މަލީހު ހައި ކޯޓު ކައިރީގައި ނޫސްވެރިންނާ ވާހަކަ ދައްކަނީ / ޝާވިން | ތޭރަ އިމޭޖްސް
ސިޔާސީ
އުއްތަމަ ފަނޑިޔާރަކީ ދަތް ނެތް ސިންގާއެއް: މަލީހު
Mariyam Isaadha
މަރިޔަމް އިސާދާ
07 މާރިޗު 2025
މާލެ ސިޓީ

އުއްތަމަ ފަނޑިޔާރު އަލްއުސްތާޛު މުއޫތަސިމް އަދުނާނަކީ ދަތް ނެތް ސިންގާއެއް ކަމަށް ޕީޕަލްސް ނެޝަނަލް ފްރޮންޓް (ޕީއެންއެފް)ގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.

މަލީހު މިފަދައިން ވިދާޅުވީ އުކްސްގައި ކުރެއްވި ޕޯސްޓެއްގައެވެ. އެގޮތުން ސަރުކާރުން ޖުޑިޝިއަރީއަށް ނުފޫޒު ފޯރުވަމުންދާ ކަން ދޭހަވާފަދަ އަމަލުތަކެއް ވެރިންގެ ކިބައިން ފެންނަމުންދާ ދަނޑިވަޅެއްގައި އެކަމަށް އިޝާރާތްކުރައްވާ މަލީހު ކުރެއްވި ޕޯސްޓުގައި ވިދާޅުވީ، ސުޕްރީމް ކޮށާ ކުދިކުދިކޮށް ކާޅަށް ކާންދޭއިރު އުއްތަމަ ފަނޑިޔާރު މުއުތަސިމު ކަހާތަން ހިރުވާވެސް ނުލައްވާ ކަމަށެވެ.

ސުޕްރީމް ކޯޓުގެ ފަނޑިޔާރުންގެ އިންސާފަށް އެދި ސަލާން ޖަހަމުންދާއިރު އެ ފަނޑިޔާރުންގެ ހައްގުތައް ރައްކާތެރިކޮށް އެ ފަނޑިޔާރުންނަށް އިންސާފު ޔަގީންކޮށްދިނުމަކީ އެ ފަނޑިޔާރުންގެ ފަރާތުން އުއްތަމަ ފަނޑިޔާރާ މަތިވެފައިވާ ޒިންމާއެއްކަން ފާހަގަކޮށް މަލީހު ވިދާޅުވެފައިވަނީ ނަމަވެސް ފެނިގެން ދަނީ އުއްތަމަ ފަނޑިޔާރު އާރެއް ބާރެއް ނެތި މަގާމުގައި ހުންނަވާ މަންޒަރު ކަމަށާ އެގޮތުން މިއަދު އުއްތަމަ ފަނޑިޔާރު ސިފަކުރެވެނީ ދަތް ނެތް ސިންގާއެއްގެ ގޮތުގައި ކަމަށްވެސް މަލހު ވިދާޅުވިއެވެ. މަލީހުވަނީ އިސްތިއުފާ ދެއްވަންޖެހެނީ އުއްތަމަ ފަނޑިޔާރު ކަމަށް ވެސް ވިދާޅުވެފައެވެ.

އުއްތަމަ ފަނޑިޔާރުގެ އިސްތިއުފާގެ އަޑު ގަދަވެފައި މިވަނީ ދުސްތޫރީ މައްސަލައެއް ސުޕްރީމު ކޯޓުގައި އޮއްވާ އެ ކޯޓުގެ 3 ފަނޑިޔާރުން ކުއްލި ގޮތަކަށް ޖޭއެސްސީއިން ސަސްޕެންޑްކޮށް ދުސްތޫރީ މައްސަލަ ހުއްޓުމަކަށް ގެނެސްފައިވާއިރުވެސް އެމަނިކުފާނު ބަސްފުޅެއް ވެސް ވިދާޅުނުވެ ހުންނަވާތީއާ އެކުއެވެ. އަދި އުއްތަމަ ފަނޑިޔާރު މަޖިލީހުގެ ނައިބު ރައީސްއާ ސިއްރިޔާތުގައި ރޯޔަލް އައިލެންޑްގައި ބައްދލުކުރިކަމުގެ އަޑުތައްވެސް ފެތުރިފައިވެއެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved