ރައްޔިތުންގެ މަޖިލިހުގެ ރައީސް މުހައްމަދު އަސްލަމާއި މަޖިލިހުގެ ނައިބު ރައީސް އަހްމަދު ސަލީމް ވަކިކުރުމުގެ މައްސަލައިގެ ނޯޓިސް ފޮނުވާފައިވަނިކޮށް އެ މައްސަލަ އަނބުރާ ގެންގޮސްފިއެވެ.

މަޖިލީހުގެ ރައިސް އަސްލަމާއި މަޖިލީހުގެ ނައިބު ރައީސް އަހުމަދު ސަލީމްގެ އިތުބާރު ނެތްކަމަށް ވަކިވަކިން ހުށަހަޅާފައިވާ މައްސަލައިގައި ދެ ބޭފުޅުންނަށް 15 ދުވަހުގެ ނޯޓިސް ފޮނުވާފައިވާއިރު މި މަހު 19 ވަނަ ދުވަހު އޮންނަ މަޖިލީހުގެ ޖަލްސާއަށް މައްސަލަ އެޖެންޑާ ކުރުމަށް މަޖިލީހުން އޮތީ ހަމަޖެހިފައެވެ.

ނަމަވެސް ޕީއެންސީގެ ގިނަ މެންބަރުން މިހާރު ވަނީ ސޮއި އަނބުރާ ގެންގޮސް އެ މައްސަލަ ނަގައިފައެވެ.

ޕީއެންސީ އިން އަސްލަމާއި ސަލީމްގެ އިތުބާރު ނެތްކަމުގެ މައްސަލަ މަޖިލީހަށް ހުށަހެޅީ މިދިޔަ ޖެނުއަރީ މަހުގެ 28 ވަނަ ދުވަހުގައެވެ.

މަޖިލިހުގެ ހިތަދޫ އުތުރު ދާއިރާގެ މެމްބަރުކަން ކުރައްވާ އަސްލަމާއި ހޯރަފުށީ ދާއިރާގެ މެމްބަރުކަން ކުރައްވާ ސަލީމް، މިހާރު މަޖިލިހުގައި އަދާކުރައްވާ މަގާމުތަކުން ވަކިކުރަން ހުށަހެޅީ މިނިސްޓަރުންނަށް ރުހުން ނުދޭން އެމްޑީޕީ އާއި ޑިމޮކްރެޓްސް އިން ނިންމުމާ ގުޅިގެން މަޖިލިހުގެ ތަޅުމުގައި އެމްޑީޕީ އާއި ޕީޕީއެމް/ޕީއެންސީގެ މެމްބަރުންގެ މެދުގައި ހަމަނުޖެހުން ހިނގާފައި ވަނިކޮށެވެ.