ޑޮލަރުގެ އަގު ތިރިއަށްދާނެ ކަމަށް ސަރުކާރުން ބުނިތާ އެތައް މަހެ ވެގެން ދިޔައިރު ވެސް ޑޮލަރު އަގު ތިރިނުވެ، ކަޅު ބާޒާރުގައި އެމެރިކާ ޑޮލަރުގެ އަގު 20ރ. އަށް އުފުލިއްޖެ އެވެ.

ފިތުރު އީދާ ގުޅިގެން ބޮޑު ބަންދެއް ލިބޭއިރު، މި މަހުގެ 20 ވާ ބުރާސްފަތި ދުވަހުން ފެށިގެން ވެސް ސަރުކާރު ބަންދުވާނެ އެވެ. އެހެންވެ، ރޯދަމަހުގެ ފަހު 10 އާއި ކުޑައީދު ބަންދު ދުވަސްތަކާ އެކު 15 ދުވަހަށް ސަރުކާރު ބަންދުވާނެ އެވެ.

މި ދުވަސްކޮޅު ޑޮލަރުގެ އަގު އުފުލެން ދިމާވި ސަބަބަކީ ސުކޫލު ބަންދަށް ޑޮލަރަށް އޮތް ޑިމާންޑު އިހުނަށްވުރެ، ބޮޑުވުމެވެ. ރާއްޖޭގައި އެންމެ ފުޅާ ދާއިރާއެއްގައި ޑޮލަރުގެ މުއަމަލާތް ކުރުމަށް ބޭނުންކުރާ ވައިބާ ގްރޫޕްގައި ވެސް ޑޮލަރެއްގެ އަގު މިއަދު ހުރީ 19 ރުފިޔާ އަދި 20 ރުފިޔާ ރޭޓުގަ އެވެ.

މާލޭގައި ޑޮލަރުގެ ވިޔަފާރި ކުރާ މީހަކު "ޗެނަލް13" އަށް ބުނީ ޑޮލަރުގެ އަގު ބޮޑުވެފައި މިވަނީ ކުއްލި ބޮޑު ބަންދެއް ލިބި ދަތުރު ފަތުރުގެ ހަރަކާތް އިތުރުވުމެވެ. އޭގެ އިތުރުން ޑޮލަރު ލިބުމުގައި ވެސް ދަތިތަކެއް އެބަހުރި ކަމަށް އޭނާ ބުންޏެވެ.

ރާއްޖެ އަށް މުދާ އިމްޕޯޓްކުރާ ވިޔަފާރިވެރިއަކު ވެސް މިއަދު ބުނީ، މިހާރު ރާއްޖޭގައި ވިޔަފާރި ކުރަނީ 20ރ. އަކީ ޑޮލަރުގެ ރަސްމީ ރޭޓު ކަމަށް ބަލައިގެން ކަމަށެވެ. ޑޮލަރުގެ މައްސަލަ އަށް ހައްލެއް ނުލިބި އޮތުމަކީ އިގްތިސާދަށް ކުރިމަތިވެފައިވާ އޮތް އެންމެ ބޮޑު ގޮންޖެހުމެވެ.

އަންނަ ހޮނިހިރު ދުވަހު އިންޑިއާ އަށް ފުރަން ދަތުރު ހަދައިގެން ހުރި ދިވެހި އާއިލާއެއްގެ އިސް މީހަކު "ޗެނަލް13" އާ ވާހަކަ ދައްކަމުން މިއަދު ބުނީ ބޮޑު ބަންދެއްލިބުމުން ދަރިފުޅު ޑޮކްޓަރަށް ދައްކާލަން ބެންގަލޫރަށް ފުރަން ޑޮލަރު ހޯދަން ޖެހުނީ ބޮޑު އަގުގައި ކަމަށެވެ. އޭނާ ބުނީ މި ނިމުނު ހަފްތާ ޑޮލަރުގެ ރޭޓަށް އަންނަ ބަދަލު ބަލަމުން ގޮސް އެންމެ ފަހުން ޑޮލަރު ހަދަން ދިވެހި ރުފިޔާ ލިބުނުއިރު ޑޮލަރު ގަންނަން ލިބުނީ 19.80ރ. އަށް ކަމަށެވެ.

ފާހަގަކޮށްލެވޭ ގޮތުގައި، މި އަހަރު ފެށުނުއިރު ވެސް، ޑޮލަރުގެ އަގުތައް ކަޅު ބާޒާރުގައި ހުރީ 19 ރުފިޔާއިން މަތީގައި އެވެ. ނަމަވެސް ފަހުން ދުވަސްކޮޅަކަށް އަގު ކުޑަކޮށް ދަށް ވިއެވެ. އޭރު އިކޮނޮމިކް މިނިސްޓަރު މުހައްމަދު ސައީދު ވިދާޅުވީ، ސަރުކާރުގެ އަމާޒަކީ ހަތަރު މަހެއްހައި ދުވަހުގެ ތެރޭގައި ރާއްޖެއަށް ދިމާވެފައި އޮތް ޑޮލަރުގެ މައްސަލަ ހައްލުކުރުން ކަމަށެވެ.

ޑޮލަރުގެ އަގު އުފުލިގެން އުޅެން ދެން ނުޖެހޭނެ ކަމަށާއި ދެން ފެންނާނީ ޑޮލަރުގެ އަގު ހެޔޮވަމުން ދާތަން ކަމަށް ރައީސް ޑރ. މުހައްމަދު މުއިއްޒު ވެސް ވަނީ ވިދާޅުވެފަ އެވެ. ނަމަވެސް ސަރުކާރަށް 16 މަސް ވެގެން ދިޔައީ އެވެ. ރައީސް އެ ވިދާޅުވާ ހާލަތު އަދި އުފަން ނުވެ އެވެ.

ރާއްޖޭގައި ޑޮލަރުގެ ރަސްމީ އަގަކީ 15:42ރ އެވެ. ނަމަވެސް މަރުކަޒީ ބޭންކް އެމްއެމްއޭ އަކީ، ޑޮލަރުގެ ތާށިކަން އަންނަ ދުވަސްވަރު ފައިސާގެ މާރުކޭޓްގެ ކޮންޓްރޯލް ހޯދޭ ފަދަ ގާބިލް އިދާރާއަކަށް ނުވާތީ، ޑޮލަރުުގެ މުއާމަލާތް ހިންގަނީ އަބަދުވެސް ކަޅު ބާޒާރުގަ އެވެ.