ކޮންމެ ބޭފުޅަކު ވެސް ވެރިކަމަށް ވަޑައިގެން ގާނޫނުތަކަށާ ގަވާއިދުތަކަށް ހިތުން ގެންނަވަނީ މޮޅެތި ބަދަލުތަކެއް ނަމަވެސް އެކަންކަމުގެ އުނދަގުލާ ތުރާ ޖެހޭ ބަޔަކީ އާންމު ރައްޔިތުން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ޕީއެންއެފުން އެންމެ ފަހުން ބޭއްވި ޖަލްސާގައި ގައުމުގެ އެކި ކަންކަމަށް އަލި އަޅުވާލައްވާ ދެއްކެވި ވާހަކަފުޅުގައެވެ.

އެގޮތުން އެމަނިކުފާނު ވަނީ ޚިޔާލުފާޅުކުރުމުގެ މިނިވަންކަމަށް މި ސަރުކާރުން ވެސް އަރައިގަންނަމުންދާކަން ފާހަގަކުރައްވާފައެވެ. އެއީ އެމްޑީޕީއިން އިހުތިޖާޖުތަކަށް ނުކުތުުން ފުލުހުންނާ ސިފައިންވެސް މެދުވެރިކޮށް އެކަމަށް ހުރަސް އަޅާފައިވާވުން ކަން ފާހަގަކުރައްވާ ރައީސް ޔާމީން ވިދާޅުވީ ސިފައިން ނެރެގެން އިހުތިޖާޖުތަކަށް ހުރަސް އެޅުމަކީ ގާނޫނާ ޚިލާފުކަމެއް ނަމަވެސް ރައީސް މުހައްމަދު ނަޝީދުގެ ޒައާމަތުގައި ފަނޑިޔާރުގެތަކުގެ ގާނޫނަށް ގެނައި އިސްލާހާ އެކު އެފަދަ ކަންކަން ބެލުމުގެ ބާރު ފަނޑިޔާރުންގެ ކިބައިން ނިގުޅިފައިވާ ކަމަށެވެ. އެހެންކަމުން ރައްޔިތުންގެ ޚިޔާލުފާޅުކުރުމުގެ މިނިވަންކަމަށް ސިފައިން މެދުވެރިކޮށް އަރައިގަތަސް ރައްޔިތުންގެ ހައްގުގައި ބަސްބުނެވޭނެ ބަޔަކު ނެތް ކަމަށް ރައީސް ޔާމީން ވިދާޅުވިއެވެ.

މީގެ އިތުރުން ރައީސް ޔާމީން ވަނީ ރައީސް މުހައްމަދު މުއިއްޒު ވެސް ފަނޑިޔާރުންގެ ގާނޫނަށް ގެނައި ބަދަލު ފާހަގަކުރައްވާ އޭގެ ސަބަބުން މިހާރު އެންމެ މަތީ ކޯޓުގައި ދުސްތޫރީ މައްސަލައެއް ވެސް އެހެން މައްސަލައެއް ބަލަންވިޔަސް ފަނޑިޔާރުން ނުވެގެން އުޅެން ޖެހޭ ކަމަށް ވިދާޅުވެފައެވެ.

ރައީސް ޔާމީން ވިދާޅުވީ އެހެންކަމުން ވެރިން ހިތުން ކުރާ މޮޅެތި ކަންކަމުގެ ސަބަބުން ގެއްލުމާ އުނދަގުލާ ތުރާ ވެސް ޖެހެނީ ރައްޔިތުންނަށް ކަމަށެވެ.

ރައީސް ޔާމީން ވަނީ އެހެންކަމުން ވެރިން ގާނޫނީ އިމުގެ ތެރެއަށް ރުޖޫއަވުމަށް އިލްތިމާސްކުރައްވާފައެވެ.