

އެމްޑީޕީން ކުރި މުޒާހަރާއަކާ ގުޅިގެން މަކުނުދޫ ދާއިރާގެ ކުރީގެ މަޖިލިސް މެންބަރު މުހައްމަދު ރާއީއާއި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ ކުރީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) އަންނަ ހޮނިހިރު ދުވަހު ފުލުހަށް ހާޒިރުވާން ޗިޓު ފޮނުވައިފި އެވެ.
ރާއީ އާއި މޫކޭ އަކީ މުޒާހަރާތަކުގައި ލައުޑްސްޕީކަރުން ވާހަކަ ދައްކަވައި، ބައިވެރިން ގޮވައިގެން އެއްވުމުގައި އިސްކޮށް ހަރަކާތްތެރިވާ ދެ ބޭފުޅުންނެވެ.
ސަރުކާރާއި ދެކޮޅަށް މަގުވައްޗަށް އެއްވެ އިހްތިޖާޖު ކުރުމުން ސުވާލުކޮށް ބަޔާން ނަގަން ފުލުހަށް ހާޒިރުވުމަށް ރާއީ އާއި މޫސާ އަލިމިނަކަށް އަންގާފައިވަނީ މާދަމާ މެންދުރު 1 ޖަހާއިރަށެވެ. މާދަމާ މެންދުރު ގަލޮޅު ޕޮލިސް ސްޓޭޝަނަށް ހާޒިރުވާން އަންގައި ދެ ބޭފުޅުންނަށް ފޮނުވި ޗިޓުގައިވާ ގޮތުން، ފުލުހަށް ހާޒިރުކުރަނީ ސުލްހަވެރިކަމާއެކު އެއްވެ އުޅުމުގެ ގާނޫނާ ހިލާފުވުމުގެ ސަބަބުންނެވެ.
އާދިއްތަ ދުވަހުގެ ރޭ އެމްޑީޕީން މުޒާހަރާ ކުރީ އަލިކިލޭގެފާނު މަގުން ވަދެގެން، ރައީސްގެ ގެކޮޅު މުލިއާގެ ކައިރިއަށް ދިއުމަށެވެ. އެކަމަށް ހުރަސް އެޅި ފުލުހުންނާ މުޒާހަރާގެ ބައިވެރިންނާމެދު ހަމަނުޖެހުން ވެސް އެ ރޭ ހިނގައި، ފުލުހުން ވަނީ ބާރުގެ ބޭނުން ވެސް ކޮށްފަ އެވެ.
އެމްޑީޕީން ސިލްސިލާކޮށް ކުރަމުންދާ މުޒާހަރާތަކުގައި ގޮވާލަމުންދަނީ ސަރުކާރުން ސުޕްރީމް ކޯޓަށް ނުފޫޒު ފޯރުވުން ހުއްޓުވުމަށެވެ. އަދި އެ ޕާޓީގެ ވެރިކަމުގައި ތައާރަފުކުރި ގެދޮރުވެރިޔާ ސްކީމުން ފުލެޓު ލިބޭ މީހުންގެ ލިސްޓު މި ސަރުކާރުން މުރާޖާކުރި ގޮތާ ގުޅޭ ގޮތުން ވެސް ކަންބޮޑުވުން ފާޅުކޮށް، ސަރުކާރުގެ އިސް ވެރިންގެ އިސްތިއުފާއަށް ގޮވާލަމުންދެއެވެ.