ކޮރަޕްޝަންގެ އެތައް ތުހުމަތެއް ގޭސް ކުންފުނީގެ މެނޭޖިންގ ޑިރެކްޓަރ އަބްދުﷲ މުހައްމަދު ކުރެވޭ އިރު މަގާމުގައި ދެމި ހުންނާތީ އެކަމުގެ ކަންބޮޑުވުން ޕީޕަލްސް ނޭޝަނަލް ފްރަންޓް ޕީއެންއެފްގެ ސެކްރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.
މަލީހު ކަންބޮޑުވުން ފާޅުކޮށް އެކްސްގައިވަނީ ޕޯސްޓެއްކޮށްފައެވެ.
އެގޮތުން އެ ޕޯސްޓުގައި ބޯފަން އަބްދުﷲ މިހާރު ހުންނަންޖެހެނީ ފުލުހުންގެ އިދާރާގަ ތަހުޤީޤަށް ހާޒިރުވެކަމަށް މަލީހުވަނީ ފާހަގަ ކުރައްވާފައެވެ.
ބޯފަން އަބްދުﷲ ގޭސް ކުންފުނީގެ ހަތަރު ފާރުތެރެއަށް ވެއްދުމަކީ ހެކި ނައްތާލަން ލިބޭ ފުރުސަތެއްކަމަށް ސިފަކޮށް އޭނާއަށް ކުންފުނި ތެރެއަށް ވަދެވިގެން ނުވާނެކަމަށް މަލީހު ވިދާޅުވެ އެ ކަމާއި ގުޅިގެން ކަންބޮޑުވުން ފާޅު ކުރެއްވިއެވެ.
ގޭސް ފުޅިގަނޑުން ވައްކަންކުރަން ފެށުމުން ރައީސް މުއިއްޒުގެ ސަރުކާރު ހިނގާގޮތް ހާމަވާކަމަށް މަލީހުގެ ޕޯސްޓުގައިވަނީ ފާހަގަ ކުރައްވާފައެވެ.
ބޯފަން އަބްދުﷲގެ މައްޗަށް ރިޝްވަތު ގަބޫލުކުރުމުގެ ޖުމުލަ ހަތް ދައުވާއެއް ވަނީ އުފުލައިފައެވެ. މި ހަތް މުއާމަލާތާ ގުޅިގެން ރިޝްވަތުގެ ގޮތުގައި އަބްދުﷲ މުހައްމަދާއި އޭނާއާ ގުޅުންހުރި މީހުންނާއި ކުންފުނިތަކުގެ އެކައުންޓަށް ޖުމުލަ 298،403.5 ޑޮލަރު ޖަމާކޮށްފައިވާ ކަމަށް ޕީޖީ އޮފީހުން މީގެ ކުރިންވަނީ ހާމަކޮށްފައެވެ.
