ކުރިއަށް މިއޮތް ރައްޔިތުން މަޖިލިސް އިންތިހާބު ލަސްވުމާ ގުޅިގެން ދާއިރާތަކަށް ވާދަކުރައްވާ ކެނޑިޑޭޓުންގެ ފޯމު ހުށައެޅުމުގެ މުއްދަތު ފަސްކޮށް ދިނުމަށް ރައީސް ޔާމީން އަަލަށް އުފައްދަވާ ޕާޓީ ޕީޕަލްސް ނެޝެނަލް ފްރޮމްޓް ( ޕީއެންއެފް ) އުފެއްދެވުމުގައި އިސްކޮށް ހަރަކާތްތެރިވާ މުހައްމަދު މަލީހު ޖަމާލު ގޮވާލައިފިއެވެ.

މަލީހު މިފަދައިން ގޮވާލައިފާވަނީ ޕީއެންއެފްގެ ފަރާތުން ރައްޔިތުން މަޖިލިސް އިންތިހާބަށް ވާދަކުރައްވާ ކެންޑިޑޭޓުންގެ ފޯމުތައް އިލެކްޝަންއާ ހަވާލުކުރުމަށްފަހު މީޑިއާތަކަށް ދެއްވި ބަސްތީގަތުމެއްގައެވެ.

މަލީހު ވިދާޅުވީ ކުށުގެ ރެކޯޑު ސާފުކުރުމުގެ މަރުހާލާގައިވެސް ވަރަށް ގިން ގޮންޖެހުންތަކެއް އެބަހުރި ކަމަށެވެ.

އަދި މީގެ އިތުރުން މިހާރު އިންތިހާބުތަކާ ބެހޭ ގާނޫނަށް ރައްޔިތުންގެ މަޖިލީހުން އިސްލާހު ގެނަސްފައިވާއިރު ފައިލްކުރުމުގެ މުއްދަތު އިލެކްޝަން ކޮމިޝަނުން ފަސްކޮށްދޭ ޖެހޭ ކަމަށް މަލީހު ވަނީ ވިދާޅުވެފައެވެ.

މީގެ އިތުރުން މަލީހު ވިދާޅުވީ މިކަމުގައި މިހާރު އެއްވެސް ގާނޫނީ ހުރަހެއް ނެތް ކަމަށާ އެހެން ކަމުން މި މުއްދަތު އިތުރުކުރުމަށް ދަތިތަކާ ކުރިމަތި ނުވާނެ ކަމަށެވެ.

މަޖިލިސް އިންތިހާބު ރޯދައިގެ ފަހަށް ބޭއްވުމަށް ރައްޔިތުންގެ މަޖިލީހުން މިހާރު ވަނީ ފާސްކޮށްފައެވެ.