ހއ. ހޯރަފުށީ ސިއްހީ މަރުކަޒުން 9 މަހުގެ ކުޑަ ކުއްޖެއްގެ ގަޔަށް 18 މަހުގައި ޖަހަން ޖެހޭ ވެކްސިން އެއް ޖެހި ކަމަށް އެ ކުއްޖާގެ އާއިލާއިން ބުނެފި އެވެ.

ހޯރަފުށީ ސިއްހީ މަރުކަޒުން ވަނީ މިކަމަށް އެއް ބަސްވެފަ އެވެ. އަދި މިފަދަ ކަމެއް ތަކުރާރު ނުވާނެ ހުރިހާ ހާލަތަކަށް މިހާރު ސަމާލުވެފައިވާނެ ކަމަށް އެ ރަށު މަރުކަޒުން މައުލޫމާތު ދެއެވެ.

އެ ކުއްޖާގެ ބައްޕަ އެކަމުގެ ކަންބޮޑުވުން ފާޅުކޮށް ސޯޝަލް މީޑިއާގައި ކުރު ޕޯސްޓެއްގައި ބުނީ އޭނާގެ 9 މަހުގެ ތުއްތު ދަރިފުޅަށް ސިއްހީ މަރުކަޒުން ނުބައި ވެކްސިންނެއް ދީފައިވާކަމަށެވެ. އެގޮތުން 9 މަހުގެ ތުއްތު ކުއްޖާގެ ގަޔަށް ސިއްހީ މަރުކަޒުން ދީފައިވަނީ 18 މަހުގެ ކުއްޖެއްގެ ގަޔަށް ޖަހަންޖެހޭ ވެކްސިންކަމަށް އެ ކުއްޖާގެ ބައްޕަ ވަނީ ބުނެފަ އެވެ.

އެ އާއިލާ އިން ބުނީ ނުބައި ވެކްސިން އެއް ކުއްޖާ އަށް ދިނުމަކީ އެއީ ސިއްހީ މަރުކަޒުގެ ފަރުވާ ކުޑަކަމުން ހިނގި ކަމެއް ކަމަށާއި މި މައްސަލަ ސީރިއަސް މައްސަލަ އެއްގެ ގޮތުގައި ބަލަން ބޭނުންވާ ކަމަށެވެ. އަދި ބުނީ މި މައްސަލަ ގައި އިހުމާލުވާ ފަރާތްތައް ޒިންމާދާރުކުރުވަން ބޭނުންވާ ކަމަށެވެ. ސަބަބަކީ ދެން ތަކުރާރު ވުމަށް ނޭދޭތީ ކަމަށް ވެސް އާއިލާ އިން ވަނީ ބުނެފަ އެވެ.

މިކަމާއި ގުޅިގެން ހޯރަފުށީ ސިއްހީ މަރުކަޒުގެ ހާލަތު ދައްވުމުގެ ޒިންމާ މި ސަރުކާރުން ނަގަން ޖެހޭނެ ކަމަށް ބުނެ ގިނަބަޔަކު އަންނަނީ އަޑު އުފުލަމުން ނެވެ. އަދި މިކަމުގެ ޒިންމާ ތަނުގެ ވެރިން ނަގަން ޖެހޭ ކަމަށް ވެސް އެ ރަށު ރައްޔިތުން ވަނީ ބުނެފަ އެވެ.

މި މައްސަލަ ހެލްތް މިނިސްޓްރީން ބަލަމުން އަންނަ ކަމަށް "ތޭރައޮންލައިން" އަށް ވަނީ އިނގިފަ އެވެ.