ރާއްޖެ އިން މަދުން ނަމަވެސް ޕެރައިންފްލުއެންޒާ ވައިރަސް ފެންނަމުން އަންނަ ކަމަށް އައިޖީއެމްއެޗް ގެ ކުޑަކުދިންގެ ހާއްސަ ޑރ. އަހުމަދު ފައިސަލް ވިދާޅުވެއްޖެއެވެ.

ފައިސަލް އެގޮތަށް ވިދާޅުވި އިރު، ރާއްޖެއިން ޕެރައިންފްލުއެންޒާ ވައިރަސް ޖެހިގެން އުމުރުން ހަ އަހަރުގެ އަންހެން ކުއްޖަކު ހުކުރު ދުވަހުގެ ރޭ ވަނީ ނިޔާވެފައެވެ. އއ. ބޮޑުފުޅަދޫއަށް އުފަން އެ ކުއްޖާ އަށް މި ބަލި ޖެހިގެން އައިޖީއެމްއެޗްގައި ފަރުވާ ދޭން ފެށީ މީގެ ހަ ދުވަސް ކުރިންކަމަށްވެސް މައުލޫމާތުލިބިފައިވެއެވެ.

ފައިސަލް ވިދާޅުވީ ޕެރައިންފްލުއެންޒާ އާއި އިންފްލުއެންޒާއަކީ ދެ ވައިރަހެއް ކަމަށެވެ.

ފެތުރޭ ގޮތާއި ބަލީގެ އަސަރު ކުރާ ތަންތަނާއި އަދި ނުރައްކާ އޮންނަ އުމުރާއި ބަލި މީހުން އެއްގޮތް ކަމެއް ހުއްޓަސް، ދުނިޔޭގައި ޕެރައިންފްލުއެންޒާއަކަށް ވެކްސިނެއް އަދި ބޭހެއް ވެސް ނެތް ކަމަށް އޭނާ ވިދާޅުވިއެވެ.

ފައިސަލް ވިދާޅުވި ގޮތުގައި މި ވައިރަހަކީ ކޮންމެ މީހަކަށް ވެސް ޖެހިދާނެ ވައިރަސްއެކެވެ.

ފައިސަލް ވިދާޅުވީ ބަލިން ރައްކާތެރިވުމަށް ކުރެވޭނެ ކަންކަމުގެ ތެރޭގައި އަތް ދޮވުމާއި މާސްކް އެޅުމާއި ބަލިވެއްޖެ ނަމަ، ސްކޫލަށް ނުދިއުން ހިމެނޭ ކަމަށެވެ.

އަދި ކުއްޖާގެ މަންމަގެ އެންޓި ބޮޑީސް އިން ކުދިންނަށް ރައްކާތެރިކަން ލިބޭނެތީ ގާތުން ދިނުމަކީ ކުރެވިދާނެ ކަންކަން ކަމަށް ފައިސަލް ވަނީ ވިދާޅުވެފައެވެ.