ދިރާގުގެ ޑިރެކްޓަރުންގެ ބޯޑުގެ ޕަބްލިކް ޑިރެކްޓަރުގެ މަގާމަށް ކުރިމަތިލާން ހުޅުވާލައިފިއެވެ.

ޕަބްލިކް ޑިރެކްޓަރުގެ މަގާމު މީހަކު އިންތިހާބު ކުރުމަށް ހަމަޖެހިފައި ވަނީ އަންނަ އޭޕްރީލް މަހު އޮންނަ އަހަރީ އާންމު ޖަލްސާގައެވެ.

އެ މަގާމަށް ކުރިމަތިލެވޭނީ ދިރާގުގެ ހިއްސާދާރުންގެ ގޮތުގައި ތިބި މީހުންނާއި ޔުނިވަސިޓީއެއްގައި ޑިގްރީއެއް އޮތް މީހުންނަށާއި ކުންފުނިތަކުގެ ބޯޑުތަކުގައި ހިދުމަތްކޮށްފައިވާ، އާރްއެންޖީ ކޮމިޓީގެ ނިންމުމުގައިވާ ގޮތަށް މާލީ ބަޔާނާއި ރިޕޯޓްތައް ކިޔައި ވިސްނޭ ނުވަތަ އެކައުންޓިން ނުވަތަ އެއާ ގުޅުންހުރި މާލީ ތަޖުރިބާ ހުރި މީހުންނަށެވެ.

އޭގެއިތުރުން އެ މީހަކީ 10 އަހަރު ޕަބްލިކް ނުވަތަ ޕްރައިވެޓް ސެކްޓަރުގައި އިސް މަގާމެއްގައި ހިދުމަތްކޮށްފައި ހުރި މީހަކަށްވުމާއި ރެގިއުލޭޓަރެއްގެ ބޯޑުން ވަކިވިތާ މަދުވެގެން ބާރަ މަސް ދުވަސްވެފައިވާ މީހަކަށް ވެސް ވާން ޖެހޭނެއެވެ. އަދި ބޯޑުގެ މަސްއޫލިއްޔަތު އަދާކުރެވޭނެ މީހަކަށް ވެސް ވާން ޖެހޭނެއެވެ.

މި މަގާމަށް ކުރިމަތިލުމަށް އެދޭ ފޯމު ދިރާގު އޭޖީއެމް ޕޭޖުންނާއި އެ ކުންފުނީގެ ހެޑް އޮފީހުން ލިބޭނެއެވެ.މި މަގާމަށް ކުރިމަތިލުމަށް ފޯމާއި ލިޔެކިޔުން ހުށަހެޅޭނީ އަންނަ މަހުގެ ތިން ވަނަ ދުވަހުގެ ހަވީރު 4:00 ގެ ކުރިންނެވެ. އެގޮތުން ފޯމް ހުށަހެޅޭނީ ދިރާގު ހެޑް އޮފީހާއި [email protected] އަށް އީމެއިލް މެދުވެރިކޮށެވެ. ކުންފުންޏަކުން ނުވަތަ އެސޯސިއޭޝަނަކުން ހުށަހަޅާ ނަމަ، ބޯޑު ގަރާރާއި އެފަދަ ގާނޫނީ ފަރާތެއްގެ ރަޖިސްޓްރޭޝަންގެ ކޮޕީއެއް އެޕްލިކޭޝަން ފޯމާ އެކު ހުށަހަޅަންޖެހެއެވެ.

މި މަގާމަށް ޑިރެކްޓަރަކު ނަގާނީ އާރްއެންޖީ ކޮމިޓީން އެޕްލިކޭޝަންތައް އިވެލުއޭޓްކޮށް، ޝޯޓްލިސްޓް ކުރެވޭ ފަރާތްތަކާ އިންޓަވިއު ކުރުމަށް ފަހުއެވެ. އަދި ޝޯޓްލިސްޓް ކުރެވޭ ނަންތައް އަހަރީ އާންމު ޖަލްސާ އަށް ހުށަހަޅައި އެ ނަންތަކަށް ވޯޓަށް އެހުމަށް ވަނީ ހަމަޖެހިފައެވެ.