ފައިލޭރިއާއަށް ސްކްރީން ކުރުމަށް މުޅި ރާއްޖޭގައި ކުރިއަށް ގެންދިއުމަށް ނިންމައިފައިވާ ކެމްޕޭން ހުކުރު ދުވަހު ފަށާނެ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ އެ އެޖެންސީއާއި ރެޑް ކްރެސެންޓް އަދި ކައުންސިލްތަކުގެ އިތުރުން ހޮސްޕިޓަލްތަކާއި ހެލްތް ސެންޓަރުތަކުން ގުޅިގެން ކުރިއަށް ގެންދާ ފައިލޭރިއާއަށް ސްކްރީން ކުރުމުގެ ކެމްޕޭނެއް ހުކުރު ދުވަހު ފަށަން ނިންމާފައިވާ ކަމަށެވެ.

މި ކެމްޕޭނަކީ ރާއްޖޭގައި ދިރިއުޅޭ ދިވެހިންނާއި ބިދޭސީންގެ މެދުގައި މި ބަލި ހުރި މިންވަރު ދެނެގަތުމަށް ހިންގާ ކެމްޕޭނެއް ކަމަށް ވެސް އެ ފަރާތުން ވަނީ ބުނެފައެވެ.

މި ކެމްޕޭން ކުރިއަށް ގެންދާނީ ރާއްޖޭގެ ހުރިހާ ރަށަކާއި ރިސޯޓު އަދި ސިނާޢީ ރަށްތަކުން ގުރުއަތުން ހޮވާ އުމުރުން 18 އަހަރު ވެފައިވާ މީހުންނަށް ކަމަށް އެ އެޖެންސީން ވަނީ ހާމަކޮށްފައެވެ.

އެޗްޕީއޭއިން ބުނި ގޮތުގައި ލޭ ނަގައިގެން އެންޓިޖެން ޓެސްޓު ކިޓް ބޭނުންކޮށްގެން ކުރާ މި ޓެސްޓުގެ ނަތީޖާ 10-15 މިނިޓު ތެރޭ ލިބިގެންދާނެއެވެ.

ރާއްޖޭން ނެތިގެން ގޮސްފައި މިވާ ބަލި މި ފަހުން ފެނިފައި ވަނީ ހދ.ކުޅުދުއްފުށިންނެވެ.