

މޯލްޑިވިއަން އެއާލައިނުން ސްރީ ލަންކާގެ ކޮލަންބޯ އަށް ސީދާ ފެށި ދަތުރުތައް ހުއްޓިފައި އޮންނަތާ 5 މަސް ވެއްޖެ އެވެ.
މޯލްޑިވިއަންގެ ފްލީޓުގައި އޮންނަ އެއާބަސް އޭ321އަށް ދަތުރު ކުރެވޭ ވަގުތު ނުވަތަ 'ފްލައިން އަވާސް' ހަމަވެ، އެ ބޯޓު ސާވިސް ކުރުމުގެ މަސައްކަތް ކުރުމަށް ބޭއްވުމާ އެކު، އެ އެއާލައިނުން ސްރީ ލަންކާގެ ކޮލަމްބޯ އަށް ކުރި ދަތުރުތައް މެދުކަނޑާލި އެވެ.
އެފަހުން މިއަދަށް ފަސް މަސް ވެގެންދާއިރު މޯލްޑިވިއަން އިން މިއަދު ބުނީ ލަންކާ ކޮޅަށް އެ އެއާލައިންގެ ސީދާ ދަތުރުތައް ފެށުމަށް ޓިކެޓް ވިއްކަން އަލުން ފަށާނެ ތާރީހެއް ދަންނަވަން ދަތިކަމަށެވެ.
މޯލްޑިވިއަން އިން އަންނަނީ އެ އެއާލައިނުން ރާއްޖެއިން ބޭރަށް ކުރާ ދިގު ދަތުރުތައް އިތުރުކުރަމުންނެވެ. ގައުމީ އެއާލައިން، މޯލްޑިވިއަނުން ދުނިޔޭގެ އެކި ކަންކޮޅުތަކަށް ދަތުރުތައް ފުޅާކުރުމަށް ގެންގުޅޭ ސިޔާސަތުގެ ދަށުން ދެން އެންމެ އަވަހަށް ދަތުރުތައް ފަށާނީ ދެކުނު އެފްރިކާއަށް ކަމަށް އެ އެއާލައިނުން ވަނީ ބުނެފަ އެވެ.
ޖެނުއަރީގައި މޯލްޑިވިއަނުން ވަނީ އޭ 330ގެ ބޯޓެއް ގެނެސް ޗައިނާއަށް ދަތުރުތައް ވެސް ފަށައިފަ އެވެ. ޖުމްލަ 264 މީހުން އުފުލޭ އެ ބޯޓާ އެކު ބައިނަލްއަގުވާމީ މަންޒިލްތަކަށް އެއާލައިންގެ ދަތުރުތައް ފުޅާކުރަން ވަނީ ރާވައިފަ އެވެ.
ނަމަވެސް ސުވާލަކީ މިތާކައިރި އަށް "ކުރު" ދަތުރެއް ދެމެހެއްޓެނިވި ގޮތެއްގައި ނުކުރެވިގެން އުޅޭ ކުންފުންނަކަށް ޔޫރަޕަށް އަދި އެފްރިކާ ބައްރަށް އުދުހެވޭނީ ކިހިނެތް ހެއްޔެވެ.؟ އެ ކެޕޭސިޓީ ގައުމީ އެއާލައިން، މޯލްޑިވިއަނުންގައި އެބަހުރި ހެއްޔެވެ..؟