ސިޔާސީ ހުރިހާ ބޭފުޅުންވެސް މިއަދު ތިއްބެވީ ރައިސް ޑރ، މުހައްމަދު މުއިއްޒުގެ ޅޮސް އުނދޯލީގައި ކަމަށް، ޕީއެންއެފްގެ އިސް ސަފުގައި މަސައްކަތް ކުރައްވަމުން ގެންދަވާ، އަހުމަދު މުހައްމަދު ވަހީދު (ވައްޑެ) ވިދާޅުވެއްޖެއެވެ.

ޗެންލް 13ގެ ނިއުސް ޓޯކް ޕްރޮގްރާމުގައި ވާހަކަ ދައްކަވަމުން ވައްޑެ ވިދާޅުވީ، ގާނޫނު އަސާސީގެ ތިން ބާރު މިވަގުތު އޮންނެވީ ރައިސް މުއިއްޒުގެ މުށުތެރޭގައި ކަމަށެވެ. މިވަގުތު ދިވެހި ރައްޔިތުންގެ ހައްގުގައި ވަކާލާތު ކުރެއްވުމަށް ހުންނެވި ހަމައެކަނި ލީޑަރަކީ ރައީސް އަބްދުﷲ ޔާމީން އަބްދުލް ޤައްޔޫމް ކަމަށް ވެސް ވައްޑެ ހާމަކޮށްފައިވެއެވެ.

ދިވެހިރާއްޖޭގެ މިއަދު އޮތް އަދުލުގެ ނިޒާމުގެ ތެރެއިން އިންސާފު ލިބިދާނެ ކަމަކަށް އެއްވެސް ވަރަކަށް ޤަބޫލުނުކުރެވޭ ކަމުގައި އެބޭފުޅާވަނީ ވިދާޅުވެފައެވެ. ޖުޑީޝަރީގެ ތެރެއިން އިންސާފު ލިބިވަޑައިގަންނަވާ ނަމަ ލިބިވަޑައިގަންނަވާނީ ނުހައްގު ދައުވާއެއްގައި ހުންނެވި ރައީސް ޔާމީންއަށް ކަމުގައި ވެސް ވައްޑެ ވިދާޅުވެފައިވެއެވެ.

ދިވެހިރާއްޖޭގެ ސިސްޓަމް މިއަދު އޮތީ ފެއިލްވެފައި ކަމަށް ބުނެ ވައްޑެ ހާމަކުރީ މަޖިލީސް ތެރެއިން ޤާނޫނަށާއި ޤާނޫނު އަސާސީއާ ފުށު އަރާ ޤާނޫނުތަކެއް މިހާރު ހަދަމުން ދާކަމަށެވެ.

މިއަދު ފެނިގެން މިދަނީ ދިވެހިރާއްޖޭގެ ފެހި ޤާނޫނު އަސާސީއިން ދިވެހިންނަށް ލިބެން ޖެހޭ ފޮނި މީރު ރަހައިގެ ދިމާ އިނދިކީލަ ކޮށްދާތަން ކަމުގައި ވެސް ވައްޑެ ވަނީ ވިދާޅުވެފައެެވެ.