ސްރީލަންކާއިން އާސަންދަ ހިދުމަތް ފޯރުކޮށްދޭ ގިނަ ހޮސްޕިޓަލްތަކަށް ދިވެހި ސަރުކާރުން ފައިސާ ނުދައްކާތީ އެތަންތަނުން ދިވެހިންނަށް ދޭ "އާސަންދަ" ހިދުމަތް މެދުކަނޑާލައިފި އެވެ.

ލަންކާއަށް މިވަގުތު ބޭސްފަރުވާއަށް ގޮސް ތިބި ދިވެހި އާއިލާއަކުން ބުނީ އާސިރީ ސާޖިކަލް ހޮސްޕިޓަލުން އާސަންދަ ދިނުން ހުއްޓާލައިފި ކަމަށް އެތަނުން މިއަދު އަންގައިފި ކަމަށާއި ބަލިމީހާ އޮޕަރޭޝަނަށް އެޑްމިޓް ކުރަން ހަމަޖެހިފަ އޮތީ މާދަމާ ކަމަށެވެ.

މިކަމުގެ ކަންބޮޑުވުން ފާޅުކޮށް އޭނާ ބުނީ އާސިރީ ސެންޓަރަލް ހޮސްޕިޓަލް އަދި އާސިރީ މެޓިކަލް ހޮސްޕިޓަލުން ވެސް އާސަންދަ ދެން ނުލިބޭނެ ކަމަށް ބުނެފައިވާ ކަމަށެވެ.

ލަންކާގައި ދިރިއުޅޭ އިތުރު ދިވެއްސަކު ބުނީ ދިވެހިން އެންމެ ގިނައިން ހިދުމަތް ހޯދާ "ލަންކާ ހޮސްޕިޓަލުން" ވެސް އާސަންދަ މިހާރު ނުލިބޭ ކަމަށާއި މި ހާލަތައް ދިޔައީ ދިވެހި ސަރުކާރުން ހޮސްޕިޓަލް ތަކަށް ދައްކަންޖެހޭ އެތައް މިލިއަން ރުފިޔާއެއް ނުދީ ހުރުމުން ކަމަށެވެ.

އޭނާ އިތުރަށް ބުނީ މިކަމާއި ގުޅިގެން ލަންކާ ހޮސްޕިޓަލުގައި އިންނަ "ދިވެހި ޑެސްކް" ގައި އެހުމުން އެމީހުން އަތުގައި ދޭނެ ޖަވާބެއް ނެތް ކަމަށާއި ނަމަވެސް މިވަގުތު އަލަށް އަންނަ ދިވެހިންނަށް އާސަންދައިން ހިދުމަތް ދިނުން ހުއްޓިފައިވާކަމަށް ބުނި ކަމަށެވެ.

ލަންކާގެ އަށް ހޮސްޕިޓަލެއް އާސަންދަ ކަވަރުކުރެ އެވެ. އެ ހުރިހާ ތަނެއްގެ ތެރެއިން ވެސް އެންމެ ގިނަ ދިވެހިން ހިދުމަތް ހޯދާ އެއް ހޮސްޕިޓަލަކީ ލަންކާ ހޮސްޕިޓަލް އެވެ.

މިކަމާ ގުޅިގެން އާސަންދަ އަށް ގުޅުމުން ބުނީ، ލަންކާ ހޮސްޕިޓަލްތަކުން އާސަންދަ ހިދުމަތް ހުއްޓާލި ސަބަބެއް އަދި ބުނަން ނޭނގޭ ކަމަށެވެ. ބަލަން ޖެހޭ ކަންކަން ބަލަމުން އަންނަ ކަމަށެވެ.

ލަންކާގެ ހޮސްޕިޓަލްތަކުން އާސަންދަ ހިދުމަތް މެދުކަނޑާލިއިރު ރައީސް ޑރ. މުއިއްޒުގެ ވައުދާ އެއްގޮތަށް ދުނިޔޭގައި އެންމެ ރަނގަޅު ބޭސްފަރުވާ ދޭ އަދި ސިއްހީ ހިދުމަތުގެ އަގު ބޮޑު ގައުމުތަކުގެ ތެރޭގައި ހިމެނޭ ތައިލެންޑާއި ޔޫއޭއީ އިން ވެސް ދިވެހިންނަށް އާސަންދައިގެ ހިދުމަތް ލިބެން ފަށާނެ ދުވަހެއް އަދި އިނގޭ މީހަކު އާސަންދައަކު ނޫޅެއެވެ.

ލަންކާގެ ހޮސްޕިޓަލްތަކުން އާސަންދަ ހިދުމަތް މެދުކަނޑާލިއިރު މިފަހުން ސަރުކާރުން ވަނީ އިނގިރޭސިވިލާތުގެ އެންމެ ކާމިޔާބު އެއް ފުޓްބޯޅަ ޓީމު ލިވަޕޫލް އެފްސީ ކްލަބާއެކު ސަރުކާރު އިސްތިހާރުކުރަން ސޮއިކޮށްފަ އެވެ.

މި އެއްބަސްވުމުގެ އަގަށް ދިވެހި ސަރުކާރުން 1.1 މިލިއަން ޑޮލަރު ލިވަޕޫލްއަށް ދައްކާނެ ކަން "ތޭރައޮންލައިން" އަށް ވަނީ ކަށަވަރުކުރެވިފަ އެވެ. މިއީ ބޭރު ބައެއް ހޮސްޕިޓަލްތަކަށް ދައްކަން ހުރި "ޕެންޑިން ފައިސާ" ދެއްކޭނެ ވަރު އަދަދެކެވެ.

މި އެއްބަސް ވުމުގެ އިތުރު މަޝްވަރާއަށް ރައީސް ޑރ. މުހައްމަދު މުއިއްޒު މިހާރު ހުންނެވީ އިނގިރޭސިވިލާތުގައި އެވެ. މިރޭ ލިވަޕޫލް އެވަޓަން ބައްދަލުކުރާ މެޗް ބައްލަވަން ރައީސް ވަޑައިގަތުން ވެސް ގާތެވެ.