ޚާން ޔޫނިސްއަށް ހަމަލާދީ 7 ކުޑަކުދިންނާއެކު އެއް އާއިލާއެއްގެ 10 މެންބަރުން ޝަހީދުކޮށްލައިފި އެވެ.
ޣައްޒާގެ މަދަނީ ދިފާއީ އިދާރާއިން ބުނީ ހުކުރު ދުވަހުގެ ފަތިހުގެ ކުރިން ސަހްޔޫނީން ދިން ވައިގެ ހަމަލާއެއްގައި ދެކުނުގެ ޚާން ޔުނިސް ސިޓީގައި ހަތް ކުޑަކުދިންނާއެކު އެއް އާއިލާއެއްގެ 10 މީހުން ޝަހީދުކޮށްލާފައިވާ ކަމަށެވެ.
އެގޮތުން ޚާން ޔުނިސްގެ މެދުތެރޭގައި ހުންނަ އަލްފަރާ އާއިލާގެ ގެއަށް އަމާޒުކޮށް ސަހްޔޫނީން ދިން ވައިގެ ހަމަލާއާ ގުޅިގެން ޝަހީދުންގެ ގޮތުގައި ހަތް ކުޑަކުދިންނާއެކު 10 މީހަކު ހޮސްޕިޓަލަށް ގެނެސްފައިވާ ކަމަށެވެ.
މީގެ އިތުރުން ޣައްޒާގެ އުތުރުގައި އޮންނަ އަލް އަތާތުރާ އަވަށުގެ ބެއިތު ލަހިޔާގައި ފަލަސްތީނުގެ ބަޔަކަށް އިސަހްޔޫނީން ވަނީ ހަމަލާދީފައެވެ. އަލްޖަޒީރާ އަރަބިކްގައި ރިޕޯޓްކޮށްފައިވާ ގޮތުން ދެ މީހަކު ޝަހީދުވެ އެތައް ބަޔަކު ޒަހަމްވެފައިވެއެވެ.
އިސްރާއީލުން ޣައްޒާގެ އެކި ހިސާބުތަކަށް ދިން ހަމަލާތަކުގައި ބުރާސްފަތި ދުވަހުގެ ފަތިހުން ފެށިގެން ފަލަސްތީނުގެ 29 މީހުން ޝަހީދުވެފައިވާއިރު، އެ ސަރަހައްދުގެ އުތުރުގައި އޮންނަ ޣައްޒާ ސިޓީގައި 13 މީހަކު ވަނީ ޝަހީދު ކޮށްލާފައެވެ.
