ނިމިދިޔަ އަހަރުގެ ޖެނުއަރީ އާއި އަޅައިބަލާއިރު އިމްޕޯޓު ކުރި މުދަލުގެ އަގު މައްޗަށް ދިޔަ ނަމަވެސް އެކްސްޕޯޓާއި ދައުލަތަށް ލިބުނު އާމްދަނީ ދަށްވިކަން ކަސްޓަމްސްއިން ހާމަކޮށްފިއެވެ.

މިކަން ހާމަވެފައިވަނީ ކަސްޓަމްސްއިން ނެރުނު މަންތުލީ ސްޓެސްޓިސްޓިކްސްގެ ތެރެއިންނެވެ.

ރިޕޯޓުގައިވާ ގޮތުގައި ޖެނުއަރީގައި 5.2 ބިލިއަން ރުފިޔާގެ މުދާ އެތެރެކުރި އިރު އެއީ މިދިޔަ އަހަރުގެ ޖެނުއަރީއަށް ވުރެ 100 މިލިއަން ރުފިޔާ އިތުރު އަދަދެކެވެ.

ޖެނުއަރީގައި ތެލުގެ އިމްޕޯޓު ކުރި މުދަލުގެ އަގު މިދިޔަ އަހަރުގެ ޖެނުއަރީއަށް ވުރެ 400 މިލިއަން ރުފިޔާވަނީ އިތުރުވެފައެވެ.

އިމްޕޯޓު މައްޗަށް ދިޔަކަން ފާހަގަ ކުރެވުނު ނަމަވެސް އާމްދަނީ ކުރީ އަހަރުގެ ޖެނުއަރީ މަހަށް ވުރެ ދަށްކަން ފާހަގަ ކުރެވެއެވެ. މި ޖެނުއަރީގައި ކަސްޓަމްސްއަށް 287 މިލިއަން ރުފިޔާ ލިބުނުއިރު މިދިޔަ އަހަރުގެ ޖެނުއަރީ ނިމުނުއިރު ޑިއުޓީ އާމްދަނީއަށް 314 މިލިއަން ރުފިޔާއެވެ.

ނިމުނު ޖެނުއަރީގައި އެކްސްޕޯޓު ކުރި މުދަލުގެ އަަގަކީ 144 މިލިއަން ރުފިޔާ އެވެ. އެއީ މިދިޔަ އަހަރުގެ ޖެނުއަރީގައި އެކްސްޕޯޓު ކުރި 173 މިލިއަން ރުފިޔާގެ މުދަލާ އަޅައިބަލާއިރު 16 ޕަސެންޓުގެ ވެއްޓުމެކެވެ.