ސަރުކާރުގެ ކަރަންޓު ކުންފުނި، ސްޓޭޓު އިލެކްޓރިކް ކޮމްޕެނީ (ސްޓެލްކޯ) އިން އިލެކްޓްރިކު ސްކޫޓަރ ގެނެސް ވިއްކަން ފަށައިފި ކަމަށް މައުލޫމާތު ލިބިއްޖެއެވެ.
ނަން ހާމަނުކުރުމަށް އެދި ސްޓެލްކޯގެ މުވައްޒަފަކު "ތޭރަ އޮންލައިން"އަށް މައުލޫމާތު ދީފައިވާ ގޮތުގައި، މި ސްކޫޓަރުތައް ގެނެސްފައިވަނީ، ޓައިވާނުންނެވެ. އެގޮތުން ޓައިވާނުގެ ބްރޭންޑެއް ކަމަށްވާ "ގޮގޮރޯ" ބްރޭންޑްގެ 56 ބެޓެރީ ސައިކަލް ގެނެސްފައިވާއިރު އެ ތަކެތީގެ އަގު 370،000 ޔޫއެސް ޑޮލަރަށް ވުރެ މައްޗަށް އަރައެެވެ.
މި ސްކޫޓަރުތައް ގެނެސްފައިވަނީ މަޖިލީހުގެ ކެލާ ދާއިރާގެ ޕީއެންސީގެ މެމްބަރު އަބްދުﷲ ޝަރީފުއާ ސްޓެލްކޯގެ ޕްރޮކިއުމަންޓް ޑިޕާޓްމަންޓްގެ ބައެއް އިސްވެރިން ވެސް ބައިވެރިވެގެން ކަމަށް މައުލޫމާތު ލިބިފައިވެއެވެ.
ސްޓެލްކޯއިން ސައިކަލް ވިޔަފާރީގެ ތެރެއަށް ވަދެފައިވާއިރު އާންމުންގެ ވިޔަފާރިތަކަށް ސަރުކާރުން ވަންނަމުންދާ ކަމަށް ބުނެ ގިނަ ބަޔަކު ވަނީ ނުރުހުން ވެސް ފާޅުކޮށްފައެވެ. ސަރުކާރުން ވަނީ ދާދި ފަހުން ޓެކްސީގެ ވިޔަފާރީގެ ތެރެއަށް ވެސް ވަނުމަށް ނިންމާފައެވެ.
