މި ސަރުކާރުގެ އެންމެ އިސް ކަމަކީ އިސްލާމްދީނަށް ނަސްރު ދިނުން ކަމަށް ބުނެ ސަރުކާރު ޕްރޮމޯޓުކުރާ އެކި މަންސަތަކުން ޕޯސްޓު ކުރަމުންދާ ދިއުމާ ގުޅިގެން ރާއްޖޭގެ ކުރީގެ އުއްތަމަ ފަނޑިޔާރު، ޑރ އަހުމަދު އަބްދުﷲ ދީދީގެ ވަރުގަދަ ބަހުގެ ހަމަލާތަކެއް އަމާޒުކުރައްވައިފިއެވެ.

އެކްސްގައި އެމަނިކުފާނު ކުރެއްވި ޕޯސްޓެއްގައި ފުރަތަމަ ވެސް ވަނީ ސުވާލެއް އަމާޒުކުރައްވާފައެވެ. އެގޮތުން އެމަނިކުފާނު ވަނީ އިސްލާމްދީނަށް ނަޞްރުދިނުމަކީ ކޮބައިތޯ އައްސަވާ ސުވާލެއް އަމާޒުކުރައްވާފައެވެ. އަދި އޭގެ ފަހުން ވިދާޅުވެފައިވަނީ، މި ސަރުކާރުގެ ނަޒަރުގައި އިސްލާމް ދީނަކީ ހަމައެކަނި ޢަޤީދާއާއި، އަޅުކަންތަކާއި، މަކާރިމުލް އަޚްލާޤު ގެ މައްޗަށް ބިނާވެގެންވާ “ލާހޫތީ” ނިޒާމެއްތޯ އާ ސަރުކާރާއި، ސަރުކާރު ޙިމާޔަތުގައި ވާހަކަ ދައްކާ ޢިލްމުވެރިންގެ ދީނީ ޚިޠާބު އަބަދުވެސް އެނބުރެނީ ބުނެވުނު ފަދަ ހަނި ދާއިރާއެއްގެ ތެރޭގައިކަން ފާހަގަކުރެވޭ ކަމަށެވެ. އަދި މިކަމުގައި އެނގެންޖެހޭ ޙަޤީޤަތަކީ އިސްލާމްދީނަކީ ޝާމިލު ނިޒާމެއްކަމާ ޢަޤީދާއާއި، އަޅުކަންތަކާއި، އަޚްލާޤުގެ އިތުރުން މުޢާމަލާތުގެ އެންމެހައި ދާއިރާ (ޕްރައިވެޓް ލޯ އާއި ޕަބްލިކް ލޯގެ އެންމެހައި ދާއިރާތައް) ތަކުގެ މައްޗަށް އެކުލެވިގެންވާ ނިޒާމެއްކަމެއް ކަން ވެސް ޑރ އަހުމަދު ވަނީ ވިދާޅުވެފައެވެ.

މީގެ އިތުރުން އެމަނިކުފާނުގެ އެ ދިގު ޕޯސްޓުގައި މި ސަރުކާރުން އަމަލުކުރަމުން ގެންދާ ގޮތުގެ މައްޗަށް އަލި އަޅުވާލައްވާ ވަރަށް ތަފްސީލުކޮށް ވާހަކަ ދައްކަވާފައިވެއެވެ. އެގޮތުން އިސްލާމީ ނިޒާމެއްގައި ދައުލަތުގެ އެންމެ އިސްވެރިޔާއަކީ ދީން ޙިމާޔަތްކޮށް ދުނިޔަވީ ސިޔާސަތު ދީނުގައި ވާގޮތުގެމަތިން ރާވައި ހިންގުމަށް ރައްޔިތުން އިޚްތިޔާރުކުރާމީހެއްކަން އެނގެން އޮންނަ ކަމާ، މީގެ އިތުރުން ދިވެހިރާއްޖެއަކީ އިސްލާމީ އުސޫލުތަކުގެ މައްޗަށް ބިނާކުރެވިފައިވާ ދައުލަތެއްކަން ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 2 ވަނަ މާއްދާގައި ބަޔާންކޮށްފައިވާއިރު، ދިވެހި ދައުލަތުގެ އެންމެ އިސްވެރިޔާ ދައުލަތް ހިންގަންވާނީ އިސްލާމީ އުޞޫލުތަކާ އެއްގޮތްވާގޮތުގެ މަތިން ކަން ފާހަގަކުރައްވާ އެމަނިކުފާނު ވަނީ އެހެން ނަމަވެސް ފެންނަން އޮތް ޙަޤީޤަތަކީ ވެރިކަން ހިންގުމުގެ ނިޒާމާއި ގުޅިފައިވާ އެއްވެސް އިސްލާމީ އުޞޫލެއް ޞައްޙަ ގޮތުގައި ތަޠްބީޤު ނުކުރެވޭކަމަށް ވިދާޅުވެފައެވެ.

މިގޮތުން މިސާލެއްގެ ގޮތުގައި ފާހަގަކުރައްވާފައިވާ ބައެއް ކަންތަކުގެތެރޭގައި، މުސްތަޤިއްލު މަޝްވަރާގެ ނިޒާމެއް ނެތުމާއި، ހެޔޮކަންތަކަށް އަމްރުކޮށް މުންކަރާތްތައް ނަހީކުރުމުގެ އުޞޫލުގެ ތެރެއިން އަނިޔާވެރި ވެރިންގެ ކުރިމަތީގައި ޙައްޤު ބަސް މިނިވަންކަމާއެކު ބުނެވޭނޭ، އަދި ޖަވާބުދާރީ ކުރެވޭނޭ ރަޤާބީ ނިޒާމެއް ނެތުމާއި، މިނިވަން މުސްތަޤިއްލު ޤަޟާއީ ނިޒާމަކަށް ހުރަސްއަޅައި ސުޕްރީމް ކޯޓުގެ ބާރު ކަނޑުވާލުމުގެ ސަބަބުން ސަރުކާރުން ހިންގާ ޣައިރު ދުސްތޫރީ ކަންކަން ރިވިއުކުރެވޭނެ ނިޒާމެއް ނެތުމާއި، ޤާނޫނުއަސާސީއާއި އިސްލާމްދީނާ ޚިލާފު ބައިނަލްއަޤުވާމީ މުޢާހަދާތަކުގައި ސަރުކާރުން ސޮއިކޮށް ތަޞްދީޤުކުރާއިރު، އެކަން ހުއްޓުވޭނެ ނިޒާމެއް ނެތުމާއި، ރައީސުލްޖުމްހޫރިއްޔާ ޤާނޫނުއަސާސީއާ ޚިލާފަށް ތަޢައްސުފީ ސިފައެއްގައި ބާރުތަކާއި އިޚްތިޔާރުތައް ބޭނުންކުރާއިރު، އެކަންތައް ޕާރލަމެންޓަރީ ނުވަތަ ޖުޑިޝަލް ރިވިއުގެ މައުޟޫޢެއްގެ ގޮތުގައި ބެލޭނެ ނިޒާމެއް ނެތުން ވެސް ފާހަގަކުރައްވާފައިވެއެވެ.

އެހެންކަމުން އިސްލާމްދީނަށް ނަޞްރުދިނުމުގެ ތެރޭގައި، އިސްލާމީ އުޞޫލުތަކާ އެއްގޮތަށް ޢަދްލުވެރިކަމާއި، އަމާނާތްތެރިކަމާ އެކު ވެރިކަމުގެ މަސްއޫލިއްޔަތު އުފުލުން ހިމެނިގެން ނުވަނީތޯ އައްސަވާ ޑރ އަހުމަދު ވަނީ ސަރުކާރަށް ބަހުގެ ހޫނު ހަމަލާތަކާ އެކު ސުވާލު އަމާޒުކުރައްވާފައެވެ.

ޑރ އަހުމަދުގެ މިފަދަ ހަމަލާއެއް ސަރުކާރަށް އަމާޒުކުރައްވާފައި މިވަނީ ވެރިކަމުގެ ތިން ބާރު މުށުތެރެއަށް ރައިސް މުހައްމަދު މުއިއްޒު ގެންނަވާ ދައުލަތުގެ ހުރިހާ ބާރެއް އެމަނިކުފާނުގެ އަމުރަށް ތަބާވާން ޖެހޭ ގޮތަށް ގައުމުގެ ކަންކަން ބައްޓަންކޯށް އަމަލުކުރާ ކަމުގެ ތުހުމަތު ގިނަ ބަޔަކު އަމާޒުކުރަމުން ދާ ދަނޑިވަޅެއްގައެވެ.