ރައީސް އަބްދުﷲ ޔާމީން އަބްދުލްގައްޔޫމް މިނިވަން ކުރުމަށް ގޮވާލާ ޕީޕީއެމް/ޕީއެންސީ ގެ އާންމު މެމްބަރުން މުޒާހަރާކުރި އިރު ކޯލިޝަންގެ ލީޑަރުން ތިއްބެވީ ޕާޓީ އޮފީހުގައި ނޫޑުލިސް ކާންކަމަށް ޕީއެންއެފް ގެ ފަރާތުން މެދު ހެންވެއިރު ދާއިރާއަށް ވާދަކުރައްވާ ކެންޑިޑޭޓް ހަލީމަތު ޒުހައިރާ ވިދާޅުވެއްޖެއެވެ.
ހަލީމަތު މިފަދައިން ވިދާޅުވެފައިވަނީ ޗެނަލް 13 އިން ގެނެސްދޭ ޕީއެންއެފްގެ މަސައްކަތުގެ އަދާހަމަ ލައިވްގައި ވާހަކަދައްކަވަމުންނެވެ.
އެގޮތުން ހަލީމަތު ވިދާޅުވީ މުޒާހަރާގައި އެންމެ ކުރީ ސަފުގައި ތިބި ގިނަ ފަރާތްތަކަށް ސިޓީ ކައުންސިލުން ވަޒީފާތައް ދީ މުޒާހަރާ އަށް ނުނިކުމެވޭ ގޮތް އޭރު މާލެ ސިޓީ ކައުންސިލްގެ މޭޔާރ އަދި އަދުގެ ރައީސް ޑރ.މުހައްމަދު މުއިއްޒު ހެއްދެވިކަމަށެވެ.
މުޒާހަރާ ކުރިޔަށްދާ ގަޑިތަކުގައި ލީޑަރޝިޕްގެ ބޭފުޅުން ޕާޓީ އޮފީހުގެ ފުރަތަމަ ފަންގިފިލާގައި ނޫޑުލިސް ކެއުމާ ދުފުމުގައި އަވަދިނެތި އުޅުއްވާކަމަށް ހަލީމަތު ވިދާޅުވިއެވެ.
ސަރުކާރުގެ އިސް ފަޑީގައި މިއަދު ހުންނެވި ވަރަށް އިސްބޭފުޅެއް އޭރު މުޒާހަރާތަކަށް ނިކުންނަ އަންހެން ކަނބަލުން ރައީސް ޔާމީންގެ ހައްގުގައި ތެޅި މަރުވެގެން އައިސްދާނެ ނޫންހޭ ވިދާޅުވިކަމަށްވެސް ހަލީމާތު ވަނީ ވިދާޅުވެފައެވެ.
އޭގެއިތުރުން މުޒާހަރާ ކުރިޔަށް ދާއިރު ހައްޔަރު ކުރަންވީ މުޒާހަރާގެ ބައިވެރިންގެ ލިސްޓް ވެސް ފުލުހުންނަށް ފޮނުވާ ހެދީ ލީޑަޝިޕްގެ ބޭފުޅުންކަމަށް ވިދާލުވެ ހަލީމަތު ވަނީ ހަގީގަތް ހާމަކޮށްދެއްވާފައެވެ.
ރައީސް ޔާމިންގެ ހައްގުގައި މުޒާހަރާ ކުރި ފަރާތްތަކުގެ އަޑު ކަނޑާލެވޭތޯ ލީޑަޝިޕުން އެތައް ފަހަރެއްގެ މަތިން މަސައްކަތް ކުރިކަމަށްވެސް ހަލީމަތު ވަނީ ވިދާޅުވެފައެވެ.
ލީޑަޝިޕްގެ ބޭފުޅުން ދެއްކުންތެރިކަމަށް މުޒާހަރާތަކުގައި ބައެއް ރޭރޭ ބައިވެރިވި އިރު އާދަމް ޝަރީފް ކޮންމެ ރެޔަކުވެސް ބައިވެރިވެފައިވާ ކަމަށް ވިދާޅުވެ ހަލީމަތު ވަނީ އެމަނިކުފާނަށް ޝުކުރު އަދާކޮށްފައެވެ.
މަޑުމަޑުން ލީޑަޝިޕުން ބޭފުޅުންވެސް ނުފެންނަން ފެށީ،މިތާ މަތީގައި ތިއްބަވާ، މިތާގައި ނޫޑުލިސް ގަނޑު ކެއުމާ،މިތާގަ ދުފުމާ، ހުރިހާކަމެއް. ހަމަ ވަޑައިގަންނަވާނެ ހުރިހާ ބޭފުޅުން ރާސްލާ ސިޑީން، އިށީންނަވާ ތިއްބަވާނެ މިތާ އެތެރޭގައި،
ހަލީމަތު ޒުހައިރާ
އޭގެއިތުރުން ހަލީމަތު ވިދާޅުވީ ރައީސް ޔާމީން ދާދި ފަހުން ޖަލްސާގައި މުޒާހަރާތައް ފަނޑުކޮށް ގެންދިޔަކަމަށް ވިދާޅުވީ ލީޑަޝިޕަށް ކަމަށެވެ. އާންމު މެމްބަރުންނަށް ނޫންކަމަށް ހަލީމަތު ވިދާޅުވިއެވެ.
ރައީސް ޔާމިނަށްޓަކައި އަޑު އުފުލީ އާންމު މެމްބަރުން ކަމަށް ހަލީމަތު ވިދާޅުވެ ޕީޕީއެމް/ޕީއެންސީގެ ލީޑަޝިޕަށް ފާޑުކިޔުން އަމާޒުކުރެއްވިއެވެ.
