ދިރާގުން ބާއްވާ ގުޑި ފެސްޓުގެ ފުރަތަމަ ހަރަކާތް މިއަދު ބާއްވަން ނިންމައިިފިއެވެ.
މާލެ ސިޓީ ކައުންސިލާ ގުޅިގެން ބާއްވާ އެ ހަރަކާތް އޮންނާނީ އުސްފަސްގަނޑުގައި މިއަދު ހަވީރު 5:00 އިން 6:00 އަށެވެ. މީގެ އިތުރުން ހުޅުމާލެ އަދި އެހެން ރަށްރަށުގައި ރޯދަމަހުގެ އެކި ދުވަސްތަކުގައި ގުޑި ފެސްޓު އޮންނާނެކަން ދިރާގުންވަނީ ހާމަކޮށްފައެވެ.
މި ހަރަކާތުގައި ހުރިހާ އުމުރުފުރައެއްގެ ކުޑަކުދިންނަށް ބައިވެރިވެވޭނެ އެވެ. އަދި ހަރަކާތުގައި ބައިވެރިވާ ކުދިންނަށް ދިރާގުން ހިލޭ ގުޑިއެއް ވެސް ލިބޭނެއެވެ.
ދިރާގުން ބުނީ ގުޑިފެސްޓް އަކީ ރޯދަމަހު ދިވެހިންގެ މެދުގައި ޒަމާންވީ ސަގާފީ އާދަކާދައެއްގެ ގޮތުގައި އޮތް ގުޑި އެރުވުމުގެ ހަރަކާތަށް ކުޑަކުދިން އަހުލުވެރިކޮށް، އެ ސަގާފަތް ދިރުވުން ކަމަށެވެ.
ގުޑި ފެސްޓު ހަރަކާތް ފެށީ 2023 ވަނަ އަހަރު އެވެ.
