ރައީސް ޑރ މުހައްމަދު މުއިއްޒުގެ އިގްތިސޯދި ސިޔާސަތު ޕީޕަލްސް ނެޝަނަލް ފްރޮންޓު ޕީއެންއެފްގެ އިސް ސަފުގައި ހަރަކާތްތެރިވާ މުހައްމަދު އަހުމަދު ވަހީދު (ވައްޑެ)ގެ ފާޑުވިދާޅުވުން ސަރުކާރަށް އަމާޒުކުރައްވައިފިއެވެ.

ވައްޑެ މިފަދައިން ވިދާޅުވީ، ބުރާސްފަތި ދުވަހުގެރޭ ޕީއެންއެފުން ބޭއްވި ޖަލްސާގައި، ސްޕީކަރ މުހައްމަދު މަލީހު ރާއްޖޭގެ އިގްތިސޯދީ ހާލަތު ދުވަހަކަށް ވުރެ ދުވަހެއް ދަށަށް ދާތީ އެކަމަށް އިޝާރާތްކުރައްވާ ދެއްކެވި ވާހަކަތަކާ ގުޅުވާ އޯޑިއެންސްގައި އިންނަވާދެއްކެވި ވާހަކަައިގައެވެ.

އެގޮތުން ވައްޑެ ވިދާޅުވީ، މި ސަރުކާރުގެ އިގްތިސޯދީ ސިޔާސަތު ފެއިލްވެފައިވާ ކަމަށާ އެގޮތުން ރައީސް މުއިއްޒުގެ އިގްތިސޯދީ ސިޔާސަތެކޭ ކަންމަތީ ފިހާރައެއްގެ ވިކުރާއެކޭ ތަފާތެއް ނެތްކަމަށެވެ. އަދި ފައިސާ ޗާޕުކޮށް އިގްތިސޯދަށް އޮތް ހިރާސް އިތުރުކުރަން ސަރުކާރުން އަރުވާ ޖަހާފައިވާއިރު ގައުމުގެ ފިޒިކަލް ހާލަތުވެސް ރައީސް މުއިއްޒަށް އެނގިވަޑައިނުގަންނަވާ ކަމަށްވެސް ވައްޑެ ވިދާޅުވިއެވެ.

ވައްޑެ ވަނީ ސަރުކާރުން އިގްތިސޯދަށް ފައިސާ ވެއްދުމުގެ ނަމުގައި ފެށި ބަންކަރިންގެ މަޝްރޫއުވެސް ފްލޮޕުވެފައިވާކަން ފާހަގަކުރައްވާފައެވެ. އަދި އިގްތިސޯދީ ވަޒީރުވެސް ގައުމުގެ ހާލަތު ރައީސް މުއިއްޒަށް ސިއްރުކުރަމުންދާކަމުގެ ތުހުމަތު ވައްޑެ ކުރައްވާފައިވެއެވެ.

ވައްޑެ ވިދާޅުވީ މި ސަރުކާރުން އިގްތިސޯދު ރަގަޅުކުރަން ހަރުދަނާ ފިޔަވަޅެއް އަޅާ މަންޒަރު ނުފެންނަ ކަމަށާ ގައުމު މިއަދު ބަނދުރޫޓވުމާ ދިމާއަށް މިސްރާބު ޖަހާފައިވާއިރު ވެސް ސަރުކާރުގެ ބޭފުޅުންގެ ކަންބޮޑުވުމެއް ނެތީ އެއީ ކިހާވަރެއްގެ ކަމެއްކަން ވަޒަން ކޮށްލަން ވެސް އެބޭފުޅުންނަށް އެނގިވަޑައިނުގަންނަވާތީ ކަމަށެވެ.

ވައްޑެ މިފަދައިން ވިދާޅުވެފައިވާއިރު ދާދި ފަހުން ވެސް އައިއެމްއެފުން ވަނީ ރާއްޖޭގެ އިގްތިސޯދީ އިސްލާހީ ފިޔަވަޅުތައް އަވަސް ނުކޮށްފި ނަމަ ރާއްޖޭ ބަނގުރޫޓުވުމުގެ ފުރުސަތު އޮތްކަމުގެ އިންޒާރު ދީފައެވެ.