އިންތިހާބީ ރައީސް ޑރ. މުހައްމަދު މުއިއްޒުގެ ސަރުކާރުގެ ސިޔާސީ މަގާމުތައް 700 އަށްވުރެ އިތުރު ނުކުރަން އެމަނިކުފާނު ނިންމާފައިވާ ކަމަށް އިންތިހާބީ ރައީސް އޮފީހުގެ ތަރުޖަމާނު މުހައްމަދު ފިރުޒުލް ވިދާޅުވީ 10 އޮކްޓޫބަރު 2023 ގައި އެވެ.

މ. ދިމްޔާތުގައި ބޭއްވި މީޑިއާ ބްރީފިން ގައި ފިރުޒުލް އެދުވަހު ވިދާޅުވީ މި އަދަދަކީ ރައީސް ސޯލިހު ސަރުކާރާއި ރައީސް އަބްދުﷲ ޔާމީން ގެ ސަރުކާރުގައި އުފެއްދި ސިޔާސީ މަގާމުތަކަށްވުރެ މަދު އަދަދެއް ކަމަށެވެ.

ސޯލިހު ސަރުކާރު ނިމުނުއިރު ސިޔާސީ މަގާމުތަކުގައި 1،063 ސިޔާސީ މުވައްޒަފުން އެބަ ތިއްބެވެ. އޭގެ ކުރިން ރައީސް އަބްދުﷲ ޔާމީންގެ ސަރުކާރުގައި 808 ސިޔާސީ މުވައްޒަފުން ތިއްބެވެ.

ފިރުޒުލް އެދުވަހު ވިދާޅުވީ 700 ސިޔާސީ މަގާމު އުފައްދަން ރައީސް މުއިއްޒު ނިންމާފައި މިވަނީ ސަރުކާރުގެ ވުޒާރާތަކާއި ރައީސް އޮފީހާއި ރައީސްގެ ގެކޮޅާއި ނައިބު ރައީސްގެ ގެކޮޅާއި، މިހުރިހާ ތަނެއްގައި މަސައްކަތް ކުރާ އިދާރީ މުވައްޒަފުން ހިމެނޭހެން, ކަމަށެވެ. އަދި ވިދާޅުވީ ސިޔާސީ މަގާމުތަކަށް ވެސް ފުރުސަތު ދެއްވާނީ ގާބިލު އިލްމީ ބޭފުޅުންނަށް ކަމަށެވެ.

އަދި މާ ބޮޑު ބޭނުމެއްނެތް ގޮތެއްގައި އެއްވެސް އުސޫލެއް ހަމައެއްނެތި ދެމުންދާ އެކިކަހަލަ ސިޔާސީ މަގާމުތައް ހުއްޓުވާނެ ކަމަށް ވެސް ތަރުޖަމާނު އިއުލާނުކުރި އެވެ. ނަމަވެސް މިއަދަށް އެފަހުން ސޯޅަ މަސް ވީ އެވެ. އިންތިހާބީ ރައީސް މުއިއްޒު ވަނީ ރައީސް ކަމުގެ ހުވާ ކުރެއްވުމާއެކު ރައީސް ޑރ. މުހައްމަދު މުއިއްޒު އަށް ވެވަޑައިގެންފަ އެވެ. ފިރުޒުލް އެދުވަހު ދެއްކެވި ވާހަކަ ބުޅާ ގޯނިން ބޭރުވެއްޖެ އެވެ.

ކަމުގެ އަހުލުވެރި އިލްމުވެރި ފަންނުވެރިން އެއްކައިރިކޮށް، ތަޖުރިބާއެއް ނެތަސް އިލްމެއް ނެތަސް ހިލްމެއް ނެތަސް މުއިއްޒުގެ ގާތްމީހުންނާއި އާއިލީ މީހުންނާއި، ރަހުމަތްތެރިންގެ ދަރިންނަށް ދިވެހިރާއްޖޭގެ ބޮޑެތި މަގާމުތައް މި ވެރިކަމުގައި ސިޔާސީވާގިވެރިކަމުގެ ތެރެއިން ބެހިގެންދާއިރު، މި ސަރުކާރުގެ އެކި ވުޒާރާތަކާއި އެމްބަސީތަކުގައި ގިނަ އަދަދެއްގެ ސިޔާސީ މުވައްޒަފުން ތިބޭތީ އެކަމުގެ ކަންބޮޑުވުން ގިނަ ބަޔަކު ވަނީ ފާޅުކޮށްފަ އެވެ. އަދި އެކަމުގެ ފާޑުކިއުންތައް ސަރުކާރަށް އެކި ގޮތްގޮތުން ވަނީ އަމާޒުވެފަ އެެވެ. އަދި ސަރުކާރުގެ ސިޔާސީންގެ އަދަދު ސިއްރުކުރަން ސަރުކާރުން އަންނަނީ މަރުފަލި ޖަހަމުން ނެވެ. ރައްޔިތުންގެ ފައިސާއިން ހަރަދުކުރަނީ ކިތައް ސިޔާސީ މީހުންނަށްކަން ރައްޔިތުންނަށް އެނގެން ޖެހޭނެ އެވެ. އެއީ، ސަރުކާރުން ބޭނުންވީމާ ހާމަކޮށްފައި، ބޭނުންނުވީމާ ހާމަނުކޮށް ސިއްރުކުރެވޭ ވަރަށް ވުރެ ބޮޑު ކަމެކެވެ.

ސަރުކާރުގެ އިގްތިސޯދީ އިސްލާހީ ފިޔަވަޅުތަކުގެ ދަށުން ދައުލަތުގެ ހަރަދު ކުޑަކުރުމަށް 248 ސިޔާސީ މުވައްޒަފުން ވަކިކޮށްފައިވާ ކަމަށް ސަރުކާރުން ހާމަކުރި އިރު، އެ މުވައްޒަފުންގެ މައުލޫމާތު ވެސް ސިއްރުކުރަން ސަރުކާރުން އަންނަނީ މަތީ ކޯޓުތަކުގައި ވަކާލާތު ކުރަމުންނެވެ. މި ސަރުކާރުގެ ސިޔާސީ މުވައްޒަފުންގެ އަދަދު ހާމަ ކުރަން ގޮވާލައި މަޖިލީހަށް ހުށަހަޅާ ކޮންމެ ކުއްލި މައްސަލަ އެއް ތަޅުމުން ނެރެ ބޭރުކޮށްލަނީ ދައުލަތުގެ ބާރުތަކުގެ ޝާމިލްވުމާއި އެކު ރޭވި އިންތިޒާމް ވެގެން ނެވެ. އާންމުންގެ އެންމެ ބޮޑު ކަންބޮޑުވުމަކީ ސަރުކާރުން އެއްވެސް އަދަދެއް ނުބުނުމެވެ. އަދަދު ސިއްރުކުރަން މަސައްކަތްކުރުމެވެ.

ހާމަކަން ބޮޑު ޝާމިލް ސަރުކާރެއްގެ ވައުދާއެކު ވެރިކަމުގެ ހުވާކޮށް ދިދައަށް ކުރެއްވި އިޝާރާތާއިއެކު ދެއްކެވި ވާހަކަ ބަދަލުވީ "ހަތަރު ބީރުންގެ ވާހަކަ" އަށެވެ. ސިޔާސީ މަގާމުތަކާއި ގުޅިގެން ސަރުކާރުގެ އެއް އިދާރާއާއި އަނެއް އިދާރާ ކިޔާ އެއްޗެއް އޮޅުމެއް ނުފިލަ އެވެ. އަދަދުތައް ދިމަލެއް ނުވެ އެވެ. އިގްތިސާދީ ގޮތުން ބައެއް އިސްލާހީ ފިޔަވަޅުތައް އަޅުއްވާނެ ކަމަށް ވިދާޅުވި ނަމަވެސް މިހާތަނަށް އިސްލާހީ ފިޔަވަޅުތައް ނުފެންނާތީ ވޯލްޑް ބޭންކުން ވެސް ކަންބޮޑުވުން ފާޅުކޮށްފަ އެވެ.

ސިޔާސީ މުވައްްޒަފުންގެ އަދަދަކީ މި ސަރުކާރުން ބޮޑު ސިއްރެއްގެ ގޮތުގައި ގެންގުޅޭ ނަމްބަރެކެވެ. އެ މީހުން އަދަދުގެ އިތުރުން އިތުރު ތަފުސީލެއްވެސް ރައީސް އޮފީހުން ނުދެ އެވެ. ނަމަވެސް ބައެއް ވުޒާރާތަކުން އެ ތަފުސީލުތައް ދޫކޮށްފައިވެ އެވެ. ސިޔާސީ މުވައްޒަފުންގެ އަދަދު މަދު ކުރައްވާނެ ކަމަށް ރައީސް ހާމަ ކުރެއްވި ފަހުން ވެސް އެކި މިނިސްޓްރީތަކަށް ސިޔާސީ މުވައްޒަފުން ވަނީ ނަގައިފަ އެވެ.

އެއް މިސާލެވެ.!

ދިވެހި ބަހާއި ގައުމިއްޔަތާ ބެހޭ މިނިސްޓްރީގައި 48 ސިޔާސީ މުވައްޒަފުން ތިބިއިރު އެ މުވައްޒަފުންގެ މުސާރައަށް އެކަނި ދައުލަތުން މިލިއަނަކަށް ވުރެ ގިނަ ދިވެހި ފައިސާ ހަރަދުކުރާކަން ވަނީ މި ފަހުން ހާމަވެފަ އެވެ.

މައުލޫމާތު ހޯދާ ލިބިގަތުމުގެ ގާނޫނުގެ ދަށުން އަމިއްލަ ފަރުދަކު ހުށަހެޅި ރައިޓް ޓު އިންފޯމޭޝަންއަށް ގައުމިއްޔަތު މިނިސްޓްރީއިން ލިޔުމުން ދިން ޖަވާބުން ހާމަވާ ގޮތުގައި، އެ މިނިސްޓްރީގައި ފަސް ސްޓޭޓު މިނިސްޓަރުންނާއި 11 ޑެޕިއުޓީ މިނިސްޓަރުން ތިއްބަވަ އެވެ.

މީގެއިތުރުން 12 ޕޮލިޓިކަލް ޑިރެކްޓަރުންނާއި 18 ސީނިއާ ޕޮލިޓިކަލް ޑިރެކްޓަރުންގެ އިތުރުން އެސިސްޓެންޓް ޕޮލިޓިކަލް ޑިރެކްޓަރަކު ހުރެ އެވެ. އަދި މިނިސްޓަރުގެ ޕާސަނަލް އެސިސްޓެންޓެއްގެ ގޮތުގައިވެސް މުވައްޒަފަކު ހުރެ އެވެ. މި ހުރިހާ މުވައްޒަފުންގެ މުސާރައަށް މަހަކު މިލިއަނަކަށްވުރެ ގިނަ ރުފިޔާ ދައުލަތުގެ ބަޖެޓުން ހަރަދުކުރެ އެވެ.

މިލިއަނަކަށް ވުރެ ގިނަ ރުފިޔާ ގައުމިއްޔަތު މިނިސްޓްރީގެ ސިޠާސި މުވައްޒަފުންނަށް ރައްޔިތުންގެ ޓެކްސް ފައިސާއިން ރައީސް ޑރ މުހައްމަދު މުއިއްޒު ހަރަދު ކުރައްވާއިރު އެ މިނިސްޓްރީއިން މިހާތަނަށް ރައްޔިތުންނާ ގައުމަށް ފައިދާ ވަނިވި ކަމެއް ކޮށްފައިނުވެ އެވެ.

މިއަދު ޑރ، މުއިއްޒުގެ ސަރުކާރަށް ހަނދުމަކޮށްލަ ދޭން ބޭނުންވަނީ އިދިކޮޅުގައި ތިބެގެން އޭރުގެ ސަރުކާރަށް ފާޑުކީއިރު ދެއްކިހާ ވާހަކަތަކެވެ. ވެރިކަމަށް އައުމަށް ރައްޔިތުންނަށް ވިއްކި ނަނާ ހުވަފެން ތަކެވެ.

ހަދާނަށް ތިލަވި އެއް މިސާލެވެ.

ޑރ. މުއިއްޒުގެ ސިޔާސީ އެއް މަދަދުގާރު ބާރަށު ދާއިރާގެ މެންބަރު އިބްރާހިމް ޝުޖާއުގެ ބަސް މަގެވެ. އޭނާގެ މައިކުން ކުރިން ބުނީ "ބަލަ ބުރާންތިތަކާއޭ ހަރަދު ކުޑަކުރާށޭ. ސިޔާސީ މަގާމުތަކެއް ނޫނޭ އުފައްދަންވީ،" މިފަދައިން ނެވެ.

އެކަމަކު، އެކިއެކި ސިޔާސީ ނުފޫޒުތަކުގެ ތެރެއިން ކުންފުނިތަކާއި ވުޒާރާތަކަށް އައްޔަންކޮށްފައި ތިބި މުވައްޒަފުންނާ އެކު ސަރުކާރުގެ ސިޔާސީ ހޭދަ އެހެން ހުރިހާ ސަރުކާރަކަށް ވުރެ އިތުރުވެއްޖެ އެވެ. މީ، ދޮގު ނުކުރެވޭނެ ހަގީގަތެކެވެ.

އެކި މަސްދަރުތަކުން އެނގިފައިވާ ގޮތުގައި ސަރުކާރުގައި ތިބި ސިޔާސީ މުވައްޒަފުންގެ އަދަދު 7،000 ހުރަސް ކުރެ އެވެ. ނަމަވެސް ސަރުކާރުން ސީދާ އަދަދު ހާމަ ކުރަން ފަސްޖެހޭތީ ޖުމްލަ ތިބި ސިޔާސީ މުވައްޒަފުންގެ އަދަދު އެހާ ސާފެއް ނުވެ އެވެ.

އަދި އެއް ވާހަކަ އެވެ.

އިސްލާމީ އަޅުކަމަށް ފުރުސަތު ދިނުމަށް ރޯދައިގެ ފަހު ދިހައެއް ބަންދު ކޮށްގެން ވެސް ކުރިން ދެއްކި ވާހަކަތައް ހަދާނާ ހިތް މައްޗައް ގެނެސް ގަންނާށެވެ. އިސްލާހު ވާށެވެ. އިސްރާފު ހުއްޓާލާށެވެ. ބޭކާރު ސިޔާސީ މަގާމުތައް އުވާލައްވާށެވެ. ކަމެއް ނުކުރާ މީހުންނަށް ސިޔާސީ މަދަދުގާރުން ކަމަށް ބުނެ ދައުލަތުން މުސާރަ ނުދެއްވާށެވެ. ކަމުނުދާ ފާޑަށްވެސް ފުރުސަތުދީގެން ވެރިކަމުގެ ދައުރު ނިންމޭތޯ ބައްލަވާށެވެ. ފިޔަވަޅު އަޅާނެ ކަމަށް ބުނެ ފޯނުން ގުޅާ ހުއްޓުވަންވީ މިވާހަކަ ދައްކާ ނޫސްތަކާއި ނޫސްވެރިން ނެތް ނޫނެވެ.