މިދިޔަ ހޮނިހިރު ދުވަހު 14 ގަޑިއިރަށް ދެމިގެން ދިޔަ ރައީށް ޑރ މުހައްމަދު މުއިއްޒުގެ ނޫސްވެރިންގެ ބައްދަލުވުމުން ރައްޔިތުންނަށް ލިބުނު އުއްމީދީ ކަމެއް ނެތް ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ

ޕީއެންއެފުން އަންގާރަ ދުވަހުގެރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ނޫސްވެރިންގެ ބައްދަލުވުމަށް ފެކުއަލް ހެއްކާ އެކު ނޫސްވެރިން ގޮސް ސުވާލު ކުރުމުން ވެސް ފެނިގެން ދިޔައީ ރައީސް މުއިއްޒު އެކަންކަން ދޮގުކުރަން މަސައްކަތް ކުރި މަންޒަރު ކަމަށާ އަދި ނޫސްވެރިން ދޫ ނުދިނުމުން ދެން ފެނިގެން ދިޔައީ އާދައިގެ މަތިން ރައީސް މުއިއްޒުގެ އަމަލުފުޅެއް ކަމަށްވާ ޔޫޓާން ނެންގެވި މަންޒަރު ކަމަށެވެ.

އެމަނިކުފާނު ވަނީ ނޫސްވެރިންގެ ބައްދަލުވުން ދިގުވެގެން ދިޔަ ދިއުމާ ގުޅިގެން ޕީއެންސީއާ އަދި ސަރުކާރު ޕްރޮމޯޓުކުރާ ބޮޓުން މާމޮޅުކަމަކަށް ހަދާ އެ ވާހަކަ އިޝްތިހާރުކުރުަމުންދާ ދިއުމަށް ވެސް އިޝާރާތްކުރައްވާ ވާހަކަފުޅު ދައްކަވާފައެވެ.

އެގޮތުން ރައީސް ޔާމީން ވިދާޅުވީ، އެއްޗެއް ދިގުވުމަކީ އޭގައި އޮއްޓަރު ހުރުމެއް ނޫން ކަމަށާ 14 ގަޑިއިރުގެ ތެރޭގައި ރައީސުލްޖުމްހޫރިއްޔާ ދެއްވީ ދޭސީ ޖަވާބުތަކެއް ކަމަށެވެ.

ނޫސްވެރިންގެ ބައްދަލުވުމުގައި ފެނިގެން ދިޔައީ ރައީސް މުއިއްޒުގެ ކެތްެރިކަން ވެސް ނެތް މިންވަރު ކަމަށް ރައީސް ޔާމީން ވިދާޅުވިއެވެ.