ދިވެހިރާއްޖޭގެ އިގްތިސޯދު އޮތީ ބޭރަށް ހިންގުން ޖެހިފައިކަމަށާ އެ ބަލި ހުއްޓުވުމަށް ވެރިން ތިބީ ނުކުޅެދިފައި ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ގައުމުގެ ދަރަނި މަތިވެ ދަރަނި ދެއްކޭނެ ފަހި ގޮތެއް ނެތި އިގްތިސޯދު އިނދަ ޖެހެމުންދާ ދިއުމާ ގުޅިގެން ކަންބޮޑުވުން ފާޅުކުރައްވާ ޕީއެންއެފް ޖަލްސާގައި ވާހަކަފުޅު ދައްކަވަމުންނެވެ.

ބުރާސްފަތި ދުވަހުގެރޭ ބޭއްވި ޖަލްސާގައި ރައީސް ޔާމީން ވިދާޅުވީ، ކުރީ ސަރުކާރުގެ ދަރަނީގެ ވާހަކަ މި ސަރުކާރުގެ ވެރިން ދައްކަމުންދާއިރު މި ސަރުކާރު އެކަނި އުދެއްދި ދރަނި 150 ހާސް މިލިއަނަށް ވުރެ މައްޗަށް އަރާފައިވާ ކަމަށެވެ. މީގެ އިތުރުން އެސްއޯއީތަކުން ލިބޭ ފއިސާ ވެސް ނަހަމަ ގޮތުގައި ރައީސް މުހައްމަދު މުއިއްޒު ބޭނުން ކުރައްވާ އެ ކުންފުނިތައް ވެސް މިހާރު ވަނީ ދަރަނިވެރިވެފައިކަން ރައީސް ޔާމީން ފާހަގަކުރެއްވިއެވެ.

ރައީސް ޔާމީން އިތުރަށް ވިދާޅުވީ، ޓުއަރިޒަމް އިންޑަސްޓްރީ ވެސް ހުއްޓިފައިކަމަށާ ސަރުކާރުގެ ޕީއެސްއައިޕީ އޮތީ ވެސް ހުއްޓިފައިކަމަށެވެ. އެހެންކަމުން މިއަދު ގައުމުގައި ލިކިއުޑީޓި ނެތް ކަމަަ ގައުމުގެ އިގްތިސޯދު އޮތީ ބޭރަށް ހިންގުން ޖެހިފައި ކަމަށް ވިދާޅުވެ ރައީސް ޔާމީން ވަނީ ފާޑުވިދާޅުވެފައެވެ.

ރައީސް ޔާމީން ވިދާޅުވީ، ގައުމުގެ ދަރަނި ދައްކަން ފެހި ސިގްނަލް ލިބިފައިވާ ކަމަށް ރައީސް މުއިއްޒު ވިދާޅުވި ނަމަވެސް ފެންނަމުން ދަނީ ގައުމުގެ ކަންކަން ޓަޗަރީ ފެންވަރުގައި ރެޑް ލައިޓިގައި އޮތް މަންޒަރު ކަމަށެވެ.