ދާދި ފަހުން އަޅުގަނޑުމެންނަށް އަޑުއިވިގެން ދިޔައީ ކުރިއަށް އޮތް 3 މަހު ރާއްޖެއަށް އިގްތިސޯދީ ގޮތުން ދަތިވާނެ ކަމަށް ރައީސް ޑރ މުއިއްޒު ވިދާޅުވި ވާހަކައެވެ. އެގޮތުން ތ. އަތޮޅަށް އެންމެ ފަހުން ކުރެއްވި ދަތުރުފުޅުގައި ޑރ މުއިއްޒު ބުނުއްވީ އިގްތިސޯދީ ގޮތުން ދަތިތަކާ ކުރިމަތި ލާން ޖެހިފައިވާތީ މަޝްރޫތައް ބަހާލައިގެން ކުރިއަށް ގެންދަން ޖެހިފައިވާ ވަހަކައެވެ. ދެން ވިދާޅުވީ އިގްތިސޯދީ ހާލަތަށް ނުބަލާ ކަޑަޖަހާ ވެރިއަކަށް ނުވާނެ ކަމަށެވެ. މި ވާހަކަތައް މީ ތ އަތޮޅު ގުރައިދޫ އަށާއި ދިޔަމިގިލި އަށް ގޮސް ދެއްކެވި ވާހަކަތަކެވެ.

މިފަދައިން މިވާހަކަތައް އައީމަ އެރަށްރަށުގެ ރައްޔިތުން ތިބީ އެހާމެ އުފަލުންނެވެ. ރައްޔިތުންނަށް ހީވީ ޑރ މުއިއްޒު އެއްވެސް ކަމެއް ރައްޔިތުންނަށް ނުފޮރުވާ ހެންނެވެ.

އެހެން ނަމަވެސް މި ހީވުން ބަދަލު ވާކަށް މާގިނަ ވަގުތެއް ނުނެގި އެވެ. އެ ދެ ރަށުގަ ދެއްކި ވާހަކައިގެ ރާގު މާގިނަ އިރުތަކެއް ނުވެ ބަދަލުކވެއްޖެއެވެ.

ގުރައިދޫގައި ހުންނަވާ ހުރިހާ ކަމެއް ހަމަ މަގަށް އަޅުވައިގެން ނޫނީ ހަގީގީ މާނައެއްގައި ރައްޔިތުންނަށް ތަރައްގީ ނުގެނެސްދެވޭނެއޭ ވިދާޅުވި ބާރުމިނުގައި ގޮސް ދެން ވިދާޅުވީ ބަޖެޓުގައި ނެތަސް އެރަށުގައި އެއާޕޯޓު އެޅުމުގެ މަސައްކަތް މިއަހަރު ފައްޓާނެ ކަމަށެވެ. މީ ކިހާ ބޮޑު ޖޯކެއް ނޫންތޯއެވެ.

އިގްތިސޯދީ ގޮތުން ދަތިވާނެ އޭ ވިދާޅުވެ ޑރ މުއިއްޒު މި އުޅުއްވަނީ އަދިވެސް ބަޖެޓުގެ ބޭރުން ބޮޑެތި މަޝްރޫތައް ކުރިއަށް ގެންދިއުމުގައެވެ.

ދެން އޮތީ އަޅާނަމޭ ބުނި ޓަނެލްގެ ވާހަކައެވެ. އެވެސް ރައްޔިތުންގެ ލޯމައްޗަށް ދައްކާލި ދަޅައަކަށް ވެއްޖެއެވެ.

މީގެ ކުރިން ރަސްމާލެއާ މާލެއާ ދޭތެރެ އަޅާނަމޭ ބުނި ޓަނެލް ގެ ވާހަކަ ރިޔާސީ ބަޔާން އިއްވި ދުވަހު އެއީ ކުރަން ބުނި ކަމަކަށް ވެސް ނުވިއެވެ. ރިޔާސީ ބަޔާނުގައި އެހާ ބޮޑު މަޝްރޫއެއްގެ ވާހަކަ ނުދައްކާ ދޫކޮށްލެއްވި ސަބަބާއި މެދު ސުވާލު އުފެދެއެވެ. ކުރަން ވައުދުވެވަޑައިގެންނެވި ކަންކަން ނުވާނެ ހެން ހީވީމަ ދެން އެ ވާހަކަވެސް ނުދައްކާ ވާހަކައަކަށް މިއަދު ވެއްޖެއެވެ. މި ޓަނެލްގެ ވާހަކަ އެހަށް ބާއްވަމާ ހިނގާށެވެ.

އިގްދިސޯދީ ގޮތުން ދަތިތަކާ ދިވެހި ރާއްޖެ ކުރިމަތިލާ ވާހަކަ ދައްކަމުން އަންނަ އިރު ދެން އަޅުގަނޑުމެންނަށް އަޑުއިވިގެން ދިޔައީ ދުބާއިން ލޯނެއް ނަގަން އުޅޭ ވާހަކައެވެ. އިގްތޮސޯދީ ގޮތުން ދަތިވެފައިވާ އިރު އަދިވެސް ޑރ މުއިއްޒު މި އުޅުއްވަނީ ބޮޑެތި ލޯނު ތަކާއި ބަޖެޓުގެ ބެރުން މަޝްރޫތައް ހިންގުމުގައެވެ. މިއީތީ މިކަމަށް އޮތް އެންމެ އެދެވޭ ހައްލަކީ؟

މުޅިންވެސް މި ސަރުކާރުން މިއުޅެނީ ތާކުން ތާކުން ނުޖެހޭ ދޯހަޅި ކަންކަން ކުރުމުގައެވެ.

އަޑުގައި ހުރިބާރެއްލާ ކަޑަ ޖަހާ ވެރިއަކަށް ނުވާން ބުނި ވެރިޔާ ބަޖެޓަށް ބެލުމެއް ނެތި މިއަދު އެދަނީ ބާރު ސްޕީޑުގައި ކުރިއަށެވެ.