މާލެއިން މީހަކު ގެއްލިގެން އޭނާ ހޯދަން އާންމުންގެ އެހީއަށް ފުލުހުން އެދިއްޖެ އެވެ.

ގެއްލިގެން ހޯދަމުންދަނީ އުމުރުން 31 އަހަރުގެ ހ. ބްލޫލޫން، ހައްވާ ހަސަންއެވެ.

އޭނާ ގެއްލުމާ ގުޅިގެން ފުލުހުން އާންމުކުރި މައުލޫމާތުގައި ވަނީ، ހައްވާ ހަސަން ގެއިން ދިޔަފަހުން ޚަބަރެއް ނުވެ، ވީނުވީއެއް ނޭނގި ގެއްލިގެން އާއިލާގެ ފަރާތުން ފުލުހުންނަށް މައްސަލަ ހުށަހަޅާފައިވަނީ މިދިޔަ ހޮނިހިރު ދުވަހު ކަމަށެވެ.

އެހެންވެ، އޭނާގެ ފޮޓޯ އާންމުކޮށް، އޭނާ ހޯދުމުގައި އާންމުންގެ އެހީއަށް ފުލުހުން ވަނީ އެދިފަ އެވެ.

ފުލުހުން ވަނީ އޭނާއާ ބެހޭ އެއްވެސް މައުލޫމާތެއް ލިބިފައިވާ ނަމަ މާފަންނު ޕޮލިސް އިންވެސްޓިގޭޝަންގެ ޑިއުޓީ ނަންބަރު 9660183 އަށް ގުޅައި އެ މައުލޫމާތު ހިއްސާކުރުމަށް އެދިފަ އެވެ.

އަންހެނަކު ގެއްލިގެން ހޯދަން އިއުލާނުކުރިއިރު، މިދިޔަ ހޮނިހިރު ދުވަހުން ފެށިގެން އާއިލާއަށް ހަބަރެއް ނުވާތީ ނ. މަނަދޫ، އަބްދުﷲ ޝިހާދު ހޯދުމުގެ މަސައްކަތް ވެސް ފުލުހުން ދަނީ ކުރަމުންނެވެ.

އޭނާ ވެސް ގެއްލުނީ މާލެއިން ކަމަށް ފުލުހުން ބުނެ އެވެ.