އަލީ ހުސެއިން / ތޭރަ އޮންލައިން
ސިޔާސީ
އުޝާމްއަކީ މަސްލަހަތު ފުށު އަރުވާ ބޭފުޅެއް: އަލީ ހުސެއިން
Mariyam Isaadha
މަރިޔަމް އިސާދާ
07 މާރިޗު 2025
މާލެ ސިޓީ

ބަންޑާރަ ނައިބު އަލްއުސްތާޛު އަހުމަދު އުޝާމްއަކީ ސުޕްރީމް ކޯޓުގެ ބާރުތައް ފުނޑާލާ، މަސްލަހަތު ފުށު އަރާ ފަދަ ގޮތަކަށް އަމަލުކުރައްވާ ބޭފުޅެއް ކަމަށް ކެންދޫ ދާއިރާގެ ކުރީގެ މެމްބަރު އަލްއުސްތާޛު އަލީ ހުސެއިން ވިދާޅުވެއްޖެއެވެ.

އަލީ މިފަދައިން ވިދާޅުވީ، އޭނާގެ ފަރާތުން ސުޕްރީމު ކޯޓަށް ހުށަހަޅާފައިވާ ދުސްތޫރީ މައްސަލައިގައި ޖަވާބުދާރީވާން ޖެހޭ މުއްދަތުގެ ތެރޭގައި އޭޖީގެ ފަރާތުން އެ ކޯޓަށް ޖަވާބުދާރީވެވަޑައިގެންފައިނުވާތީ އެކަމާ ގުޅިގެން އޮންލައިން ނޫހަކަށް ދިން އިންޓަރވިއުއެއްގައެވެ.

އަލީ ވިދާޅުވީ، ހުރިހާ ގޮތަކުން ބެލިއަސް ނިމިދިޔަ ބުރާސްފަތި ދުވަހަށް ސުޕްރީމް ކޯޓުން ދިން މުއްދަތު ހަމަވާ ކަމަށާ ސުޕްރީމް ކޯޓުން އޭޖީ އޮފީހަށް ޖަވާބުދާރީ ވާން ދިން މުއްދަތު ބުރާސްފަތި ދުވަހުގެ ރަސްމީ ގަޑިއަށް ހަމަވާނެ ކަމަށެވެ.

މާލޭގައި ފެން ބޮޑުވުމާއި ގުޅިގެން މިދިޔަ ހަފްތާގެ ތެރޭގައި އެއް ދުވަސް ސަރުކާރު ބަންދު ކުރި ނަމަވެސް އެ ދުވަހަކީ އެއީ ކަލަންޑަރުގައި ބަންދު ދުވަހެއްގެ ގޮތުގައި ނުހިމެނޭކަން އަލީ ހުސެއިން ވަނީ ފާހަގަކުރައްވާފައެވެ. އެހެންކަމުން އެ ދުވަހަކީ ރަސްމީ ބަންދު ދުވަހެއްގެ ގޮތުގައި ގުނޭނެ ދުވަހެއް ނޫން ކަން ފާހަގަކުރައްވާ އަލީ އިތުރަށް ވިދާޅުވީ އޭޖީ އެ ޒާތުގެ ކަމެއް ކުރެއްވުމަކީ ވަރަށް ޒިންމާދާރުކަމެއް ނެތް ކަމެއް ކަަމަށެވެ. އަދި ވެސް ކޯޓަށް އޭޖީ ޖަވާބުދާރީ ވެވަޑައިގެންފައި ނުވާ ކަމަށް އޭނާ ވަނީ ވިދާޅުވެފައެވެ.

ސުޕްރީމް ކޯޓުން ޕްރެކްޓިސް ގައިޑް ލައިން ބުނާ ގޮތުން، ޖަވާބުދާރީ ވުމަށް ދޭ މުއްދަތު 7 ދުވަހަށް ވުރެ އިތުރުވާ ނަމަ އެ ހާލަތުގައި ރަސްމީ ބަންދު ދުވަސްތައް ހިމަނަން ނުޖެހޭކަން ފާހަގަކުރައްވާ އަލީ ވަނީ އެހެންކަމުން އެ އުސޫލާއި އެއްގޮތަށް ބަލާ އިރު، އެޓާނީ ޖެނެރަލްއަށް ދިން މުއްދަތުގެ ތެރޭގައި ޖަވާބުދާރީ ވެފައި ނުވުން ކަމަށް އޭނާ ވިދާޅުވިއެވެ.

އަލީ ހުސެއިން ވިދާޅުވީ އެ ނޫން ގޮތަކަށް އޭޖީ އުޝާމް އަމަލުކުރައްވާފާނެ ކަމަށް އުއްމީދު ވެސް ނުކުރައްވާ ކަމަށެވެ. ސަބަބެއް ކަމަށް އަލީ ހުސެއިން ފާހަގަކުރެއްވީ ސުޕްރީމް ކޯޓުގެ ބާރުތައް ފުނޑާލާ، މަސްލަހަތު ފުށު އަރާ ފަދަ ގޮތަކަށް އަމަލުކުރައްވާ ބޭފުޅަކަށް އޭޖީ އުޝާމް ވުމެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒު އާއި ގުޅިވަޑައިގެން ސުޕްރީމް ކޯޓުގައި ތަޅު އަޅުވާފައި ނުކުމެ އޭޖީ ދައްކާ ވާހަކައިގެ އެއްވެސް ބަރުދަނެއް ހުންނާނެ ކަމަށް މިހާރު ޤަބޫލު ނުކުރައްވާ ކަމަށް ވެސް އަލީ ވަނީ ވިދާޅުވެފައެވެ.

ސުޕްރީމު ކޯޓަށް ޖަވާބުދާރީ އޭޖީއިން ނުވާތީ އަލީގެ ފަރާތުން ސުޕްރީމު ކޯޓަށް އޭޖީ އުޝާމްގެ މައްސަލައެއް ހުށަހަޅާފައިވެސް ވެއެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved