނިވަން މުއައްސަސާއެއްވެސް ފަންކްޝަން ނުކުރޭ. ރައްޔިތުންގެ މަޖިލިސް މެމްބަރުންނަސް ނުފެންނަނީ ތޯ. ފަނޑިޔާރުންގެ ކޮރަޕްޝަންގެ މައްސަލަތަކެއް ކުއްލިއަކަށް ފެންމަތިކޮށް ބަލާނަމޭ ބުނާއިރު މުއިއްޒުގެ ކިތައް މައްސަލަތޯ އޭސީސީގައި ހުއްޓިފައި ހުރީ، އެއިން މައްސަލައެއް ނުބަލާ. ނުބެލޭނެ. މިއި ނަގޫ ފިތިފައި ތިބި ބައެކޭ. މުސާރައިގެ ދަހިވެތިކަމުގައި ތިބި ބައެއް މިއީ

- ރައީސް ޔާމީން

ރައީސް ޔާމީން ވިދާޅުވީ މިއަދު ރައްޔިތުން ކިބައިން ރޯލު ކޯލު ވޯޓެއް ނެގި ނަމަވެސް 100 އިން 90 މީހުން ތާއީދު ކުރާނީ ސުޕްރީމު ކޯޓުގެ ސުޕްރަމެސީއަށް ކަމަށާ ރައްޔިތުންގެ މަޖިލީހުގެ މެމްބަރުންނަށް ނޫން ކަމަށް ހާމައަށް ފެންނަން އެބަ އޮތް ކަމަށެވެ.