ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމުގެ ކުރިއަށް ވިދާޅުވަމުން ގެންގެދެވީ ނޫސްވެރިންނާ ގާތުން މަސައްކަތް ކުރައްވާނެ ވާހަކަ އެވެ. ސިއްރުން އެއް ވެސް މަސައްކަތެއް ނުކުރައްވާނެ ވާހަކަ އެވެ. ރައްޔިތުންނަށް ފޮރުވައިގެން ކަމެއް ކުރަންވެއްޖެއްޔާ ގައުމަށް ހަމަޖެހުމެއް ނާންނާނެ ވާހަކަ އެވެ. ނޫސްވެރިންނަށް ކަމެއް ނޭނގިގެން އުޅެން ޖެހުނަ ނުދޭނެ ވާހަކަ އެވެ. ގިނައިން މީޑިއާތަކާ ބައްދަލުކުރައްވާނެ ވާހަކަ އެވެ.

ފާޅުކަން ބޮޑު ސަރުކާރެއް ގާއިމުކުރެއްވުމުގެ ވައުދާއެކު ވެރިކަމަށް ވަޑައިގަތުމަށް ފަހު މިދެންނެވި ހުރިހާ ވާހަކައެއްވީ "ސަޅި ބައިސާ" އަށެވެ. ވެރިކަމަށް ވަޑައިގަތުމަށްފަހު ޑރ. މުއިއްޒު އެންމެ ފުރަތަމަ "ހިތާނުވާ" އެއް ބަޔަކަށް ނޫސްވެރިންވި އެވެ. ނަތީޖާއެއްގެ ގޮތުން ނޫސްވެރިން "ތަޅު ލުމަށް" ނޫސްތަކާއި ޓީވީ ތަކާއި، ނޫސްވެރިން ޖޫރިމަނާ ކުރެވޭ ގޮތަށް ސަރުކާރުގެ ފަރާތުން، ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރު ލައްވާ ރައްޔިތުންގެ މަޖިލީހަށް ބިލެއް ހުށަހަޅުއްވައިގެން ފާސްކުރަން އުޅުއްވީ ނޫސްވެރިކަމަށް ނުރައްކާތެރި ބިލެކެވެ. އެކަން ކާމިޔާބު ނުވުމުން ވަކިވަކި ނޫސްތަކަށް ޓާގެޓް ކޮށް "އަދަބު" ދޭން ފެށި އެވެ.

އެގޮތުން ސަރުކާރަށް ފާޑުކިޔައި ހަބަރާއި ލިޔުންތައް ގެނެސްދެމުންދިޔަ "ދިޔަވަރު" އަދި "ކުރުސީ"ގެ އިތުރުން ރަޖިސްޓްރީކޮށްގެން ހިންގާ "ފުރަތަމަ" ބްލޮކް ކުރި އެވެ. ވިދާޅުވީ ކޮންމެ ވެބްސައިޓަކީ ނޫހެއް ނޫން ކަމަށެވެ.

މިކަމާއި ނޫސްވެރިން ހިމޭން އިހްތިޖާޖެއްކުރުމުން ގޮތް ދޫކޮށް ސަރުކާރުގެ އެއްވެސް އޮފީހެއްގައި ފޮރުވާނެ ކަމެއް ނުބާއްވާނެ ކަމަށް ވިދާޅުވަމުން ވެރިކަމަށް ވަޑައިގެންނެވި މީހުން ފަހަތަށް ޖެހުނެވެ. ދެން ފެށީ ސަރުކާރުގެ އޮފީސްތަކުން ކުންފުނިތަކުން ނޫސްވެރިންނަށް މައުލޫމާތު ނުދިނުމުގެ ސަގާފަތެކެވެ. އެއްބަސްވުންތަކާއި މަސްރޫއުތަކުގެ ލިޔެކިޔުން ސިއްރު ކުރަން ފެށިއެވެ. ސަރުކާރުގެ ބޮޑު ސިއްރަކަށް ބޭރުގެ ދަތުރުތަކާއި ސިޓީ ބިޓީތައް ވާން ފެށި އެވެ. އާރުޓީއައި ތަކަށް ޖަވާބު ދޭން ދެކޮޅު ހެއްދެވި އެވެ. ދައުލަތުގެ ހަތަރު ވަނަ ބާރު ނެތިކޮށްލަން ސަރުކާރަކަށް ކުރެވޭނެ ހުރިހާ ކަމެއް ސިއްރާ ފާޅުގައިފެށި އެވެ.

މި ސަރުކާރުގެ ސަބަބުން ރައްޔިތުންނަށް މައުލޫމާތު ފޯރުކޮށްދިނުމުގައި ނޫސްވެރިންނަށް ކުރިމަތިލާން މިޖެހުނީ ވަރަށް ދަތި އުނދަގޫ ދުވަސްތަކެކެވެ. ނަތީޖާއަކީ ނޫސްވެރިކަމުގެ އިންޑެކްސްގައި ރާއްޖެ ފަހަތަށް ސޮއްސާލުމެވެ. ކޮރަޕްޝަނާއި ފަސާދައިގެ އެތައް ކަމެއް ސަރުކާރުގެ ތެރެއިން ފެންމަތިވަމުން ދާންފެށުމެވެ. އެކަންކަން ރިޕޯޓްކުރުން ހުއްޓުވުމަށް ދެން ޖެއްސެވީ އަދި މާ ގޯސް "ކުޅި" އެކެވެ.

ރިޔާސީ ކެމްޕޭނުގައި މީޑިއާތަކާއި ނޫސްވެރިންނާ ގާތުން މަސައްކަތް ކުރައްވާނެ ކަމަށް ވިދާޅުވި ނަމަވެސް ނޫސްވެރިންނަށް ފިއްލަވާ ހުރެގެން ރައީސް އޮފީހުގެ މިނިސްޓަރެއް ލައްވާ ނޫސްވެރިންގެ "ވެރިން" ނަށް ގުޅާ ދަތި ކުރަން ފެށި އެވެ. ނޫސް މަޖައްލާތަކަށް ލިބެމުން އަންނަ އިސްތިހާރުތަކަށް އަތް ބާނަން ފެށި އެވެ. އަދި ސަރުކާރުން ރުހޭ ގޮތަށް ޅެން ފަރިހި ހަދައިގެން ނުގެނެސްދޭ ތަންތަނުގެ އިސްތިހާރު ކަޑާލުމަށް ސަރުކާރުގެ ކުންފުނިތަކަށް އަންގާ ރައީސް އޮފީހުން ރުހޭ ބަޔަކަށް "ފައިސާ ބަހަން" ފެށި އެވެ.

މީގެއިތުރުން ޕްރެސް ކޮންފަރެންސްތަކުގައި ސުވާލުކުރުން މަނާކުރުމާއި ވަކި މައުލޫއުއަކާ ގުޅޭ ގޮތަށް އެކަނި ސުވާލުކުރަން ނޫސް އެޖެންސީތަކަށް ޝަރުތުކުރި އެވެ. ފްލެޓް ދިނުމާ ބެހޭގޮތުން ހައުސިން މިނިސްޓަރު ނިއުސް ކޮންފަރެންސެއް ބޭއްވިޔަސް ހަމަ އެފަދަ އެވެ. ނޫމަޑި ވާހަކަ ދެއްކުން އަދި މުޅިންހެން ހުއްޓުވާލި އެވެ. ފަހުން ހޯދާ ލާފާ ޖަވާބު ދޭން ހުރި ސުވާލުތައް ގިނަކުރަން ފެށި އެވެ. މައުލޫއާއި ނުގުޅޭ ސުވާލުތައް ކަމަށް ބުނެ ޖަވާބުދާރީންވާން އުޒުރުވެރިވާން ފެށި އެވެ. މި ތަންތަނަށް ދާ ނޫސްވެރިން ހިތްހަމަނުޖެހުންތައް ފިއްތާލައިގެން އެނބުރި ދަނީ އެވެ. ދައުލަތުގެ މައްޗަށް ފާރަވެރިވުމުގެ ޒިންމާ އޮތް "މިނިވަން މީޑިއާ" ރައީސް އޮފީހުގެ ވަތްގަޑަކަށް ބަދަލުކޮށް ރައްޔިތުންގެ އަޑު ކަޑުވާލި އެވެ.

ރައީސް ޑރ. މުއިއްޒު އެވެ. ގާނޫނުއަސާސީ އާއި ރާއްޖެ ބައިވެރިވެފައިވާ މުއާހަދާތަކުން ކަށަވަރުކޮށްދީފައިވާ ހިޔާލުފާޅުކުރުމުގެ މިނިވަންކަމަށް ހުރަސްތިޔަ އަޅުއްވަނީ ކީއްވެ ހެއްޔެވެ.؟ ނޫސްވެރިންނަކީ ބުދުތަކެއް ހެން ގޮނޑިތަކެއްގައި ބައިތިއްބައިގެން ސަރުކާރުން ދައްކަން ބޭނުންވާ ވާހަކައެއް ދައްކާފައި ފޮނުވާލަން ތިބޭ ބަޔަކަށް ތިޔަ ހެއްދެވީ ކީއްވެ ހެއްޔެވެ.؟

ރައީސް އެވެ. ނޫސްވެރިންގެ ސުވާލުތަކާ ކުރިމަތިލެއްވުމަށް ނޫސްވެރިންގެ ބައްދަލުވުމެއްގައި މަނިކުފާނު އެންމެ ފަހުން ބައިވެރިވެވަޑައިގެންނެވީ 2023 ވަނަ އަހަރުގެ ޑިސެމްބަރު މަހުގެ 5 ވަނަ ދުވަހުގައި އެވެ. މީޑިއާއާ ކުރިމަތިލާނެ ގޮތް ނޭނގެންޏާ ނުވަތަ ނޫސްވެރިން ސުވާލުތަކަށް ޖަވާބު ދެވޭ ފެންވަރު ނެތިއްޔާ އެ ގާބިލްކަން ހޯދަންވީ އެވެ. މީޑިއާގެ ދައުރާއި ނޫސްވެރިންގެ ޒިންމާ އަށް ހުރަސް އަޅަންވީއެއް ނޫނެވެ.

ރައީސް އެވެ. ނޫސްވެރިންނަކީ "ދުޝްމަނެއް" ކަމަށް ކަނޑައަޅުއްވައި ގެން މަނިކުފާނު ނޫސްވެރިންނާ ބައްދަލުނުކުރާތާ 459 ދުވަސް މިއަދަށް ވީ އެވެ. ފޮރުވަން ކަމެއް އޮތީ ހެއްޔެވެ..؟