އަޑަށް ބާރުލާފައި ބަޔަކު މީހުން ދެއްކި ވާހަކަތައް ހަނދާން އެބަހުރިތޯއެވެ. ވޭތުވެގެން ދިޔަ ފަސް އަހަރު ވެރިކަން ކުރެއްވީ ނަމުން ޞާލިހް އަދި ކަމުން ޖާހިލް ބޭފުޅެކޭ ބަޔަކު މީހުން ކިޔާތީ އަޑުއިވެއެވެ. އެ ފަސް އަހަރު ނުހިނގާ ކަމެއްނެތީއެވެ. އިދިކޮޅުގައި އޮވެ އަދުގެ ސަރުކާރުން ދިޔައީ ވެރިކަން ލިބިއްޖިއްޔާ ހުރިހާ ކަމެއްވެސް ފަޅައިއަރުވާނެކަމަށް ބުނަމުންނެވެ.

މިއޮތީ ވެރިކަން ލިބިފައެވެ. ހަމަގައިމުވެސް މިއަދު ވެރިކަން ކުރަން ހުންނެވީ އިބްރާހިމް މުހައްމަދު ޞާލިހެއް ނޫނެވެ. 2023 ވަނަ އަހަރުގެ ރިޔާސީ އިންތިޚާބްގެ ކެމްޕެއިން ދުވަސްވަރު ރައްޔިތުންނަށް އެވެނި. މިވެނި ކަމެއް ކޮށްދެއްވާނެކަމަށް ވައުދުވެވަޑައިގެންފައިވެއެވެ. މުސްކުޅިން ބުނެއުޅެއެވެ. ކަމެއް ބޭނުންވީމާ، އުޑުން ތަރިތަކާއި ހަނދު ބާލާއިދޭނެކަމަށް ކިޔަންފަށާނެއެވެ. ކަންވެ ނިމުނީވެސް ހަމަ އެފަދައިންނެވެ.

2019 ވަނަ އަހަރު މޯލްޑިވިއަން ޑިމޮކްރަސީ ނެޓްވޯކް (އެމްޑީއެން) ކިޔާ ޖަމުއިއްޔާއަކުން ޕްރިލިމިނަރީ އެސެސްމަންޓް އޮފް ރެޑިކަލައިޒޭޝަން އިންދަ މޯލްޑިވްސްގެ ނަމުގައި ނެރުނު ރިޕޯޓުގައި އިސްލާމްދީނުގެ ހުކުމްފުޅުތަކަށް ގޮންޖަހާފައިވެ އެވެ. އަދި ސުކޫލުތަކުގައި ދަރިވަރުންނަށް ކިޔަވައިދޭ ދީނީ މުގައްރަރު ބަދަލުކުރުމަށް ގޮވާލާފައިވެއެވެ.
100 އަށްވުރެ ގިނަ ދީނީ އިލްމުވެރިން އެ ރިޕޯޓާއި ދެކޮޅަށް ބަޔާން ނެރުނުއިރު 100 އެތައް ކައުންސިލަކުން އެ ރިޕޯޓު ކުށްވެރިކޮށް، އެމްޑީއެން އުވާލުމަށް ކުރީގެ ސަރުކާރަށް ގޮވާލާފައިވޭ... އެމްޑީއެންއާއި ދެކޮޅަށް ރާއްޖޭގެ ރައްޔިތުން ނިކުމެ މުޒާހަރާ ކުރުމުން ވެސް އުވާލީ ޖަމުއިއްޔާގެ 3 އަކުރު އެކަނި ކަން ވެސް ފާހަގަކޮށްލެވެއެވެ.
މިހާތަނަށް ވެސް އެ ރިޕޯޓު އެކުލަވާލި މީހުންނަށް ފިޔަވަޅެއް ނާޅާ.. ރައީސް އިބްރާހިމް މުހައްމަދު ޞާލިހް 5 އަހަރު ވެރިކަން ނިންމާލީ ލާދީނީ އެމްޑީއެން ރިޕޯޓު ނެރުނު މީހުންނަށް ރައްޔިތުންގެ ޓެކްސް ފައިސާއިން 5 އަހަރު ވަންދެން ބޮޑު މުސާރަ ދީފައި. މިކަމަށްވެސް ނިމުމެއް އައި ކަމަށް ހީކޮށް ހުއްޓާ ދެން މި ފެނުނީ އެޔަށްވުރެވެސް ތަފާތު މަންޒަރެއް! މި މީހުން މިކަމާ ވެގެން އުޅޭ މަންޒަރެއް ވެސް ނުފެނެއެވެ.

ރައީސް ޞާލިހްގެ ސަރުކާރުގެ ކުންފުނިތަކުގެ އެމްޑީންވެސް އުޅުނީ ހަމަ ކޮރަޕްޝަނާވެގެންނޭ ބުނެފިއްޔާ ގަބޫލުކުރާނެ މީހަކުވާނެތޯ؟ ހަމަގައިމުވެސް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ގެ އޭރުގެ މެނޭޖިންގ ޑިރެކްޓާރ މޫސާ އަލީ މަނިކް ގެ ވާހަކަ މި ރިޕޯޓްގައި ނުލިޔަނީހެން ފުރިހަމަވެސް ނުވާނެކަން ޔަގީނެވެ. މޫކޭ އަކީ ކޮރަޕްޝަނާއި ވައްކަމުގެ ބައްޕައެވެ. އެ ކުންފުނިން ކެއިހާ ލާރި ކޮބައިތޯވެސް މި ވެރިން އަހާވެސް ނުލައެވެ. މޫކޭ އާއި އޭނާގެ ޅިޔަނު ޔާސިރު މުޅި ކުންފުނި ބަނގުރޫޓު ކޮށްފައި ދިޔުމުން ފިޔަވަޅެއްވެސް އަޅަން މިވެރިންނަށް ނުކެރެއެވެ.

ހަމަ ތެދެކެވެ. އޭރު ކެނޑީ ހުސް ފޮންޏެވެ. ވޭތުވެގެން ދިޔަ ފަސް އަހަރު ފެނަކަ ކުންފުންޏަަށްވެސް ހަދާފައި އޮތީ ބޭނުން އެއްޗެކެވެ. މިކަންކަން ހަމަ ރައީސް މުއިއްޒަށް ނޭނގެނީކީވެސް ނޫނެވެ. އެބަ އެނގެއެވެ. ނަމަވެސް ބޮޑާވެފައި ހުރުން މާ މޮޅީ ކަންނޭނގެއެވެ.

ކަންކަން މިހުރީ މިހެންްނެވެ. ވެރިޔަކު އަރައި ފައިބައިގެން ދިޔައިރު މުޅި ރާއްޖެދަވާލައިފިއެެވެ. މިކަމަަށް ހައްލު ގެންނަން އައި ވެރިޔާގެ ވެސް މަގްސަދު ހުރީ ފައިސާ ކައިގެން ބަނޑު ފުރުމެެވެ. ކުށް ކުރި މީހުން ތިބީ ދެއަތް އުރައިގެން އުފަލުންނެވެ. އެމީހުންނަށް ފިޔަވަޅު އަޅާނެ މީހެއް ނެތީމަތާއެެވެ.

އެމްޑީއެން ރިޕޯޓްވެސް، އިންޑިޔާ ސިފައިންވެސް، ގޮތް ނޭނގޭ މަރުތަކެވެ. އާރްޑީސީ އާއި ފެނަކައެވެ. ކެއި ބަޔަކު ކައިފިއެވެ. އިތުރަށް ކެވޭތޯ ބަޔަކު އެބަ އުޅެއެވެ.