މަގޫދޫގައި އަޅަމުން ދިޔަ އެއަރޕޯޓް ނިލަންދުއަށް ބަދަލުކުރަން ނިންމި ނިމްމުން އެއީ ކަޑައެޅިގެން ރައިސް ޑރ. މުޙައްމަދު މުއިއްޒުގެ އަމިއްލަ އާއިލީ ބޭނުމަކަށް ނިންމާފައިވާ ނިންމުމެއްކަމަށް ރައީސް އަބްދު ﷲ ޔާމީން ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ބުރާސްފަތި ދުވަހުގެ ރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުންނެވެ.
މަގޫދޫ އެއަރޕޯޓުގެ ޕުރޮޖެކްޓަކީ މިހާތަނަށް އަށްޑިހަ ޕަސެންޓު މަސައްކަތް ނިމިފައިވާ ޕޮރްޖެކްޓަކަށް ވާއިރު ދިހަވަރަކަށް މިނިޓުގެ ރާސްތާއަކުން ދަތުރުކުރެވޭ ނިލަންދޫގައި އެއަރޕޯޓް ބަދަލުކުރުމަކީ މަގޫދޫ ރައްޔިތުންނާއި މެދު ކުރެވޭ ވަރަށް ބޮޑު ނާއިންސާފީ އަމަލެއް ކަން ރައީސް ޔާމީން ފާހަގަކުރެއްވިއެވެ.
އެއާރޕޯޓް މަސައްކަތް މަޑުޖައްސާލަން ސަރުކާރުން ނިންމާފައި ޗެނަލް13އިން ގެނެސްދިން މަޑިސީލަ ޕްރޮގުރާމުގައި މަގޫދު ރައްޔިތުންގެ އިހުސާސާ ބަސް ގެނެސްދިނުމުން ކަމާ އަދި އެއާއި އެކު ޖެހިގެން އައި ދުވަހު ސަރުކާރުން ޓީމެއް އެ ޕްރޮޖެކްޓް ދިރާސާކުރަން ފޮނުވުމުގެ އެއްވެސް މާނައެއް ނެއްކަމަށްވެސް އެމަނިކުފާނު ވިދާޅުވެފައިވެއެވެ. އަދި އެހެންމެ މިހާ ބޮޑު ޕޮރޮޖެކްޓެއް ކުރިޔަށްދާއިރު ސަރުކާރުން ކުރީޒަމާނުގައި އިންތިހާބާއި ދިމާކޮށް ކަޑަޖަހަން މީހުން ފޮނުވާ އުސޫލުން މިހުން ފޮނުވުމުގެ ބޭނުމެއް ނެއްކަން ވެސް މިޖަލަސާގައި ރައިސް ޔާމިން ވަނީ ފާހަގަ ކުރައްވާފައެވެ.
މަގޫދޫ ރައްޔިތުންނަށް ހިތްވަރު ދޫކޮށްނުލުމަށާއި އަދި އެއަރޕޯޓު އޮންނަން އެންމެ ރަގަޅު ރަށަކީވެސް މަގޫދޫ ކަމަށް މިޖަލްސާގައި ރައީސް ޔާމިނު ވަނީ ވިދާޅުވެފައެވެ. އަދި ހަމައެއާއިއެކު މި ޕްރޮޖެކްޓަކީ ފަށާފައިވާ މަސައްކަތެއް ކަމުން މިހާހިސާބައް ގެންދިއުމަށްފަހު ހުއްޓާލުމަކީ ސަރުކާރުން ކުރެވޭ ބޭކާރު ހަރަދެއްކަން ވެސް ފާހަގަކުރައްވާފައިވެއެވެ.
