ސުޕްރީމް ކޯޓުގެ ފަނޑިިޔާރު އަލީ ރަޝީދަށް ބާރަށު ޝުޖާއު އިންޒާރުދިން ކަން އިނގޭތަ!.؟ / ސޯޝަލް މީޑިއާ
ހަބަރު, ސިޔާސީ
ސުޕްރީމް ކޯޓުގެ ފަނޑިިޔާރު އަލީ ރަޝީދަށް ބާރަށު ޝުޖާއު އިންޒާރުދިން ކަން އިނގޭތަ!.؟
Qudhrathullah Ameen
ގުދުރަތުﷲ އަމީން
14 މާރިޗު 2025
މާލެ ސިޓީ

ޕީޕީއެމް/ޕީއެންސީގެ ސަރުކާރެއްގައި ސުޕްރީމް ކޯޓުގެ ފަނޑިޔާރު އަލީ ރަޝީދު ޖަލަށް ލާނެ ކަމަށް ބުނެ ކުރިން ޕީއެންސީގެ ނައިބު ރައީސް މިހާރު ބާރަށު ދާއިރާގެ މެންބަރު އިބްރާހިމް ޝުޖާއު އިންޒާރު ދެއްވައިފި އެވެ.

މިފަދަ އިންޒާރެއް ޝުޖާއުގެ ފަރާތުން ސުޕްރީމް ކޯޓުގެ ފަނޑިޔާރު އަލީ ރަޝީދު އަށް އަމާޒުވީ ޕީޕީއެމް/ޕީއެންސީން 2020 ވަނަ އަހަރުގެ ނޮވެމްބަރު މަހު ބޭއްވި ނޫސްވެރިންގެ ބައްދަލުވުމެއްގައި އެވެ.

އެ ބައްދަލުވުމުގައި ޝުޖާއު ވިދާޅުވީ އެމީހުންގެ ވެރިކަމެއްގައި ފަނޑިޔާރު އަލީ ރަޝީދު އުމުރަށް ޖަލުގައި އޮންނަން ޖެހިވަޑައިގަންނަވާނެ ކަމަށެވެ.

ޝުޖާއުގެ މި އިންޒާރާއި ގުޅިގެން އެ އަހަރު ފަނޑިޔާރުންގެ ޖަމިއްޔާއިން ނެރުނު ބަޔާނެއްގައި ފަނޑިޔާރަކަށް އެހެން އިންޒާރު ދިނުމަކީ ކަންބޮޑުވާ ކަމެއް ކަމަށް ބުނެ ބަޔާނެއްވެސް ނެރުނެވެ. އަދި ކަމާ ބެހޭ އިދާރާތަކުން އެކަން ބަލައި ފިޔަވަޅު އަޅަން ވެސް ބަޔާނުގައި ގޮވާލި އެވެ.

ނަމަވެސް ކަމާ ބެހޭ އިދާރާތަކުން އެކަން ބެލިކަމެއް ސާފެއް ނުވެ އެވެ. ސާފުވާ ކަމަކީ ޝުޖާއު އެދުވަހު ވިދާޅުވި އޭނާގެ ބާރު ހިނގާ ސަރުކާރެއް އޮވެމެ ސުޕްރީމް ކޯޓުގެ ފަނޑިޔާރު އަލީ ރަޝީދު އެ އިންނެވީ "ޖަލެއް" ގައި ނޫން ކަމެވެ.

ފަނޑިޔާރު އަލީ ރަޝީދު އެ އިންނަވަނީ ސުޕްރީމް ކޯޓުގެ ބެންޗްގައި އެވެ. ޝަރީއަތުގެ އަޑުއެހުމަށް ވަޑައިނުގެން ރަސްމީ ގަޑީގައި "ޓެކްސީ ކުރައްވަން" އުޅުއްވާ ކަމަށް ވެސް އަޑު ފެތުރެ އެވެ.

ފަނޑިޔާރު އަލީ ރަޝީދަކީ މަނީ ލޯންޑަރިންގެ ކުށް ކުރީގެ ރައީސް އަބްދުﷲ ޔާމީންގެ މައްޗަށް ސާބިތުވި އިރު، ކްރިމިނަލް ކޯޓުގައި އެ ޝަރީއަތް ހިންގި ފަސް ފަނޑިޔާރުންގެ ބެންޗުގެ އިސް ފަނޑިޔާރެވެ.

އޭނާއަށް ސުޕްރީމް ކޯޓުގެ ބެންޗުން ޖާގަ ލިބިވަޑައިގަތީ، ރައީސް ޔާމީންގެ ޝަރީއަތަށް ފަހު، ކުއްލި ގޮތަކަށެވެ.

ސުޕްރީމް ކޯޓަށް ފަނޑިޔާރު އަލީ ރަޝީދު "ޖަމްޕު ޖެހީ" ގާބިލުކަމާއި ތަޖުރިބާ އަށް ބަލާފައި ނޫން ކަމަށާއި އެއީ އެ މަނިކުފާނުގެ މައްޗަށް ހުކުމް ކުރަން ކެރިވަޑައިގަތުމުން ލިބިވަޑައިގަތް މަގާމެއް ކަމަށް ރައީސް ޔާމީން އަންނަނީ ވިދާޅުވަމުން ނެވެ.

ކޮމެންޓު
ކޮމެންޓްތައް
Copyright © 2013-2025 Media Ring Pvt Ltd.
All rights reserved