ރައީސް މުއިއްޒު ގާނޫނުއަސާސީއާ ހިލާފު ވެއްޖެ ކަމަށް މިއަދު ސުޕްރީމް ކޯޓުގެ ފަނޑިޔާރުކަމުން އިސްތިއުފާ ދެއްވި ހުސްނުއްސުއޫދު ވިދާޅުވެއްޖެ އެވެ.

ހުސްނުއްސުއޫދުގެ އިސްތިއުފާގެ ސިޓީގައިވަނީ މަޖިލިސް މެންބަރުން ޕާޓީން ވަކިކުރުމުން ނުވަތަ އަމިއްލައަށް ވަކިވުމުން ގޮނޑި ގެއްލޭ ގޮތަށް ގާނޫނު އަސާސީއަށް ގެނައި އިސްލާހު ބާތިލުކުރުމަށް އެދި ހުށަހަޅައިފައިވާ މައްސަލަ ބެލޭނެ ކަމަށް އެ ކޯޓުން ނިންމުމާއެކު އެ މައްސަލަ ބެލުން ހުއްޓުވުމުގެ ގޮތުން އެތައް ނުފޫޒެއް ސަރުކާރުން ފޯރުވަމުން އަންނަ ކަމަށެވެ.

އަދި ކޯޓުގެ ތިން ފަނޑިޔާރަކު ސަސްޕެންޑުކުރީ ވެސް އެ މައްސަލަ ހުއްޓުވުމުގެ ގޮތުން ކަމަށް ހުސްނުއްސުއޫދު އިސްތިއުފާގެ ސިޓީގައި ލިޔުއްވައިފައިވެ އެވެ.

މީގެ އިތުރުން އެ ކޯޓުގެ ފަނޑިޔާރުންގެ އަދަދު މަދުކުރަން ބިލެއް ފާސްކޮށް، ރައީސް މުއިއްޒު އެދިވަޑައިގަންނަވާ ގޮތަށް ގޮނޑި ގެެއްލޭ މައްސަލަ ނިންމަން ކޯޓުގެ ހުރިހާ ފަނޑިޔާރުންނަށް ބިރު ދައްކަވަމުން ގެންދަވާކަމަށް ވަނީ ސިޓީގައި ބަޔާންކޮށްފަ އެވެ.

ސުއޫދުގެ އިސްތިއުފާ މި އައީ އޭނާގެ މައްސަލައެއް ޖޭއެސްސީ އާއި އޭސީސީން ބަލާކަމަށް ބުނެ ސަސްޕެންޑްކޮށްފައި އޮއްވަ އެވެ. މިކަމުގައި ސަރުކާރަށް ފާޑުކިޔާ މީހުން ބުނާ ގޮތުގައި އެއީ ސުޕްރީމް ކޯޓުން ބަލަން ނިންމި މެމްބަރުންގެ ގޮނޑި ގެއްލޭ މައްސަލަ ހުއްޓުވަން ސަރުކާރުގެ ނުފޫޒުގައި އެޅި ފިޔަވަޅެކެވެ.

މިދިޔަ ބުދަ ދުވަހު، ކުއްލި ގޮތަކަށް ޖުޑީޝަލް ސާވިސް ކޮމިޝަން (ޖޭއެސްސީ)އިން ސުޕްރީމް ކޯޓުގެ ތިން ފަނޑިޔާރުން ކަމަށްވާ ހުސްނުއްސުއޫދާއި، މަހާޒު އަލީ ޒާހިރާއި، ޑރ. އަޒްމިރަލްދާ ޒާހިރު ސަސްޕެންޑުކުރީ އެ ދުވަހުގެ ހެނދުނު 11:00 އަށް ގޮނޑި ގެއްލޭ މައްސަލައިގެ ވަގުތީ އަމުރާ ގުޅޭ އަޑުއެހުމެއް ތާވަލުކޮށް ދެ ތިން މިނެޓަށް ވެފައި އޮއްވަ އެވެ.

އެ ފަނޑިޔާރުން ސަސްޕެންޑުކުރީ ޖިނާއީ މައްސަލައެއް ބަލަމުން އަންނާތީކަމަށް ޖޭއެސްސީން ބުނެފައިވެ އެވެ ނަމަވެސް އެކަމުގެ އެއްވެސް ތަފްސީލެއް މިއަދާއި ހަމައަށް އޭސީސީން އަދި ޖޭއެސްސީން ވެސް ހާމަ އެއް ނުކުރެ އެވެ.

ހަމަ އެ ދުވަހުގެ ހެނދުނު 10:00ގައި ރައްޔިތުންގެ މަޖިލީހުން ވަނީ ސުޕްރީމް ކޯޓުގައި ތިއްބެވާ ހަތް ފަނޑިޔާރުންގެ ތެރެއިން ދެ ފަނޑިޔާރުން ވަކިކުރުމަށް ވެރިކަން ކުރާ ޕީއެންސީން ހުށަހެޅި ބިލު ތަޅުމުން ފާސްކޮށްފަ އެވެ.

ސަރުކާރުގެ ތާއީދާ އެކު ސުޕްރީމް ކޯޓުގެ ފަނޑިޔާރުންގެ ބެންޗަށް ގެންނަ މި ބަދަލު ވާހަކަ ފެށުނީ މަޖިލީހުގެ މެންބަރުންގެ ގޮނޑި ގެއްލޭ އިސްލާހު ބާތިލް ކުރަން ފުލް ބެންޗުން މައްސަލައެއް ބަލަމުން ދަނިކޮށެވެ. ދައުލަތުން އެ ބެންޗުގައި އެދުނީ ގާނޫނުއަސާސީ އަށް ގެނައި އިސްލާހުގެ މައްސަލަ ނުބެލޭނެ ކަމަށް ނިންމުމަށެވެ. ނަމަވެސް ފަނޑިޔާރުންގެ ނިންމާފައިވަނީ އެ މައްސަލައިގެ ޝަރީއަތް ކުރިއަށް ގެންދިއުމަށެވެ.

ގާނޫނުއަސާސީގެ އިސްލާހުގައި ބުނެފައިވާ ގޮތުން މެމްބަރުން ނިސްބަތްވާ ޕާޓީން ވަކިކުރުމުން ވެސް ގޮނޑި ގެއްލެ އެވެ. އެ އިސްލާހަކީ ގާނޫނުއަސާސީއާ ހިލާފު ބަދަލެއް ކަމަށް ކަނޑައަޅައި ބާތިލްކޮށްދިނުމަށް އެދި ސުޕްރީމް ކޯޓަށް މައްސަލަ ވެއްދީ ކެންދޫ ދާއިރާގެ މެމްބަރުކަން މިދިއަ ދެ ދައުރު ވެސް ކުރެއްވި އަދި ގާނޫނީ ވަކީލު އަލީ ހުސެއިންނެވެ.

ގާނޫނީ ދާއިރާގެ ގިނަ މަގާމުތަކެއް އަދާކުރައްވާފައިވާ ސުއޫދު ސުޕްރީމް ކޯޓުގެ ފަނޑިޔާރަކަށް އައްޔަން ކުރެއްވީ ޑިސެމްބަރު 2019 ގަ އެވެ.