މިދިޔަ ސަރުކާރުގައި ޖޭއެސްސީ ކަމުނުގޮސްގެން ތަކުރާރުކޮށް އިސްލާހު ހުށަހެޅި މީހުންގެ މިހާރު އިސްލާހު ހުށަހެޅުމުގެ ހިތްވަރުވެސް ނެތް ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ބުރާސްފަތި ދުވަހުގެރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

އެގޮތުން އެމަނިކުފާނު އެރޭގެ ވާހަކަފުޅުގައި އެންމެ ބޮޑަށް އަލިއަޅުވާލެއްވީ މި ސަރުކާރުން ޖުޑިޝިއަރީއަށް ނުފޫޒު ފޯރުވަން ކުރަމުން ގެންދާ މަސައްކަތަކަށެވެ. ރައީސް ޔާމީން ވަނީ މިދިޔަ ސަރުކާރުގައި ޖޭއެސްސީގެ ތެރެއަށް ސަރުކާރުން އަތްބާނާ ޝަރީއަތްތަކާ ކުޅެ ފަނޑިޔާރުންނާ ބެހި ހެދި ކަމަށް ދައުވާ ކުރި މީހުން މިހާރު ތިބީ ވެރިކަމުގެ އިސް ފަޑީގައި ކަމަށް ވިދާޅުވެފައެވެ.

ނަމަވެސް މިއަދު، ކުރިން އެ ބޭފުޅުންނަށް ކަމު ނުގޮސްގެން އުޅުނު ޖޭއެސްސީގެ ކޮމްޕޮޒިޝަން ބަދަލުކޮށް އިސްލާހު ކުރަން މަސައްކަތެއް ކޮށްލަން ވެސް ނުކެރިގެން އުޅޭ ކަމާ އަދި އޭގެ ސަބަބާ މެދު ސުވާލު އުފައްދާވައިފައެވެ.

ރައީސް ޔާމީން ވަނީ މަހުބަދޫ ދާއިރާގެ މެމްބަރު އަހުމަދު ތޯރިގަށްވެސް މި ދައުރުގައި އެ ފަދަ އިސްލާހެއް ހުށަހަޅަން ނުކެރިގެން އުޅޭކަން ފާހަގަކުރައްވާފައެވެ.

ރައީސް ޔާމީން ވިދާޅުވީ، ޖޭއެސްސީ މިހާރުވެސް އެ ބޭނުންކުރަނީ ހަތިޔާރެއްގެ ގޮތުގައި ކަމަށެވެ.