އީރާނާއި އެމެރިކާއާއި ދެމެދު އުފެދިފައިވާ ނުތަނަވަސްކަމުގެ ތެރެއިން އީރާނުން މިހާރު ބޭނުން ވަނީ ރާއްޖޭގެ ދެކުނުން އޮންނަ ޗާގޯސް ޖަޒީރާގައި ހިމެނޭ ޑިއެގޯ ގާސިއާއަށް ހަމަލާ ދޭން ކަމަށް ރިޕޯޓްތަކުން ބުނެފި އެވެ.

އިނގިރޭސިވިލާތުގެ ދަ ޓެލެގްރާފުން ރިޕޯޓުކޮށްފައިވާ ގޮތުގައި އެމެރިކާގެ ހަމަލާގެ ރައްދުގެ ގޮތުގައި އީރާނުން ޑިއެގޯ ގާސިއާގައި ހުންނަ އަސްކަރީ މަރުކަޒަށް ހަމަލާ ދީފާނެ ކަމަށް އެ ގައުމުގެ އަސްކަރިއްޔާގެ އޮފިޝަލަކު އެ ނޫހަށް ކަށަވަރުކޮށްދީފައިވެ އެވެ.

އެމެރިކާ އާއި އިނގިރޭސި ވިލާތް ގުޅިގެން އަސްކަރީ މަރުކަޒެއް ހިންގަމުން އަންނަ ޑިއެގޯ ގާސިއާއަށް އިރާނުން ހަމަލާދޭން ވިސްނަން ފެށީ އެމެރިކާއިން އިރާންއަށް ދީފާނެ އަސްކަރީ ހަމަލާއެއްގެ ރައްދުގައި އެވެ.

އީރާނުން ގަބޫލުކުރާ ގޮތުގައި އެ ގައުމަށް ހަމަލާދޭން އެމެރިކާއިން ބޭނުންކުރާނީ ޑިއެގޯ ގާސިއާގައި ހުންނަ މަރުކަޒެވެ. މިކަމަށް ބޭނުންކުރާނެ ކަމަށް ބެލެވޭ ބީ-2 ސްޕްރިޓް މަރުކާގެ އަސްކަރީ ވައިގެ އުޅަނދުތަކެއް މިދިޔަ ހަފުތާގެ ތެރޭ ޑިއެގޯ ގާސިއާއަށް އައިސްފައިވާ ކަމަށްވެސް ޓެލެގްރާފުން ރިޕޯޓުކޮށްފައިވެ އެވެ.

މި ހަފުތާގެ ތެރޭގައި، އެމެރިކާއިން ޑިއޭގޯ ގާޝިއާއަށް B-2 ބޮންއަޅާ ބޯޓްތައް ގެންގޮސްފައިވެ އެވެ.  މިއީ ވަރަށް ޚާއްސަކޮށް ފަރުމާކުރެވިފައިވާ މަތިންދާބޯޓުތަކެކެވެ. ރާޑަރުފަދަ ޑިފެންސް ސިސްޓަމްތަކަށް ނުފެންނަގޮތަށް ފަރުމާކޮށްފައިވާ މި މަތިންދާބޯޓުތައް ބޭނުންކުރާނީ ވަކި ކަނޑައެޅޭ އަމާޒުތަކަކަށް ހަމަލާދިނުމަށެވެ.

އެމެރިކާއިން މިހާރު އަންނަނީ އީރާނުގެ ތާއީދު އޮންނަ ޔަމަނުގެ ހޫޘީ ހަނގުރާމަވެރިންނަށް އަމާޒުކޮށް ހަމަލާތައް ދެމުންނެވެ. އެ ޖަމާއަތަށް ހަމަލާތައް ދޭން ފަށާފައިވަނީ ޣައްޒާއަށް އެހީގެ ސާމާނު ވެއްދުން އިސްރާއީލުން ހުއްޓުވާފައި އޮންނަ އޮތުމާ ދެކޮޅު ހެދުމުގެ ގޮތުން ރަތް ކަނޑުގައި އިސްރާއީލާއި އިސްރާއީލާއި ގުޅުން އޮންނަ އުޅަނދުތަކަށް އަލުން ހަަމަލާ ދޭން ފަށާނެކަން ހޫތީން އިއުލާނުކޮށްފައިވަނިކޮށެވެ.

އިންޑިއާ ކަނޑުގައި ރާއްޖޭގެ ދެކުނުން 500 ކިލޯ މީޓަރު ދުރުގައި އޮންނަ ޗާގޯޒް އައިލެންޑްސްގައި ހަތް އަތޮޅު ހިމެނެ އެވެ. މި އަތޮޅުތަކުގައި 60 ރަށް އެކުލެވެ އެވެ. ޑިއެގޯ ގާސިއާ އަކީ ޗާގޯސް ޖަޒީރާގެ އެންމެ ބޮޑު ރަށެވެ. އެ ރަށުގެ އެމެރިކާ އަދި އިނގިރޭސިވިލާތުގެ ޖުމްލަ 4،000 އެއްހާ ސިފައިން މަރުކަޒުވެގެން ތިބޭ ކަމަށް ރިޕޯޓުތައް ބުނެ އެވެ.

ޗާގޯސް ޖަޒީރާއަކީ ރާއްޖޭގެ މަސްލަހަތުވެސް އޮންނަ ތަނެކެވެ. އެގޮތުން ޗާގޯޒް، މޮރިޝަސްގެ ބާރުގެ ދަށަށް ދިޔުމުން ކޮންމެ ގައުމަކަށް ލިބޭ 200 މޭލުގެ ސަރަހައްދުގެ ތެރެއިން ރާއްޖެ އަށް ލިބޭ 200 މޭލުގެ ސަރަހައްދުގެ ތެރެއަށް މޮރިޝަސްގެ ސަރަހައްދު ވަދެ، ރާއްޖޭގެ އިގްތިސާދީ ސަރަހައްދުން ބައެއް ގެއްލިގެން ދިއުމުން އެބައި އަބުރާ ހޯދުމަކީ ރައީސް ޑރ. މުއިއްޒުގެ ރިޔާސީ ވައުދެކެވެ.

އެމެރިކާގެ އަސްކަރީ މަރުކަޒު ޑިއެގޯ ގާސިއާ އާއި އިރާނާ ދެމެދު ހަމަލާ ބަދަލުކުރަން ފަށައިފިނަމަ އެކަމުގެ އަސަރު ސީދާ ގޮތުންނާއި ނުސީދާގޮތުން ރާއްޖެއަށް ކުރާނެ ކަމަށް އަސްކަރީ ތަޖުރިބާކާރުން ދެކެ އެވެ.

ނަމަވެސް ރައީސް ޑރ. މުއިއްޒުގެ ހާރިޖީ ގުޅުންތަކުން މިކަމާ ގުޅިގެން އަދި ބަހެއް ނުބުނެ އެވެ. ފެންނަ ފެނުމަށް އިރާނަށްވުރެ ބޮޑަށް ސިޔާސީ ގޮތުން ރާއްޖެއާއި އެމެރިކާގެ ގުޅުން ރަނގަޅެވެ.

އެހެން ކަމުން ހަނގުރާމައެއް ފެށިއްޖެ ނަމަ ރާއްޖޭގެ ވައިގެ ބަދަރުތަކުގައި އެމެރިކާގެ އުޅަދުތައް ފިއުލްކުރުމަށާއި ދަރު ފެންތެލާއި ކޮށްތު ބަރުކުރަން މަޑުކުރުން ވަރަށް ގާތެވެ. ނަމަވެސް ދިވެހި ސަރުކާރުން މިކަމާ ގުޅިގެން އަދި ބަހެއް ނުބުނެ އެވެ.