

ލ. އަތޮޅު މާވަށާ މާލެއާ ދޭތެރޭ ދަތުރު ކުރާ މުދާ އުފުލާ ބޯޓެއް ކަމަށްވާ "ހޮޅުދޫ ބޯޓޫ"ގައި ރޯވެ އަނދަމުންދާއިރު އެ ބޯޓުން ދަތުރުކުރަމުން ދިޔަ މީހުންގެ ތެރެއިން އެކަކު ވަނީ ގެއްލިފައި ކަމަށް އެމްއެންޑީއެފުން ހާމަކޮށްފިއެވެ.
ބޯޓުން މީހަކު ގެއްލިފައިވާ ކަމަށް "ތޭރަ އޮންލައިން"އަށް ލިބުނު މައުލޫމާތަކާ ގުޅިގެން ކުރި ސުވާލަށް ޖަވާބު ދެމުން އެމްއެންޑީއެފުގެ މީޑިޔާ އޮފިޝަލް ވިދާޅުވީ އެ ބޯޓުން ދަތުރުކުރަމުން ދިޔައި ބޯޓުގެ ކެޕްޓަނާ އެކު ޖުމްލަ 18 މީހުން ކަމަށަ އޭގެ ތެރެއިން 17 މީހުން ސަލާމަތްކުރެވިފައިވާ ކަމަށެވެ. ނަމަވެސް އަދި އެކަކު ހޯދާ ނުފެންނަ ކަމަށާ ގެއްލިފައިވަނީ ބޯޓުން ދަތުރުކުރަމުން ދިޔަ ލ. މާވަށަށް ނިސްބަތްވާ 25 އަހަރުގެ އަލީ މުޝްފިގް މުހައްމަދު ކަމަށްވެސް އެމްއެންޑީއެފުން މައުލޫމާތު ދީފައިވެއެވެ. މުޝްފިޤް ލައިގެން ހުރީ ނޫކުލައިގެ ޖޯޒީއެއްކަމަށް ބޯޓުގައި ދެންއުޅުނު މީހުން ބުނެފައިވެއެވެ.
"ތޭރަ އޮންލައިން"އަށް މައުލޫމާތު ލިބިފައިވާ ގޮތުގައި، ލ މާވަށުގައި ދުއްވާ "ހޮޅުދޫ ބޯޓު"ގައި ރޯވީ ހިރިލަންދޫއިން ފުރައިގެން މާލެ ދަތުރުކުރަމުން ދަނިކޮށްެ ތ. ކަނޑޫދޫ ކައިރިންނެވެ. ބޯޓު ހިރިލަންދޫ އިން ފުރާފައިވަނީ މިރޭ 08:22 ހާކަން އިރުއެވެ. މީގެ އިތުރުން 2 މީހަކަށް ތ.ކަނޑޫދޫ މަރުކަޒުގައި މިހާރު ފަރުވާދެމުން ގެންދާކަމުގެ މައުލޫމާތުވެސް ވަނީ ލިބިފައެވެ.
އެމްއެންޑީއެފުން ހިއްސާ ކުރި ވީޑިއޯއިން ފެންނަ ގޮތުގައި ބޯޓުގައިވަނީ އެއްކޮށް އަލިފާން ހިފާފައެވެ.