މާލެ މަލަމަތި ރީތި ކުރުމަކީ އެއް ވެރިއަކަށް ވުރެ އަނެއް ވެރިއަކު މޮޅަށް ގިނަ ފައިސާ ހަރަދުކޮށްގެން ކުރާ ކަމަކަށް މިހާރު ވެއްޖެއެވެ. ބޮޑެު ފައިސާގައ މާލޭގެ މަލަމަތި ކޮންމެ ވެރިކަމެއްގައި ބަދަލުކުރުމަކީ ޓްރެންޑަކަށްވެއްޖެެއެވެ. މިކަމުގައި ކިތަންމެ ހިތްގައިމު މަންޒަރެއް ފެނުނުނަމަވެސް ހިތަށް އުނދަގޫ ވަނީ ހަމަ އެއާ ޖެހިގެން މާ ދުރު ނޫން ހިސާބެއްގައި އަތޮޅު ތެރޭގެ ރައްޔިތުން ލަފާ ފުރުމުގައި އެ އުފުލާ ތަކްލީފާ އުނދަގުލެވެ.

އާދޭހެވެ. ދައްކަން މިއުޅެނީ މާލޭގެ އެއް ނަމްބަރު ފާލަން ނިކަން ޗާލުކޮށް މި ސަރުކާރުން ގިނަ ދުވަސްތަކަކަށް ފަހު ނަމަހީވެސް ނިންމާލިއިރު 6 ނަމްބަރު ފާލަމާ 7 ފާލަމާ 5 ނަމްބަރު ފާލަމާ މިހެން ގޮސް މާލޭގައި އޮތިއްޔާ އޮތްހާ ފާލަމެއްގައި ހުރި ލަފާ ފުރުމުގެ ދަތިތަކުގެ ވާހަކަ އެވެ.

ވެރީން ދަތުރުފުޅުތަކަށް ބޭނުންކުރައްވާ ރަސްމީ ފާލަމުގައި އެ ފަދަ ހަޑިކަމެއް ހުރުމަކީ އެއްގޮތަކަށް ވެސް ފެނިގެންވާނެ ސިފައެއް ނޫން ކަމަށް ކޮންމެ ވެރިއަކަށްވެސް ގަބޫލުކުރެވޭ އިރު އެއިން ކޮންމެ ވެރިއަކު ގެންނަން ވޯޓު ދޭ ނިކަމެތި ރައްޔިތުންނަށް ލަފާފުރުމުގައި ހަމަ އެއްވެސް ހައްލެއް ނެތުމަކީ އިންސާފުތޯއެވެ.

ރަސްމީ ފާލަން ދޮށުގައި ހުއްޓި ހުރުމުން، އެންމެ ދަބަރުކޮޅެއް ވެސް ނުފެނެއެވެ. ވެރީންގެ ލޯންޗުތަކަށް ގާތްކުރެވޭނެހާ ތަނަވަސް ޖާގައާއި، ވާރެއާއި އަވިން ނިވާވެވޭނެ ފުރާޅަކާއެކު ފާލަން ނިންމާފައި އޮތްއިރު، ވެރިމީހާ ތަހުތަށް އިންތިހާބުކުރަން ވޯޓުދިން ނިކަމެތި ރައްޔިތުން ލަފާ ފުރަނީ ދޭހާ އަތްވެއްގައި ވެހޭ ވާރޭއެއްގެ ތެރޭގައި އެއް ލޯންޗުން އަނެއް ލޯންޗަށް ގިރާކުރަމުންނެވެ. އުމުރުން ދުވަސްވީ މީހުންނާ އަލަށް ވިހެއި ދަރިފުޅުވެސް ގޮވައިން މައިންނާ ބަފައިން އުޅޭ ހާލު ފެނި ހިތަށް ނުހަނު އަސަރުކުރެއެވެ. ރަސްމީ ފާލަމާ ޖެހިގެން، ލޯންޗުތައް ބަރިބަރިއަށް އަތުރައިލައިފައި އޮތްއިރު ތޮށިގަނޑު މަތީ ހިރިލާނެ ޖާގައެއް ވެސް ނެތެވެ.

މި ހާލަކީ އިއްޔެއަކު މިއަދަކު ކުއްލިއަކަށް އުޅެންޖެހުނު ގޮތެއް ވެސް ނޫން އިރު މިއީ މިކަމުގެ ޝަކުވާއާއި، ކަންބޮޑުވުމުގެ އަޑު އިއްވި ނަމަވެސް އެއްވެސް މޭޔަރަކަށް، ނުވަތަ ސަރުކާރަކަށް ހައްލު ނުކޮށް އޮތް ބޮޑު ތަކުލީފެކެެވެ. މި ވާހަކަ މިއަދު ދައްކަން މިޖެހެނީ ވެރިންގެ ފާލަމުގައި ދަބަރުކޮޅެއްވެސް ހުންނަން އަދުގެ ރައީސަށް ކަމު ނުގޮސްގެން ޤައުމިއްޔަތާ، ސަގާފަތް ރަމްޒުކޮށްދޭ ގޮތަށް ފާލަން ތަރައްގީކުރަން ކަމަށްބުނެ އަނެއްކާވެސް ދައުލަތުގެ ބަޖެޓުން ބޭކާރު 11.7 މިލިއަން ރުފިޔާ ޚަރަދުކޮށް ރަސްމީ ފާލަން ތަރައްގީ ކުރުމުގެ ބަދަލުގައި ނިކަމެތި ރައްޔިތުން ލަފާ ފުރާ ސަރަހައްދަށް އެއިން ފައިސާ ފޮއްޗެއް ހަރަދުކޮށްގެން ތަރައްގިއެއް ގެނައި ނަމަ ރަގަޅުވީސް ކަމަށް ފެންނާތީއެވެ.

ބޮޑު ކެކެރު އިތުރަށް ބޮޑުނުކޮށް ސަރުކާރުން ކުޑަ ކެކުރިތަކަށް ވެސް ގޮތް ހޯދާދިނުމަކީ އެތައް އާންމުންނެއްގެ ހުވަފެނެވެ. ވެރިންގެ ފާލަން ތިންވަނަ ބުރަށް ހަދާއިރު، ޖެހިގެން އޮތް އާންމު ރައްޔިތުންގެ ޖެޓީގައި އެތައް ސަތޭކަ ރައްޔިތުން ތިބޭ ދަތި ހާލު ނުފެނުމަކީ ދެރަ ވަރުގެ ދެރަ ފެންވަރުގެ ކަންކަމަށްވުމެވެ.

މާލޭގެ ޖެޓީތަކުން ލަފައިފުރާ ގިނަ އާންމުން ވެސް މިއަދު އިންތިޒާރުގައި ތިބީ އެ ނިކަމެތި ރައްޔިތުންނަށް ފަސޭހަ ކަމާއެކު ކަނޑު ދަތުރުފަތުރުތައް ކުރެވޭނެ ދުވަހަކަށެވެ. ލޯންޗުތައް ގިރާކުރަމުން ފުރަން ޖެހޭ ޖެހން ނިމުމަކަށް އަންނާނެ ދުވަހަކަށެވެ.