ރައްޔިތުންނާ ވީހާ ވެސް ގާތުން މަސައްކަތްޕުޅު ކުރައްވަން ބޭނުންފުޅުވާތީވެ، ރައްޔިތުންގެ ހިޔާލުތަކާއި ސުވާލުތަކަށް ޖަވާބު ދެއްވުމަށް "ރައްޔިތުންނާ އެކު" ގެ ނަމުގައި ރައީސް ޑރ. މުހައްމަދު މުއިއްޒު ކުރިއަށް ގެންދަވާ ޕޮޑްކާސްޓުގެ ޝޯއެއް މިފަހުން ވަނީ ފައްޓަވައިފަ އެވެ.

މިކަމާ ހީ ސަމާސަކޮށް ޖޯކް ނުޖަހާ ހަމައެކަކުވެސް ނެތެވެ. ކުރިން ރެކޯޑްކޮށްގެން ގެނެސްދޭ ޕޮޑްކާސްޓްގެ ނަން ދީފައިވާ މިޝީ އަށް ޖޯކު ނުޖަހަ ތިބެންވީ ސަބަބެއް ވެސް ނެތެވެ. އެއީ މިކަން ހިނގާ ޒާތުން ނެވެ.

ދުނިޔޭގެ ނަންހިނގާ ބޮޑެތި ޕްޑްކާސްޓް ގިނަ ޝޯތައް ގެންނަނީ ލައިވް އޯޑިއަން ބައިވެރިކޮށްގެން ނެވެ. ގިނަބައެއްގެ އެންގޭޖްމަންޓް ހިމެނިގެން ނެވެ. އަދި ލައިވް ކޮށެވެ.

ނަމަވެސް ރައީސް މި ކުރައްވަން ފެއްޓެވި ކަމަކީ ފިއްލަވާ އިދެ ކުރާނެ ސުވާލާ ދޭނެ ޖަވާބު ވެސް ޕްރިންޓްކޮށްގެން އަރާ އިދެ "ބަލައިގެން ކިޔަނީ" އެވެ. ޕްރެސެންޓަރު ވެސް ހަމައެފަދަ އެވެ. ރައީސުލްޖުމްހޫރިއްޔާގެ އޮފީހުން ލިޔެ ތައްޔާރު ކުރާ ސުވާލު ކަރުދާހުގެ ތަރުތީބުން ސުވާލަކަށްފަހު ސުވާލެއް ކުރިމަތީ އިންނަ ރައީސް މީހާއަށް ކުރަނީ އެވެ. ދެކޮޅުން ކޮރެ ކޮޅެއްގައި ހުރި މައިކަކުން ރައްޔިތުންގެ އަޑެއް ނީވެ އެވެ. މުޅިވެސް އިވެނީ "ރައީސުލްޖުމްހޫރިއްޔާގެ އަޑެވެ".

ފާހަގަކޮށްލެވޭ ގޮތުގައި މިއީ ދުނިޔޭގެ ގައުމެއްގެ ވެރިޔަކު އަމިއްލަ އަށް ޕޮޑްކާސްޓެއް ފަށަން ނިންމި ފުރަތަމަ ފަހަރެވެ. އާންމުކޮށް ވެރިން ބައިވެރިވަނީ އެހެން މީހުން ނުވަތަ މީޑިއާތަކުން ގެނެސްދޭ ޕޮޑްކާސްޓުތަކުގަ އެވެ.

ކޮންމެއަކަށް ގިނަ ރައްޔިތުން ރައީސް އޮފީހުގެ ކޮމިޔުނިކޭޝަން ޔުނިޓުން ރައީސް "ހައްލާލައްވައިގެން" މިފެށި ހަރަކާތައް ފާޑު ކިޔަން ފަށައިފި އެވެ. ޖޯކު ވެސް ޖަހަން ފަށައިފި އެވެ. ރައީސް ފެއްޓެވި އާ ހަރަކާތައް ފާނޑުވިދާޅުވި މީހަކު ބުނީ ވެރިކަން ވަޑައިގަތްފަހުން ނޫސްވެރިންނަށް ފިއްލަވައިގެން އުޅުވާފައި ޕޮޑްކާސް ތިޔަ ހިންގަވަނީ މުޅިން ސެލެކްޓިވްކޮށް ސުވާލު ނަންގަވައިގެން ކަމަށާއި ތިޔަކު ރައްޔިތުންގެ އުދާސްތަކުގެ ސުވާލެއްގެ އަޑެއް ނީވޭ ކަމަށެވެ.

ރައީސްގެ މި ހަރަކާތައް ހިޔާލުފާޅުކުރެއްވި ދިވެހި ނޫސްވެރިއަކު ބުނީ ރައީސް މުއިއްޒު ޕްރެސް ކޮންފަރެންސެއް ނުބާއްވާތާ 478 ދުވަސް ފަހުން މި ފެއްޓެވީ ޕޮޑްކާސްޓެއް ކަމަށާއި ޕޮޑްކާސްޓު ކުރިއަށް ގެންދަނީ ސުވާލުތައް ލިޔެ ޕްރިންޓުކޮށް މޭޒުގެ ދެ ފަޅީގައި ބަހައްޓަވައިގެން އެމަނިކުފާނު ހިތްޕުޅާވާ ބޭފުޅަކު، ހިތްޕުޅާވާ ސުވާލެއް ކުރެއްވޭ ގޮތަށް ކަމަށެވެ މިއީތޯ ނޫސްވެރިންނާ ގާތުން މަސައްކަތް ކުރެއްވުންމަކީ އެ ނޫސްވެރިޔާ ވަނީ ރައީސް ކުރެން އައްސަވާފަ އެވެ.

ރައީސް މުއިއްޒުގެ ސަރުކާރުން ރައްޔިތުންނާ ގުޅުން ބަދަހިކުރުމަށް އަޅާ ފިޔަވަޅެއްގެ ގޮތުން ކަމަށް ބުނެ ރައީސް މި ފެއްޓެވި ހަރަކާތައް ހިޔާލު ފާޅުކުރި އިތުރު މީހަކު ބުނީ ވީޑިއޯ މެދުވެރިކޮށް ތިޔައް ސުވާލު ފޮނުވަނީ ރައީސް ގެ މީހުން އެކަނި ކަމަށާއި އަދި އެވެސް ރައީސް މީހާ ބޭނުންވާ ސުވާލު ކަމަށެވެ. އޭނާ އެދުނީ އެނޯނައިމަސްކޮށް ސުވާލު ހުށަހެޅޭނެ ގޮތް ހަދައިގެން ޝޯއެއް ކުރިއަށް ގެންދިޔުމަށެވެ. އެހިސާބުން ރައްޔިތުންގެ ފިސާރި ސުވާލު ރައީސް އަށް ލިބޭނެ ކަމަށް އޭނާ ބުންނެވެ.

އިތުރު މީހަކު ބުނީ އަމިއްލަވަންތަކަމާއި، ބޮޑާކަމާއި އަދި ކިބުރުވެރިކަމުގައި ހައްދުފަހަނައަޅައި ގޮސްފައި ހުރި ވެރިއެއްގެ ސިފަ އިތުރަށް ފާޅުވުން ނޫން ކަމެއް ތިޔަ ފެށި ޕޮޑްކާސްޓުގެ ޝޯ އިން ނުފެންނަ ކަމަށެވެ. ޖަވާބުދާރީ ވާން ޖެހޭނީ ހަމައެކަނި ތިމާ ހިތްއެދޭ ސުވާލު، ހިތްއެދޭ ގޮތަށް، ހިތްއެދޭ މީހަކު ކުރީމާ އެކަނިކަމަށް މި ރައީސް ހިތުގެއަޑިން ގަބޫލުކުރާނަމަ ދެން ވެސް އިވެން ފަށާނީ މުއިއްޒުގެ ދުލުން "ދޮގު" ގެ އަޑެވެ.

އޭނާ ބުނީ އިތުރަށް ގޯސް ނުހައްދަވަން އެދޭ ކަމަށާއި ޕީއެންސީގެ ރައީސެއް ނުވަތަ 6000 ސިޔާސީ މީހުންގެ ރައީސެއް ކަމަށް ހެދިގެން އެމީހުން އަތުން ސުވާލު ހޯދައިގެން ކުރިއަށް ގެންދާ ޕޮޑްކާސްޓުގެ ޝޯ އަށް ރައްޔިތުންގެ ސަމާލުކަން ކުޑަ ކަމަށެވެ. އަދި ތިކަން ދެމެހެއްޓެނިވި ގޮތެއްގައި ކުރެވޭނެތަން އޭނާއަށް ނުފެންނަ ކަމަށެވެ.

ތެދެކެވެ. ރައްޔިތުންގެ އަޑުއައްސަވައި، ރައްޔިތުންނާއި ގާތުން، ރައްޔިތުންގެ މަޝްވަރާއާއެކު ސަރުކާރު ހިންގެވުމަށް ކަމަށް ބުނެ ސަރުކާރުން މީގެ ކުރިން ވެސް ފެށި މިފަދަ ޝޯތަކުން ވެސް "ދޮގު" އިވެން ފެށުމުން ވަނީ ރައްޔިތުންގެ ސަމާލުކަން ނުލިބުމުން ހުއްޓާލައިފަ އެވެ. އެގޮތުން ރައްޔިތުންގެ އަޑު ޕޯޓަލް އާއި އަހާ ފޯރަމް ވެސް ވަނީ ހުއްޓުމަކަށް އައިސްފަ އެވެ. އަހާ ފޯރަމު ކޮންމެ ތިން މަހަކުން ބާއްވަވާނެ ކަމަށް ރައީސް މިދިޔަ އަހަރު ކުރީކޮޅު ވިދާޅުވި ނަމަވެސް މިހާތަަނަށް އެމަނިކުފާނަށް ބައިވެރިވެވަޑައިގެންނެވުނީ އެންމެ ފަހަރަކު އެވެ.

ރައްޔިތުންގެ އަޑު ޕޯޓަލް މެދުވެރިކޮށް ކުރާ ސުވާލުތަކަށް ޖަވާބު ނުދޭތާ އެތައް މަހެއް ވެގެންދިޔަ އެވެ. ވީޑިއޯ މެދުވެރިކޮށް އުސޫލެއް ނެތި ރައީސް އޮފީހުން ބޭނުންވި ބައެއްގެ ސުވާލު ނަގައިގެން ފެށި ޕްރޮގްރާމުވެސް މުއިއްޒު އަށް ސުވާލެއް ކުރާނެ ރައްޔިތަކު ނުވެގެން ހުއްޓިފައި އޮންނަތާ އަހަރެއް ވަނީ އެވެ.

ކޮންމެއަކަސް ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމުގެ ކުރިއަށް ވިދާޅުވަމުން ގެންގެދެވީ ނޫސްވެރިންނާ ގާތުން މަސައްކަތް ކުރައްވާނެ ވާހަކަ އެވެ. ސިއްރުން އެއް ވެސް މަސައްކަތެއް ނުކުރައްވާނެ ވާހަކަ އެވެ. ރައްޔިތުންނަށް ފޮރުވައިގެން ކަމެއް ކުރަންވެއްޖެއްޔާ ގައުމަށް ހަމަޖެހުމެއް ނާންނާނެ ވާހަކަ އެވެ. ނޫސްވެރިންނަށް ކަމެއް ނޭނގިގެން އުޅެން ޖެހުނަ ނުދޭނެ ވާހަކަ އެވެ. ގިނައިން މީޑިއާތަކާ ބައްދަލުކުރައްވާނެ ވާހަކަ އެވެ.

ފާޅުކަން ބޮޑު ސަރުކާރެއް ގާއިމުކުރެއްވުމުގެ ވައުދާއެކު ވެރިކަމަށް ވަޑައިގަތުމަށް ފަހު މިދެންނެވި ހުރިހާ ވާހަކައެއްވީ "ސަޅި ބައިސާ" އަށެވެ. ވެރިކަމަށް ވަޑައިގަތުމަށްފަހު ޑރ. މުއިއްޒު އެންމެ ފުރަތަމަ "ހިތާނުވާ" އެއް ބަޔަކަށް ނޫސްވެރިންވި އެވެ. ނޫސްވެރިންނާ ގާތުން މަސައްކަތް ކުރައްވާނެ ކަމަށް ވިދާޅުވެ ވެރިކަމަށް ވަޑައިގެންނެވި ފަހުން މިވީ 16 މަސްދުވަހުގެ ތެރޭގައި ރައީސް މުއިއްޒު ނޫސްވެރިންގެ ފުރިހަމަ ރަސްމީ ބައްދަލުވުމެއް ބޭއްވެވީ އެންމެ ފަހަރަކު އެވެ. ރައީސް އޮފީހުގައި އެ ނޫސްވެރިންގެ ބައްދަލުވުން ބޭއްވީ 5 ޑިސެމްބަރު 2023 ގަ އެވެ.

ކޮރަޕްޝަނާއި ފަސާދައިގެ އެތައް ކަމެއް ސަރުކާރުގެ ތެރެއިން ފެންމަތިވަމުން ދާއިރު ނޫސްވެރިންނަކީ ބުދުތަކެއް ހެން ގޮނޑިތަކެއްގައި ބައިތިއްބައިގެން ސަރުކާރުން ދައްކަން ބޭނުންވާ ވާހަކައެއް ދައްކާފައި ފޮނުވާލަން ތިބޭ ބަޔަކަށް ސަރުކާރުން މިއަދު ހަދައިފި އެވެ. ނޫސްވެރިންނާއި ރައްޔިތުންނަށް ފިއްލަވައިގެން ހަތަރު ފާރު ތެރޭ ކަޅު ދެ މައިކް ބޭނުން ކުރުމަކުން ރައްޔިތުންގެ އަޑެއް ނީވޭނެ އެވެ. ތިޔަ ވާނީ މަނިކުފާނުގެ ދޮގު ޖާޑިއަށް ދޮގު އަޅަން ލިބޭނެ އާ ފުރުސަތަކަށެވެ.

ކުރިމަތީ ކަޅު ދެ މައިކް އިނުމަކުން އަދި ޕޮޑްކާސްޓަކަށް ނުވެއެވެ. ތިޔަ ވައްތަރީ "ދޮގު ތަކުރު"ގެ ދޮގު ކާސްޓަކަށެވެ.