ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު ޕީސީބީގެ ރައީސްކަމުގެ މަގާމަށް ފިނޭންސް މިނިސްޓްރީގެ ކުރީގެ ނައިބު މުޙައްމަދު އަނަސް އައްޔަން ކުރައްވައިފިއެވެ.

ޕީސީބީ އުފައްދާފައިވަނީ ދައުލަތުގެ ވިޔަފާރި ތަންތަން ޕްރައިވަޓައިޒް ކުރުމާއި ކޯޕަރަޓައިޒްކުރުމާއި އަދި މޮނިޓަރކޮށް އިވެލުއޭޓްކުރުމުގެ ޤާނޫނުގެ ދަށުންނެވެ.

އަނަސް މި މަގާމަށް އައްޔަން ކުރައްވާފައި މިވަނީ މި މަގާމުގައި ކުރިން ހުންނެވި ހަމްދީ އަގީލް މަގާމުން ވަކި ކުރުމާއި ގުޅިގެންނެވެ. އޭނާ ޕީސީބީގެ ރައީސަކަށް އައްޔަންކުރީ 2023 ވަނަ އަހަރުގެ ނޮވެމްބަރު މަހުގެ 22 ދުވަހެވެ. އަދި އޭނާ މަގާމުން ވަކި ކުރީ މިދިޔަ މަހުގެ 13 ވަނަ ދުވަހުއެވެ.

ޕީސީބީއަކީ ސަރުކާރުގެ ކުންފުނިތަކުގެ ބޯޑުތަކަށް މެންބަރުން އައްޔަންކުރުމުގެ އިތުރުން، އެ ކުންފުނިތަކުގެ އިސްވެރިން ވަކިކުރުމާއި އައްޔަންކުރުމުގެ ބާރު ލިބިގެންވާ މުހިންމު އިދާރާއެކެވެ.