ރައީސް ޑރ. މުހައްމަދު މުއިއްޒުއަށް ވުރެ އަވަހަށް ދިވެހިރާއްޖޭގައި ޕޮޕިއުލަރިޓީ ވެއްޓުނު ރައިސްއެއް ނުހުންނާނެ ކަމުގައި ޕީއެންއެފްގެ އިސް ސަފުގައި މަސައްކަތް ކުރާ، މުހައްމަދު އަހުމަދު ވަހީދު (ވައްޑެ) ހާމަކޮށްފިއެވެ.

ޗެނަލް 13ގެ ނިއުސް ޓޯކް ޕްރޮގްރާމްގައި ވާހަކަ ދައްކަވަމުން ވައްޑެ ހާމަކުރެއްވީ، މިއަދުވެސް ރައީސް ޑރ. މުއިއްޒުއަށް އިހުތިރާމަކާއި ކުލުނެއް ލިބިވަޑައި ގަންނަވާނަމަ އެލިބިވަޑައި ގަންނަވަނީ ރައީސް ޔާމީން އާއި ޕީޕީއެމްއަށް އޮތް ސަޕޯޓު ކަމުގައެވެ.

ރައީސް މުއިއްޒު އަކީ ނިޢުމަތްތަކަށް ޝުކުރުވެރިވާ ފަރާތެއް ނޫން ކަމަށާއި ސިޔާސީ ޝަރީއަތެއް ކޮށް ސިޔާސީ ހުކުމެއްގައި ހުންނެވި ރައީސް އަބްދުﷲ ޔާމިން އަބްދުލް ޤައްޔޫމްއަށް އިންސާފު ހޯދުމަށް ވެސް އެއްވެސް މަސައްކަތެއް ރައީސް މުއިއްޒު ނުކުރައްވާކަމަށް ވެސް ވައްޑެ ވިދާޅުވެފައިވެއެވެ.

ރައީސް މުއިއްޒުއާ އެކީ ގަދައަޅާ މަސައްކަތްކޮށް މިއަދު އެ ހުންނެވި މަގާމާ ހަމައަށް ވާސިލު ވާން އެއްސަފެއްގައި ތިބީ ޕީޕީއެމްގެ ސަޕޯޓަރުންނާ ރައީސް ޔާމީން ކަމުގައި ވީއިރު އެވަރު ބަލައި ނުގަތް ކަން އެއީ ވަރަށްވެސް ހިތާމަހުރި ކަމެއް ކަމުގައި ވައްޑެ ހާމަކުރެއްވިއެވެ.

ރައީސް މުއިއްޒުވަނީ އެމަނިކުފާނު، ވެރިކަމަށް ގެންނަން މަސައްކަތް ކުރެއްވި މީހުން މިއަދު އެއްފަރާތް ކޮށް އެކަހެރި ކޮށްފައި ކަމަށް ގިނަ ބަޔަކު ތުހުމަތުކުރެއެވެ.