ތެލެސީމިއާއަށް ފަރުވާ ހޯދަމުންދާ ބަލި މީހުންނާއި އެ މީހުންގެ އާއިލާތަކުން މޯލްޑިވްސް ބްލަޑް ސާވިސަސް (އެމްބީއެސް) ގެ ވެރިންގެ އިސްތިއުފާއަށް ގޮވާލައި އެ ތަނުގައި މުޒާހަރާ ކުރަން ފަށައިފި އެވެ.
މުޒާހަރާ ކުރަން ފެށީ ސެންޓަރުގެ މެނޭޖުމަންޓާ އެކު މިރޭ ބޭއްވި ބައްދަލުވުމަށްފަހު އެއްވެސް ކަމަކަށް ހައްލެއް ނުލިބުމުން ކަމަށް އެ ސަރައްދުގައި އަޑު އުފުލާ މީހުން އަންނަނީ ބުންޏެވެ.
މުޒާހަރާގެ ކުރިން ބައެއް މީހުން ވަނީ އެމީހުންގެ ކަންބޮޑުވުންތައް ސޯޝަލް މީޑިއާގައި ވެސް ހިއްސާކޮށްފަ އެވެ.
އެމްބީއެސްގައި ހުރި މައްސަލަތަކާ ގުޅޭގޮތުން ބައެއް މީހުންނާ އެކު އެ ތަނުގެ މެނޭޖުމަންޓުން މިރޭ މަޝްވަރާކުރި ކަމަށް ވެސް ވެއެވެ. ނަމަވެސް އެންމެ ބޮޑަށް ކަންބޮޑުން ފާޅުކުރި މީހުންނަށް އެ ބައްދަލުވުމުގައި ބައިވެރިވުމުގެ ފުރުސަތު ނުދޭ ކަމަށް ވެސް ހިޔާލުފާޅުކުރި ބައެއް މީހުން ބުނެ އެވެ.
މި މައްސަަލައިގައި ހެލްތު މިނިސްޓްރީންނާއި، އެމްބީއެސްއިން އަދި ރަސްމީ ބަހެއް ނުބުނެއެވެ.
