ހިޔާލު ފާޅުކުރުމުގެ މިނިވަންކަމާއި، ނޫސްވެރިކަމުގެ މިނިވަންކަމަކީ ޤާނޫނު އަސާސީގެ 27 އަދި 28 ވަނަ މާއްދާގައިވާގޮތުން ލިބިގެންވާ މިނިވަންކަމެކެވެ. އެ ނޫސްވެރިއެއްގެ ހިޔާލު ފާޅުކުރުމަށް އެއްވެސް ހުރަހެއް އެޅިގެން ނުވާނެއެވެ. ސަރުކާރު ޖަވާބުދާރީ ކުރުމަށްޓަކައި ނޫސްވެރިން ކުރާ މަސައްކަތަކީ ވެސް ހަމަ ނޫސްވެރިކަމެވެ.

ނިމިދިޔަ ފަސް އަހަރު ވެރިކަމުގައި ހުންނެވި ރައީސް އިބްރާހިމް މުހައްމަދު ޞާލިހް ވަރަށް ގިނަ މީޑިޔާތަކެއް ބްލެކް ލިސްޓް ކުރައްވައިގެން އުޅުނު މަންޒަރު ފެނިގެންދިޔައެވެ. މިކަމަށް ނިމުމެއް ގެނެސްދެއްވާނެކަމަށް ވިދާޅުވެ ވެރިކަމަށް އަރައި ވަޑައިގަތީ ރައީސް ޔާމީން މިނިވަންކޮށްދެއްވާނަމޭ ވިދާޅުވެ ކެމްޕެއިން ކުރެއްވި ފަރާތެކެވެ.

އިންތިޚާބްވެ ވަޑައިގަތުމަށްފަހު، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސޯޝަލް ސެންޓަރުގައި ރާއްޖޭގެ ހުރިހާ މީޑިޔާތަކަށް ދައުވަތު ދެއްވާ "މީިޑިޔާ ގުންޒަރު" ގެ ނަމުގައި ހަފްލާއެއްވެސް ވަނީ ބާއްވާފައެވެ. އެ ހަފްލާގައި ހީވީ ދެން ނޫސްވެރިންނަށް އެ މިނިވަންކަން ލިބުނީކަމަށެވެ. އެއްވެސް މީޑިޔާއެއް މިވެރިޔާ ބާކީ ނުކުރައްވާނެކަމަށެވެ. މުޅިންވެސް ކުށްހީއެވެ. އެއްވެސް ހާލަތެއްގައި ސަރުކާރަށް ސަނާ ނުކިޔާ ކަމުގައިވާ ނަމަ ސަރުކާރުން ހަމަ ބްލެކް ލިސްޓް ކުރެއެވެ.

މިއީ ކިހާވަރެއްގެ ހަގީގަތެއްކަން ހުރިހާ ފަރާތްތަކަށްވެސް އެނގޭނެއެވެ. ސަރުކާރުން ބޮޑެތި ވައުދުތައް ފުއްދާކަމަށް އެބަ ދައުވާކުރެއެވެ. އެ ވައުދުތައް ފުއްދަވައިފިންތޯ ސުވާލު އުފެއްދުމުން ސުވާލަށް ޖަވާބު ދެއްވާނެ ފަރާތެއް ސަރުކާރުގައި ނުހުރެއެވެ. މައުލޫމާތު ނޫސްވެރިންނާ ހަމަޔަށް ގެނެސްދެއްވާނެ ފަރާތެއް ސަރުކާރުން އައްޔަން ކުރައްވާނެ ދުވަހަކަށް ބްލެކް ލިސްޓްކުރެވިފައިވާ ނޫސްތަކުން މި އަންނަނީ އިންތިޒާރު ކުރަމުންނެވެ. އެ މައުލޫމާތުތައްވެސް ދޭން ބޭނުންވާ ނޫސްތަކަށް ދެއްވާ މަންޒަރު ފެނެއެވެ. ބާކީވެފައިވާ އިހްސާސް އެދުވަހުވެސް ކުރެވުނެވެ. އެކަން ނިމުމަކަށް އައިކަމަށް ހެވި ދިއްލިފައި އިންދާ ހަމަ އެއްތާކު މިޖެހުނީ ވަރަށް ބާރަށެވެ.

ބާކީ ނުކޮށް ހަމަ ހަމަ ކަންމަތީ ހުރިހާ ނޫހަކަށްވެސް މައުލޫމާތު ދެއްވާނެކަމަށް ވިދާޅުވަމުންދާ ސަރުކާރުގެ އެތައްކަމެއް ނޭނގި އެބަހުއްޓެވެ. ބޮޑެތި އެއްބަސްވުންތަކުގެ މައުލޫމާތުވެސް ހާމަ ނުކުރައްވައެވެ. ބޭރުގެ ގައުމަށް ދަތުރުތައް އެބަ ކުރައްވައެވެ. ގައުމުތަކަށް ދަތުރުކުރައްވާ އިރު ބޭނުންވާ މީޑިޔާތައް ގޮވައިގެން އުޅުއްވައެވެ. ބްލެކް ލިސްޓް ނުކުރާނެކަމަށް ވިދާޅުވި އިރު މީޑިޔާ ދައުވަތު ވެސް ބައެއް މީޑިޔާތަކަށް ނުދެއްވައެވެ.

ހަމަ ހުރިހާ ކަމެއްގައިވެސް މި ސަރުކާރުން ދޯހަޅީއެވެ. ނޫސްތައް ބްލޮކް ކުރުމާއި ބްލެކް ލިސްޓް ކުރުމުގައި ސަރުކާރުން އުޅެނީ އަވަދިނެތިއެވެ. މި ސަބަބާހުރެ ރައީސް އޮފީހުގެ ތަރުޖަމާނެއްވެސް އައްޔަން ކުރައްވަން ހަނދުމަފުޅުނެތުނީކަމަށް ބަލައި ނިންމާލާނީއެވެ. އަދިވެސް އެއްފަހަރު އަޅުގަނޑު ނޫސްވެރިއެއްގެ ހައިސިއްޔަތުން ސަރުކާރަށް ސުވާލެއް އަމާޒުކޮށްލާނަން، މީޑީޔާތަށް ބްލެކް ލިސްޓް ނުކުރައްވާނަމޭތޯ ވިދާޅުވީ؟