ބިދޭސީއިންތަކެއްގެ މެދުގައި ބޮޑު މާރާމާރީއެއް ހިނގައި އެތައް ބަޔަކަށް އަނިޔާވެއްޖެއެވެ.
މައުލޫމާތު ލިބިފައިވާ ގޮތުގައި މާރާމާރީ ހިނގާފަައިވަނީ ވެލާނާ އިންޓަރނޭޝަނަލް އެއާޕޯޓުގެ ޓާމިނަލްގެ މަސައްކަތް ކުރަމުން އަންނަ ކޮންސްޓްރަކްޝަން ސައިޓެއްގައި މަސައްކަތް ކުރަމުންދިޔަ ބިދޭސީންތަކެއްގެ މެދުގައެވެ.
އެ މާރާމާރީގައި ގިނަ ބަޔަކަށް އަނިޔާވެގެން ހުޅުމާލޭ ހޮސްޕިޓަލުގައި ވަނީ ފަރުވާދޭން ފަށާފައެވެ. އެކި ވަރުގެ އަނިޔާވެގެން މަދުވެގެން 10 ބިދޭސީއަކަށް އެ ހޮސްޕިޓަލުގެ އެމަޖެންސީ ރޫމުގައި ފަރުވާދެމުން އަންނަ ކަމަށާ ނަމަވެސް އެއްވެސް މީހަކަށް ސީރިއަސް އަނިޔާއެއް ނުވާ ކަމަށް ހޮސްޕިޓަލުން މައުލޫމާތޫ ދީފައިވެއެވެ.
މައުލޫމާތު ލިބިފައިވާ ގޮތުގައި މާރާމާރީ ހިންގާފައި ވަނީ ސައިޓުގައި މަސައްކަތް ކުރި ޗައިނާ، ބަންގްލަދޭޝް އަދި އަރަބި ދަރިކޮޅުގެ ބަޔަކާ ދެމެދުގައެވެ.
މިކަމާ ގުޅިގެން ފުލުހުން މީޑިޔާތަކަށް ފޮނުވި މެސެޖުގައި ބުނެފައިވަނީ،ވެލާނާ އިންޓަރނޭޝަނަލް އެއާޕޯޓުގެ ޓާމިނަލްގެ މަސައްކަތް ކުރަމުންދާ ބިދޭސީންގެ މެދުގައި ހިނގި މާރާމާރީއެއްގައި ގިނަ ބަޔަކަށ ްއިނވާވެފައިވާ ކަމަށާ އެކަން ފުލުހުން މިހާރު ބަލަމުން ގެންދާ ކަމަށެވެ. ފުލުހުން ހާމަކުރި ގޮތުގައި އަނިޔާވި މީހުންނަށް ހުޅުމާލޭ ހޮސްޕިޓަލާ އަދި ޓްރީޓޮޕް ހޮސްޕިޓަލުގައިވެސް ދަނީ ފަރުވާ ދެމުންނެވެ. އަދި އިތުރު ތަފްސީލު އެ އިދާރާއަށް ލިބުނު މިންވަރަކުން ހާމަކުރާނެ ކަމަށްވެސް ބުނެފައިވެއެވެ.
ޓާމިނަލްގެ މަސައްކަތް ކުރަމުން ދަނީ ސައުދީ ބިންލާދިން ގްރޫޕާއި، ސަބް ކޮންޓްރެކްޓަރެއްގެ ގޮތުގައި މަސައްކަތް ކުރާ ޗައިނާ ކޮމިއުނިކޭޝަން ކޮންޓްރަކްޝަން ކޮމްޕެނީ (ސީސީސީސީ) އިންނެވެ.
މި މާރާމާރީ ހިނގަން މެދުވެރިވި ސަބަބެއް ވެސް އަދި ސާފެއް ނުވެ އެވެ.
