ރައްޔިތުން މަޖިލިސް މެމްބަރުންނަކީ ރައްޔިތުންގެ ހައްގުގައި ވަކާލާތު ކުރާ ބަޔަކަށް ވާން ޖެހޭނެ ކަމަށް ރައީސް ޔާމީން އަލަށް އުފައްދަވާ ޕާޓީ ޕީޕަލްސް ނެޝެނަލް ފްރޮންޓް (ޕީއެންއެފް) ގެ ފަރާތުން މަޖިލިސް އިންތިހާބުގައި މެދު ހެންވޭރު ދާއިރާއަށް ވާދަކުރައްވާ ހަލީމަތް ޒުހައިރާ ވިދާޅުވެއްޖެއެވެ.

ހަލީމަތު މިފަދައިން ވިދާޅުވެފައި ވަނީ ޗެނަލް 13 އިން ހޯމަ ދުވަހުގެރޭ ގެނަސްދިން ޕީއެންއެފް އަދާހަމަ ޕްރޮގްރާމްގައި ވާހަކަ ދައްކަވަމުންނެވެ.

ހަލީމަތު ވިދާޅުވީ ރައްޔިތުން މަޖިލިސް މެމްބަރުންނަކީ ރައްޔިތުންގެ ހައްގުގާ ވަކާލާތު ކުރާ ބަޔަކަށް ވާންޖެހޭނެ ކަމަށާ އެއީ އެބޭފުޅުންގެ ބޮލުގައި އެޅިފައިވާ ޒިންމާއެއް ކަމަށެވެ.

މީގެ އިތުރުން ހަލީމަތު ވިދާޅުވީ އެމީހުންނަށް ވޯޓު ލަނީ ސަރުކާރުގެ ޑެޕިއުތީންނާ ކެބިނެޓު މިނިސްޓަރުންނެއް ނޫން ކަމަށާއި އެ ބޭފުޅުންނަށް ވޯޓުލަނީ އެ ދާއިރާއެއްގެ ރައްޔިތުން ކަމަށެވެ. އެހެންކަމުން އެދާއިރާއެއްގެ ރައްޔިތުންގެ އިތުބާރު ހިފެހެއްޓުމާ، ދާއިރާގެ ރައްޔިތުންނަށް ކޮށްދެންޖެހޭ ހިދުމަތްތައް އަދާކުރުމަކީ އެ މެމްބަރެއްގެ ބޮލުގައި އެޅިފައިވާ ޒިންމާ އެއް ކަމަށް ވެސް ހަލީމަތު ވަނީ ވިދާޅުވެފައެވެ.

މީގެ އިތުރުން ހަލީމަތު ވިދާޅުވީ ބޮލުގައި އެޅިފައިވާ ޒިންމާތައް އަދާނުކުރެވޭ ކަމުގައި ވާނަމަ އެ މެމްބަރުން އޮންނާނީ ގޭގަ ކަމަށާއި އޭރުން އެއްވެސް ރައްޔިތަކު ވެސް ނުރުހުން ފާޅު ނުކުރާނެ ކަމަށެވެ.

ކޮންމެ ކަމެއް ކުރަން މަޖިލިސް މެމްބަރުން ކައިރީ އާދޭސް ކުރާ އުސޫލް މި ދިވެހި ރާއްޖެއިން ނައްތާލަން ޖެހޭ ކަމަށް ވެސް ހަލީމަތު ވަނީ ވިދާޅުވެފައެވެ.

ކޮންމެ ދިވެހި ރައްޔިތަކީ އަސާންދައާ، ތައުލިމާ އަދި ބޯހިޔާވަހިކަން ލިބެން ޖެހޭނެ މީހެއް ކަމަށާއި މިކަންކަން ހޯދަން ޖެހޭނެ މެމްބަރު ކައިރިއަށް ނުނީ ކައުންސިލަރެއް ކައިރިއަށް ގޮސްގެން ނޫން ކަމަށް ވެސް ހަލީމަތު ވަނީ ވިދާޅުވެފައެވެ.

ހަލީމަތު ވިދާޅުވީ އެމީހެއްގެ ހައްގުތައް ހޯދުމަށް އަޑުއުފުލަން ޖެހޭނީ އެމީހަކު އަމިއްލައަށް ކަމަށާއި މެމްބަރުން ކައިރީ އާދޭސް ކުރުން މި ދިވެހި ރާއްޖެއިން ނައްތާލަން ޖެހޭ ކަމަށެވެ.