ޚާން ޔޫނިސްއަށް ދިން ހަމަލާގައި ޝަހީދުވި މީހެއް ގެންދަނީ / އަނަޑޮލު އަޖަންސި
ދުނިޔެ
ޚާން ޔޫނިސްއަށް ދިން ވައިގެ ހަމަލާތަކުގައި އިތުރު 10 މީހަކު ޝަހީދުވެއްޖެ
Hussain Nawaf
ހުސައިން ނަވާފް
31 މާރިޗު 2025

ސަހްޔޫނީ ސިފައިން ޣައްޒާގެ ދެކުނުގައި އޮންނަ ޚާން ޔޫނިސް އަށް ވައިގެ ހަމަލާތަކެއް ދީ ފިތުރު އީދު ބަންދުގެ ދެވަނަ ދުވަހު އިތުރު 10 މީހަކު ޝަހީދުވެއްޖެއެވެ.

ސަހްޔޫނީން ދިން ވައިގެ ހަމަލާއެއްގައި ގެއަކަށް އަމާޒުކޮށް ފަލަސްތީނުގެ ހަ މީހަކު ޝަހީދުވެ އިތުރު ބަޔަކު ޒަޚަމްވެފައިވާ ކަމަށް މަސްދަރުތަކުން ރިޕޯޓުކޮށްފައިވެއެވެ.

ޚާން ޔޫނިސް ރެފިއުޖީ ކޭމްޕްގެ އެހެން ގެއަކަށް ސަހްޔޫނީން ދިން ވައިގެ ހަމަލާއެއްގައި އިތުރު ހަތަރު މީހަކު ޝަހީދުވި ކަމަށްވެސް ރިޕޯޓުތަކުން ބުނެއެވެ.

ސަހްޔޫނީންގެ ހަނގުރާމަ މަތިންދާބޯޓުތައް ވެސް އިތުރު އެއް ގެއަކަށް ހަމަލާދިން ނަމަވެސް އެއްވެސް މީހަކަށް ގެއްލުމެއް ލިބުނުކަމަށް ރިޕޯޓުކޮށްފައި ނުވެއެވެ.

ފިތުރު އީދުގެ ފުރަތަމަ ޗުއްޓީ ދުވަސް ކަމަށްވާ ހުކުރު ދުވަހު ސަހްޔޫނީން ޣައްޒާގެ ހުރިހާ ހިސާބަކަށް ދިން ހަމަލާތަކުގައި ފަލަސްތީނުގެ 64 މީހަކު މަރުވެފައިވެ އެވެ.

ސަހްޔޫނީ ސިފައިން 18 މާޗްގައި ޣައްޒާގައި ވައިގެ ހަމަލާތަކެއް ދޭން ފެށިއިރު، 920 އަށް ވުރެ ގިނަ މީހުން ޝަހީދުކޮށްލާ، 2،000 އަށް ވުރެ ގިނަ މީހުން ޒަހަމްވެ، ހަނގުރާމަ ހުއްޓާލުމާއި ގައިދީން ބަދަލުކުރުމުގެ އެއްބަސްވުން ފުނޑުފުނޑުވިކަން ފާހަގަކޮށްލެވެއެވެ.

2023 ވަނަ އަހަރުގެ އޮކްޓޯބަރު މަހުން ފެށިގެން ސަހްޔޫނީން ޣައްޒާއަށް ދިން އަނިޔާވެރި ހަމަލާތަކުގެ ތެރެއިން ފަލަސްތީނުގެ 50،200 އަށް ވުރެ ގިނަ މީހުން ޝަހީދުވި އިރު ގިނައީ އަންހެނުންނާއި ކުޑަކުދިންނެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved