މާލެ، ވިލިމާލެ، ހުޅުމާލޭގައި ކާބޯތަކެތީގެ ހިދުމަތް ދޭ ތަންތަން ބަލައި ފާސްކުރަން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ނިންމައިފިއެވެ.

އެޗްޕީއޭ އިން ކުރި އިއުލާނެއްގައި ވާގޮތުން ރޯދަ މަސް ފެށުމުގެ ކުރިން ކުރިއަށް ގެންދާ ހާއްސަ އިންސްޕެކްޝަނަކީ ކާބޯތަކެތީގެ ހިދުމަތް ދޭ ތަންތަނުގެ ސާފުތާހިރުކަމުގެ މިންގަނޑުތައް ދެމެހެއްޓުމަށް ބާރުއެޅުމަށާއި އާންމު ސިއްހަތަށް ރައްކާތެރި ގޮތުގައި ހިދުމަތް ދިނުމަށް ބާރުވެރިކޮށް، އަހުލުވެރިކުރުމުގެ މަގުސަދުގައި ކުރިއަށް ގެންދިއުމަށް ނިންމާފައިވާ އިންސްޕެކްޝަނެއް ކަމަށެވެ.

މި އިންސްޕެކްޝަން ފެށުމަށް ހަމަޖެހިފައި ވަނީ އަންނަ އާދިއްތަ ދުވަހުއެވެ.

މި ހަރަކާތް ކުރިއަށް ގެންދާނީ މާލޭ ސިޓީ ކައުންސިލާއި އެޗްޑީސީ އާއި ހުޅުމާލެ ހޮސްޕިޓަލާއި ކަމާ ބެހޭ އެހެން އިދާރާތަކާ ވެސް ގުޅިގެންކަމަށް މައުލޫމާތުލިބެެއެވެ.

ކާބޯތަކެތީގެ ހިދުމަތް ދޭ ތަންތަން ބަލައި ތަފާތު އެކިއެކި އިންސްޕެކްޝަންތައް އެޗްޕީއޭ އިން މީގެކުރިން ވެސް ފުރިހަމަކޮށްފައިވާކަން ފާހަގަކޮށްލެވެއެވެ.

އެ އިންސްޕެކްޝަންތަކުގައި ކާބޯތަކެތީގެ ހިދުމަތްދޭ ބައެއް ތަންތަނުގައި ހުރި ބޮޑެތި މައްސަލަތައް ފާހަގަވެގެން އެކަންކަން ރަނގަޅު ކުރަން އަންގައި ބަންދުކޮށްފައިވާކަންބެސް ފާހަގަކޮށްލެވެއެވެ.