މިއަދު ފާހަކުރަމުން އަންނަ ކުދިންގެ ދުވަހުގެ ތަހުނިޔާ ރައީސް އަބްދުﷲ ޔާމީން އަބްދުލްގައްޔޫމުގެ ދެކަނބަލުންގެ ފަރާތުން ހުރިހާ ކުޑަ ކުދިންނަށް އަރިސް ކުރައްވައިފި އެވެ.
މިއަދު ފާހަގަކުރާ ކުޑަކުދިންގެ ދުވަހުގެ މުނާސަބަތުގައި ރައީސް ޔާމީން ދެއްވި މެސެޖުގައި ވަނީ މިއީ މުޖުތަމަޢުގައި ކުދިންގެ މުހިއްމުކަމާއި އެ ކުދިން ކުރިމަތިވާ ދަތިތަކުގެ މައްޗަށް އަލިއަޅުވާލާ ދުވަސްކަމަށެވެ. މުޖުތަމަޢުގެ ގިނަ ކުދިންނަށް ދިރިއުޅުމުގެ އެކި ކަންކަމުގައި ވަރަށް ގިނަ މައްސަލަތަކާއި ހުރަސްތަކެއް ކުރިމަތި ވާކަމަށް އެމަނިކުފާނު ވިދާޅުވި އެވެ.
މި ދުވަހަކީ ކުދިންގެ ހެވާއި ލާބަ ރަނގަޅުކޮށް، ދުނިޔެއަކީ އެ ކުދިންނަށް ރަނގަޅު ތަނަކަށް ހެދުމަށް މަސައްކަތްކޮށް، ރަނގަޅު މުސްތަގުބަލެއް ހޯދައިދިނުމަށް މަސައްކަތް ކުރުމުގެ ދުވަސް ކަން އެމަނިކުފާނު ފާހަގަކުރެއްވި އެވެ.
އެގޮތުން މި އަހަރުގެ ކުޑަ ކުދިންގެ ދުވަހާއި ގުޅިގެން ރައީސް ޔާމީން ވަނީ ހެޔޮ އެދުމާއި ތަހުނިޔާ ރާއްޖޭގެ ހުރިހާ ކުޑަކުދިންނަށް އަރިސް ކުރައްވާފަ އެވެ.
އަދި ފަލަސްތީނުގެ ގާޒާގައި ވަރަށް ހާލުގައި ދިރިއުޅެމުންދާ ކުޑަކުދިންގެ ހަދާން އާކޮށް ގާޒާގެ ކުޑަކުދިންނަށް އަދަށް ވުރެ ރައްކާތެރި މާދަމާއަކަށް އެދި ރައީސް ވަނީ ދުއާ ކުރައްވާފައި އެވެ.
ކޮންމެ އަހަރަކު ވެސް ކުޑަކުދިންގެ ދުވަސް ފާހަގަކުރަނީ މެއި 10ގައެވެ. އެދުވަހު ރާއްޖޭގެ އެކި ހިސާބުތަކުގައި ކުލަގަދަކޮށް، އެ ދުވަސް ފާހަގަކުރުމަށް އެކި ހަރަކާތްތައް ބާއްވައެވެ.
